JEREMIAH 19 - Cho Bible Common Language 2016

Pazak ciah K’hlüng

¹ Hteit ne m’dek hlüng ka hleih vai ah Bawipa naw na pyen nak ci. Chang gui ah ami ng’vai gui amshah la taigü angvai ba gui amshah cu la gui ne,

² potsherd m’kawt un glut law ne Hin nom khaw ng’nawi ah ka hteh vai ah na pyen nak ci. Acu ah ani naw ana pek ah thu cu ka ng’shäu khai ah kyak ci.

³ Bawipa naw ka pyen vai ah ana m’thein cu, “Judah ghangpughang la Jerusalem chang gui, kei, m’gäi ciah Bawipa, Israel khanpughi naw ka pyen cu ngai vä. Shin ah hmun ung kei naw leigai ka law püi khai nei, acun ah mawng ng’yak ciah chang nü cu cäicat khai nei.

⁴ Kei naw shin ah ka bi lawk khai a i ah kyasei ci ung chang gui naw kei na nawng u ne ahei khanpughi gui am khawihnah nak ami douthak nak awn shin ah hmun cu lelawi sak ci gui. Cun ah khanpughi gui cu ami mät ami pupa gui la Judah ghangpughang gui a u naw phi kä a hmat ah kyak ci. Ngami naw shin ah hmun cu changnigui ah si awn be sak ci gui,

⁵ ngami naw Baala am ami hta nau gui m’khih ne ami khawihnah nak vai ah sonkiang gui phi co ci gui. Kei naw shin ami bi vai ah kä ka thumkhän gui ci; shin cu ka m’lung kyong ge ung kä om ci.

⁶ Cun ah kya sei, shin ah hmun cu Topheth käcung Hinnon khaw ng’nawi ah kä pyen nak ba vai ah akhin gawk lawk khai nei.

⁷ Acun ah hmun ung Judah chang gui la Jerusalem chang gui ah pawng püi avan cu kei naw ka plawh khai, kei naw ngami cu ami ga gui am ngawn sak gui ne ng’tuk nak ung ka ngawn sak gui khai. Ami pumsa gui cu kha gui la khisa gui naw ami ei vai ah ka pe gui khai.

⁸ Kei naw shin ah kyih vai ah tuk hnim nak cu shin ah mang gaw ah khan ah ka law püi khai, a shin sun pah ci ng’nü cu cäi ne alu tum khai.

⁹ Ga gui naw mang gaw cu khaai u ne acun ung chang gui cu ngawn vai ah k’tha nak khai gui. Ami koi nak gui cu shou aik khäta mang gaw kyong ah om ciah chang gui cu ami mät ng’ei tuk khai gui, ami mät ah hta nau gui phi ei khai gui.”

¹⁰ Cun kawn ah kei awn atäng ah hteit ci gui ah ami ma ah hlüng cu ka ci pa yak vai ah Bawipa naw na pyen nak ci,

¹¹ Shin ah m’gäi Bawipa ah pyen cu ka m’thein gui vai ah pyen ci, “Kei naw shin ah chang gui la shin ah mang gaw cu ka m’shet khai, cun cu pyang ba ne kä gah vai ah payak ciah m’dek hlüng ah mäih ah kyak khai. Chang gui naw aksi gui cu Tophethung thet sei k’phuh khai gui, a i ah kyasei ci ung ngami phuh nak gui vai ahei kä a om ah phäh ah kyak ci.

¹² Kei naw shai ka tak ci, shin ah mang gaw la shin ung chang gui cu Topheth ah mäih ah kei naw ka cik khai.

¹³ Jerusalem ung im gui, Judah ghangpughang gui ah im gui, akcih khan ah aisi gui am ang ui gui m’khih pek nak ah im gui la ahei khanpughi gui sapyit tui kei ne douthak nak gui — cun gui avan cu Topheth mäih ah kä theingthap khai gui.”

¹⁴ Bawipa naw angthu ng’shäu nak vai ah ana tüih nak ah Topheth cu kei naw ka hteh tak ci. Kei naw Taigüim tung akyong täng ah hteit ne ng’düi neta,

¹⁵ m’gäi ciah Bawipa, Israel khanpughi naw ana pyen sak cu chang avan am ka m’thein gui ci. Kei naw ka pyen cu, “kei naw shin ah mang gaw la a pei yung ah gaw nu nü ah khan ah kei naw ka bi vai ah ka pyen ah m’kyuk nak avan cu ka law püi khai, a i ah kyasei ci ung nangmi cu nami m’lung liing sei kei ah ng’thu kä nami ngaih ah phäh ah kyak ci.