JEREMIAH 20 - Cho Bible Common Language 2016

Jeremiah la Taigü Pashhur ah Ng’cuh can nak

¹ Taigü pashhur, immer ah hta, Taigüim ung bawi ang vai pi naw shin gui ka ng’shäu cu na ng’ya neta,

² kei cu na that u neta, Taigüim akhan täng Benjamin m’kawt ung gui awn khit ne ami na k’pawn vai ah k’bäi ci.

³ A ngawi yung kho ngawi, Pashhur naw ana chah tuba khawn ah kei naw ani cu ka pyen nak ci, “Bawipa naw nang cu Pashhur ah kä ning sui ci. Ani naw aning pek ah ming cu kho ng’nü m’ghämce ci, ciah kyak ci.

⁴ Bawipa a mät naw a pyen cu, “Kei naw nang cu na mät la na teih püi gui ung m’ghämce ciah ka ning pyan khai, ngami cu ami ga gui naw ami khimsem awn ngawn gui u sei nami hmu gui khai. Kei naw Judah chang gui avan cu Babilonia ghangpughang ah huham ka ung ka tha law gui khai; ani naw amshah cu pha ne akhaw ah hteh püi gui ne, amshah cu sih nak pe gui ci.

⁵ Shin ah mang gaw ah khawh gui avan, ami büh mang khaw mah avan la Judah ghangpughang ah m’küm khawh gui avan cu kei naw ami ga gui am gutep sak gui ne apäng nü cu Babilonia ah ami hteh püi vai ah ka cik khai.

⁶ Nang Pashhur la na kyong chang avan cu ning pha gui ne Babilonia ah ning hteh püi gui khai gui. Acu ah nang cu sik ci sei ning phuh khai gui, akda vei hleei ne na m’thein gui man ah na teihpüi gui avan awn atäng ah ning phuh gui khai gui.”

Jeremiah cu Bawipa ah Ma ah Thu m’da ci

⁷ Bawipa, nang naw kei cu na na m’hleei ci kya sei, kei cu m’hleei ah kyak ci. Nang cu kei ah tan na k’thamah pi ci, nang naw kei cu na na kahta nak ci. Chang nü naw na päipih u ne, khaw hnüüp pum ung na ng’li pyan ci gui.

⁸ Kei cu ka ng’thu law phung ung kyap ne “m’ghämce nak! Dishum nak!” cine ka m’lau ci nei. Bawipa, nang ah ng’thu ka ng’shäu ah phäh ah kei cu akphlüt sei, na päipih, na shedam nak ci gui nei.

⁹ Cun ung phi kei naw, “Kei naw Bawipa kä ka m’hnih khai nei, ani ah min gung ng’thu kä ka pyen ba khai nei,” ka ciah a kyak ung, nang ah ng’thu cu kei ah m’lung kyong ah mei ah mäih ah ui ci nei. Kei naw cun cu akyong ah ka k’pan vai ah ka tha nak ci, cun ung phi kä ka k’pan vai ah ka tha nak ci, cun ung phi kä ka k’pang ba hlawt ci nei.

¹⁰ Chang nü naw na pyen sa u sei ka ng’yak ci nei, “khaw nü ung m’ghämce nak om ci! Cun ah kyasei huham bawi ah mi chak khai nei!” cik ci gui. Ka khawt püi gui pi ah a teihpüi gui naw phi kei ah yung kyak vai cu na ngäng ci gui nei. Ngami naw, “Ani cu mi thei leh nak khai, cun kawn ah ani cu mi phak khai, phu mi tuk nak khai” cik ci gui.

¹¹ Cun ung phi nang Bawipa cu kei täng ah na om ci, na k’thamah ci, na m’gäi ci, kei na k’dukdeiu nak ci gui cu shum khai gui nei. Ngami cu kä näng hning phung u ne, angtäi sei thüisei khai gui. Ami thüisei nak cu kä m’hnih hlawt khai gui.

¹² Cun ung phi m’gäi ciah Bawipa, nang naw chang gui cu taga khai ah na m’nüm ci; ngami ah ami m’lung ngaih kyong ung a i om ci, cicu nang naw na hmat ci. Ka ga gui ah khan ah phu na tuk cu na hmuh sak ä, kei ah ka mawngma cu nang ah kut khui ung ka tha ci nei.

¹³ Bawipa ah ng’äi m’cu vä! Bawipa cu m’hlüm tai vä! Ani naw chang ah shedam nak gui cu, changshe gui ah huham ung ka gung gui ci nei.

¹⁴ Kei ami na hta nak hnüüp cu taam nak ah kya sä! Kanu naw ana htanak hnüüp cu m’hnih vai nei!

¹⁵ “Shin ah pami hta! Nang ah htapa! Ci ne ng’thu law püi ne, kapa yei sak ciah khan ah taam nak om sä!

¹⁶ Cun ah chang cu Bawipa naw am gein kaa ah amdi ah mang gaw gui ah mäih ah kya sä. Ani naw kho ngawitäng ah m’neh ne ng’hlo ei nak cu ng’ya sä, kho hnüüp yah ung ng’tuk nak ah k’aw cu ng’ya sä,

¹⁷ a i ah kyasei ci ung kei kä ami na hta nak pha ung kei kä ana ngawn ah phäh ah kyak ci nei. Ani naw ana ngawn vaisü ung kanu ah puk khui cu kei ah ng’cim hmun ah kyak khai süte nei.

¹⁸ A i ah kyasei kei ami na hta nak ang? Zaica vai la azä vai ah phäh ah ang, thüisei nak awn ka ghin nak a ng’pyi vai ah phäh ah ang?