JEREMIAH 2 - Cho Bible Common Language 2016

Israel gui Khanpughi naw a M’hteithtang nak gui

¹ Bawipa naw na m’thein ci,

² Jerusalem ung chang nü am shin ah ng’thu ka ng’shäu vai ah pyen ci. “Nangmi nami hmaw yah ung a i hlawt ah nami bekhüt cu, Kei naw ka shüm ba ci, Mikmi mi ng’chungla htük yah ung a i hlawk ah nami na m’hni ci ang; Nangmi naw bung nu ah, kä geit kaw nak man ah khaw ung nami na läk ci.

³ Israel gui, kei bäng naw nangmi ka ning ka na gui ci; Nangmi cu theingcim ciah kei ah ka ah nami kyak ci. Kei naw nangmi ning natsak gui ciah chang nü ah khan ah, yai ca nak la leigai ka tui lawk khai, Kei, Bawipa naw ka pyen ci.

Israel gui ah Pupa gui ah Katnak

⁴ Bawipa ah ng’thu pyen cu ngai vä, nangmi Jakob ah htangshon, Israel pakhui gui.

⁵ Bawipa naw pyen ci: “A i bün phei nak awn nami pupa gui naw kei ami na hnungtuk püi ang?” A i naw ang kei ungka a ning ng’hlah sak gui. A phuma kä om ciah agup gui khawihnah u ne, ami mät phi aphuma kä om ciah kya lawk ci gui.

⁶ Ngami naw kei a i ah kä na sui ci gui, kei naw Egypt ungka ka gung gui ci, kho ng’gau bung hmu ka kan sak gui ci; Ng’gau ne laigin ah kyak ciah kho, chang naw kyih vai ah kho, a u naw kä a om nak hteh hton ah phi a u naw kä hteh hton nak khai.

⁷ Kei naw anglei ni ah kho ung ka law püi gui ci, Acun ung geit ko gui la ahei nik ci gui awn ami yeikyai vai ah kyak ci. Cun ung phi ngami naw ka khaw m’di u ne, kei naw ka pek gui ah khopäng cu Shesham sak ci gui.

⁸ Taigü gui naw, ‘A hawi ang Bawipa?’ cine kä ng’shi thäh ci gui. Kamät ah taigü gui naw kä na hmat ci gui. Uk tu gui naw na hnungtuk püi ci gui; Prophet gui naw Baal ah ming ung thu pyen u ne, akholä ah kyak ciah a gup cu khawihnah ci gui.

Bawipa naw Achang gui Akbün Phei nak gui

⁹ “Cun ah kyasei kei, Bawipa naw ka chang gui cu, hnungtuk ne ka bün phei ba gui khai. Ami htangshon gui ah khan ah phi hnungtuk ne k’bün nak ka law püi khai.

¹⁰ Akhei täng saiprus kho ah hteit vä, Akiang täng Kedar kho ah chang tumat tüi vä. Ngami ah shin ah mäih a i phi kä kya ba sei nami hmak khai nei.

¹¹ Ani ah khanpughi gui cu kä a cang ah ami kyak pang ung phi, a i pakhui chang naw phi kä m’thawng hlawt khai, cun ung phi ka chang gui naw na ng’thawng sak ci gui, Ngami ah phäh ah a i ka bi hlawt ciah khanpughi gui ah hmawk ah m’tamkhah vai ah law pü gui ciah khanpughi cu ami na thawng sak ah kyak ci.

¹² Kei naw khomik cu thumkhän ne, kyihkyawk vai ah ka ng’thüng sak ci, cun ung cäktat vai la cäicat vai ah kyak ci.

¹³ Cun cu ka chang gui naw katnak hnih ami bi ah phäh ah kyak ci: Ngami naw tui ci lawng ah ka kyak ciah kei cu na ng’hlah tak ci gui, ngami naw tuihlüng co ci gui. Cun cu teek ciah tuihlüng ah kya ne a i tui phi kä ng’tang ci.

Israel gui ah kä Ami Bekhüt a Ng’dang nak

¹⁴ “Israel cu khleihtein ah kä kyak ci, ani cu khleihtein vai ah ami hta nak ah kä kyak ci. A i ah kyasei a ga gui naw ami züh yäi ang?”

¹⁵ Ngami naw phongkawng ah mäh ah m’ngaw shi ci gui; ani ah kho cu khong gau ah kyak khai ah cikci gui, ani ah gaw nu gui cu di ne ng’zän ci, nawng lüng vai ah kyak ci.

¹⁶ Memphis la Tahpanhes chang gui naw ani ah lukoi cu teek sak ci gui.

¹⁷ Israel, nang naw shin cu na mät ah khan ah na law püi ci! Kei naw lam anglät ung lam ka ning m’shüm gui yah ung na Khanpughi Bawipa, kei cu na na nawng ci.

¹⁸ A i ah ang nami ngaih, Egypt ah hteit ne, Nile tuinu ung tui aw ne, nami bä pi khai ang? A i ah ang nami ngaih, Assiria ah hteit ne, Euphratis tuinu ung tui aw ne, nami bä pi khai ang?

¹⁹ Nami mät ah akshe naw ning m’kyuk gui khai, kei nami na ng’hlah tak nak naw ning m’kat gui khai. Bawipa nami na khanpughi nami na nawng cu a i hlawk ah kha ne a chei cu nangmi naw nami hmat lawk khai. Nangmi cu kei ung kä nami bekhüt ba ci. Kei, uk ciah Bawipa m’gäi ci naw ka pyen nei.”

Israel gui naw Bawipa Khawihnah vai cu Mak ci gui

²⁰ Uk ciah Bawipa naw pyen ci, “Israel, cau pui nang naw kei ah huham cu na hnungtuk ci; kei na ngai ne na khawihnah vai cu nang naw nah mak ci, Hlüng ciah m’htung khan päng ung m’kim ciah sing ghing kaa päng ung nangmi naw khonglei khanpughi gui cu nami khawihah ci.

²¹ Kei naw nang cu bä ciah sapyit ah mäih ah ni pikbäih ciah m’shi ungka ka ning geit ci. Cun ung phi a i ah na kyak law cu teng ä! Nang cu chawng ne akolä ah kyak ciah sapyit ah mäih ah na kyak ci.

²² Nang cu aktung pikbäih ah satpia awn na ng’si ung phi, nang ah katnak cu dang sei ka hmuk ci nei.

²³ Na mät naw na mät kä na lelawi sak ciah, Baal kä na khawihnah phung ciah a i hawkcha ah na pyen hlawt ang. Khongnawi ung a i hlawk ah na hmakat cu teng ba ä; na bi gui pyi cu dan ba ä. Nang cu k’cih ciah kalauk ah mäih ah na kyak ci, dawng ne maih ci.

²⁴ Khonggau kho ah ng’güüt ne lut ci. Ani ak’cih yah ung a u naw m’dim hlawt khai ang? Ani ng’ya hlük ciah akhla cu amät naw amät kä yaica sak ciah kyak ci nei; ani cu ak cih yah ung ak phlüt ah ng’ghui khai ah kyak ci nei.

²⁵ Israel, ahei khanpughi gui na gawt nak awn na khaw kä na plui sak vai. Cun ung phi nang naw na pyen ci, “Ka nei! Kä ka ng’hlat law ba khai. Kei naw akho hei khanpughi gui ka m’hni gui ci, ngami ah hnu ah ka hteit khai.”

Israel cu M’kyuk vai ah K’bäi ci

²⁶ Bawipa naw pyen ci “m’guk-ei ami pha ung a thüi ah amäih ah, Israel chang avan cu nami thüi khai, nami ghangpughang gui, bawi gui, nami taigü gui la prophet gui.

²⁷ Nangmi nami van nami thüi khai, sing ghing cu nami pa, lungkheng cu nami nu ah nami pyen khai. Cun ah akiak cu a i kyak sei ci ung kei ah nami ng’hlah law ba nak vaisü ung, kei nami na ng’hlah tak ah phäh ah kyak ci. Cun ung phi khüikha nak ung nami gawk law ung law ne ka ning hun gui vai ah nami na k’thäh ci.

²⁸ “Nami mät ah phäh ah nami pyan ah khanpughi gui cu a hawi ang? Khüikha nak ung nami gawk sang ung a cun gui naw ning hun u sä — kä ning hun hning khai ma! Judah, nang ung nami mang gaw gui chü ah da ciah khanpughi gui om ci nei.

²⁹ Nang naw a i na pyen khai ang? A i ah kyasei nang naw na na hnungtuk püi ang?

³⁰ Kei naw ka ning m’kyuk ci, cun ung phi cun cu kä nik ci; nami ng’düng vai ah kä nami n apian sak ci. Nget ciah phongkawng ah mäih ah nang naw na prophet gui cu na ngawn ci.

³¹ Israel chang gui, kei ah ka pyen cu ngai vä, kei cu nangmi ah khong gau ah mäih, hmüp ne kyih vai kyak ciah kho ah mäih ah ka kya man ne ang? A i ah kyasei nami mät ah yeikyai nak vai ah nami bik khai ah nami pyen ang, cun ah kya ne nangmi cu kei ah kä nami law bap hung ci?

³² Hnumi non gnaw a awi ah cümlung m’hnih man ne ang? Ceimah ci naw ng’chungla nak sui m’hnih man ne ang? Cun ung phi ka chang gui naw kä khei hlawt vai ah hnüüp gui ung kei na m’hnih ci gui nei.

³³ Nangmi naw mät ah m’hni cu a i hawkcha gawt vai cicu nami hmat ci nei. Ak ghawi pikbäih ah hnumi gui naw phi nangmi ah ng’thei lawk khai gui nei.

³⁴ Nami suisak gui cu dukhaih ci gui la changnigui ah si awn kawp ci nei, cun cu m’guk-ei gui ah si ah kä kyak ci nei. “Cun ung phi shin gui avan nak vai sü ung.”

³⁵ Nami pyen cu, “Kei cu changniah ka kyak ci, ak cang ah Bawipa cu kei ah khan ah kä m’lungshe ba ci nei. Cun ung phi kei Bawipa naw ka ning m’kyuk gui khai, a i ah kyasei ci ung nangmi kä nami hmakak ci pyen nami ling ci.

³⁶ Chang pakhui hei gui ah khanpughi gui nami ng’hlah shi nak awn nami phu nami ng’neim sak ci. Nangmi cu Assiria ung nami thüi ah mäih ah Egypt ung, nami thüi yai khai.

³⁷ Nangmi cu Egypt ng’hlah ta u ne, lung aa nak awn nami lu nami m’awh khai. Nangmi naw nami ngaih gep gui cu kei naw ka hnungtuk gui ci; nangmi naw ngami ung nami gah vai a i kä om khai.”