JEREMIAH 17 - Cho Bible Common Language 2016

Judah Khaw ah Katnak la M’kyuk nak

¹ Bawipa naw pyen ci, “Judah chang gui, nami katnak cu m’si gong awn guk nei: cu na katnak cu nami m’lung kyong ung pyülung m’si awn gu ne, nami sonkiang gui ah akit gui ung vüt ne m’hluh nei.

² Na chang gui naw sonkiang gui ung khawihnah ci gui, khanpughi nu Ashenah ah müigup cu m’kim ciah sing ghing päng ung, khomhtung lai

³ la khomhtung kho häu ung ng’ling ci gui. Nami ga gui naw nami khawh gui la nami m’küm khawh gui avan ami lak vai ah ka bik khai. A i ah kyasei ci ung cun cu kho avan ung katnak nami bi avan ah phäh ah kyak ci.

⁴ Kei naw ka ning pek gui ah khaw cu nangmi naw nami m’lung si khai. Cun kawn ah kä nami hmat ah khaw ung nami ga gui ah bii nami bik khai ah kei naw ka ning bi gui khai, a i kyasei ci ung kei ah m’lungshe nak cu mei ah mäih ah kyak ci, cun naw khongtän ung ui khai nei.

Ng’thu Thuuk Ahlü hlü

⁵ Bawipa naw pyen ci, “Kei na ng’hlah tak ci gui cu kei naw ka m’kyuk gui khai, ngami cu hnicim chang ngaih u u ne, she thei ci k’thagui nak ci gui.

⁶ Ngami ci ng’kiang ma ah k’plup ah mäih ah kyak ci gui, cun cu bung hmu kho chawng ung pyo ci, a i naw kä a ghin nak hning ah m’shi tui khonglei ung pyo ci. Cun gui ah khan ah akni phung kä kya lawk ci.

⁷ Cun ung phi kei ung ngaih gep ci gui cu kei naw ghiham ka pe gui khai.

⁸ Ngami cu tui lawng pei ah ghing ciah sing ghing ah mäih ah kya u ne, tui ah gawk ne ami pya hteit ci. Khong ling kho a gawk law ung phi ngami cu kä kyik ci gui, a i ah kyasei ci ung ani ah hnah gui cu akphlüt ah ching ci: Kho kä a aa ung phi ngami cu kä ng’ä ci gui; angtäi sei theih lä ci gui.

⁹ “Hnicim chang ah m’lung ngaih cu a u naw hmat hning khai aw? Cun cu thuvi theileh aih ci nei. Chang ah m’lung hnga ung m’tui ne kä m’khüt vai ah natnak om ci.

¹⁰ Kei, Bawipa naw hnicim chang ah m’lung cu shui zap ne, chang ah m’lung ngaih cu ka m’nüm ci nei. Kei naw chang nü cu amät ah om ah ci ah amät ah bi ah läk ah ka om püi ci nei.”

¹¹ Kä ng’düng ci awn ngui gah ciah chang cu, kä amtui baw ciah kha awn täng ci. A nong sang ge ung a ng’büh mang nak cu maih sei, ak hnu ah akholä ah kya ne agu ang nak ng’pyi ci.

¹² Mikmi ah Taigüim cu akhtük ge ung khomhtung hlüng ung om ne, bämang ciah mang kiang ah mäih ah kyak ci.

¹³ Bawipa, nang cu Israel gui ah ngaih u ah na kyak ci; Nang ning nawng ciah chang avan cu lü ng’aa nak ung gawk khai. Ngami cu m’vut ung guk ah ming ah mäih ah maih khai gui. A i kyasei ci ung Tuici lawng ah na kyak ciah nang Bawipa ami ning nawng ah phäh ah kyak ci.

Bawipa naw a M’htei vai ah Jeremiah naw K’thäh ci

¹⁴ Bawipa, na k’pün ä, kei akcang ah ka gai khai nei; na gung ä, kei akbe ah ka phyawng khai nei. Nang cu kei ah ning m’hlüngtai tumat ah na kyak ci nei!

¹⁵ Chang gui naw na pyen nak cu gui, “Bawipa naw hnungtuk ne ana ng’li ng’pyaan nak gui cu a hawi ang? Tuhbäi cun gui cu bi law cang sä!”

¹⁶ Cun ung phi, Bawipa, nang naw ngami ah khan ah leigai na law püi vai ah kei naw kä ka ning bi sak phung ci nei; ngami ah khan ah khüikha nak agawk vai ah kei naw kä ka ng’ya hlük ci nei. Bawipa, nang naw shin cu na hmat ci.

¹⁷ Kei ah phäh ah kyih vai ah kä kya en sä; khüikha nak a gawk law yah ung kei ah phiawn nak hmun ah na kyak ci.

¹⁸ Kei na dukdeiu nak ci gui ah khan ah thüisei nak law püi ä. Cun ung phi Bawipa, kei cu nak pawih na ä. Ngami cu kyihkyawk nak awn be sak gui ä, cun ung phi kei cu kä na kyihkyawk sak en ä. Ngami ah khan ah leigai law püi ne, akhui k’pii ah kyak sak gui ä.

Kyin Hnüüp K’pan nak

¹⁹ Bawipa naw na pyen nak ci, “Jeremiah, Judah ghangpughang gui ah luh ng’lan nak, chang gui ah m’kawt ung hteit ne kei ah ng’thu cu shän ä, cun kawn ah a hei Jerusalem m’kawt gui avan ung hteit ä.

²⁰ Ghangpughang gui la, Judah chang gui avan la Jerusalem ung om ciah chang päng la shin ah m’kawt gui un glut ci phung am kei naw ka pyen cu ami ngaih vai ah m’thein gui ä.

²¹ Ami ghin nak ami m’hni ah a kyak ung kyin hnüüp ung a i kä ami phuih en vai ah na m’thein gui vai nei; ngami cu Jerusalem m’kawt gui ung a i phuih phi phui ne kä ami hteh vai.

²² Kyin hnüüp ung ami Im ah k’pung ah a i phi kä ami phuih kawt vai. Kyin hnüüp ung bii kä ami bi vai; kei naw ami pupa gui am ng’thumkhän ka pek ah mäih ah ngami naw kyin hnüüp cu theingthap ciah hnüüp ah ami bi vai.

²³ Ami pupa gui naw kei ah ng’thu kä ngai ci gui, kei a i ah kä na ngai ci gui. Cun nak vaisü ung ngami cu ami m’lung liing ci; ngami naw kei ah ng’thu kä ngai ci gui, kei ah kä ng’thei thang lawk ci gui.

²⁴ “Shin ah chang gui am m’thein gui ä, ngami naw kei ah thumkhän avan ami läk vai nei. Ngami naw kyin hnüüp ung, shin ah mang gaw m’kawt gui kan ne a i phi kä ami phuih en vai. Ngami naw kyin hnüüp cu theingthap ciah hnüüp ah ami yum vai, api ah phi a i kä ami bi en vai.

²⁵ Cun kawn ah ami ghangpughang gui la ami manghta gui cu Jerusalem m’kawt gui un glut lang khai gui, ngami cu Judah la Jerusalem chang gui awn atäng ah yatha gui la ng’se gui awn be khai. Jerusalem mang gaw cu angtäi sei chang gui awn be khai.

²⁶ Chang gui cu Judah gawnu gui la Jerusalem ah ng’veing gawhta gui ungka lawk khai gui; ngami cu Benjamin khopäng khomhtung nawi gui. Khomhtung gui la Judah a htumtäng ungka lawk khai gui. Ngami naw m’khih ne douthak nak la khawihnah nak, thang-douthak nak la tui ng’ui gui la yeikyai douthak nak gui cu kei ah Taigüim ah law püi khai gui.

²⁷ Cun ung phi ngami naw ka ng’thu ngai u ne, kyin hnüüp cu theingthap ciah hnüüp ah ami k’bäi vai. Ngami naw cun ah hnüüp ung Jerusalem m’kawt gui kan ne a i phuih phi kä ami phuih en vai, ami phuih ah a kyak ung Jerusalem m’kawt gui cu kei naw mei awn ka m’khih khai. Jerusalem mang im gui cu mei naw ui khai, cun ah mei cu a u naw kä m’sih hlawt khai.