JEREMIAH 16 - Cho Bible Common Language 2016

Jeremiah ah Ghin nak ah Phäh ah Bawipa ah Ng’yak hlü

¹ Bawipa naw na ng’thu püi ba mä ne, a pyen cu,

² “Shin ah mäih ah hmun ung kä na chumah vai, kä na hta nau vai.

³ Shin ung ami hta nak gui ah a hmaw gui la ami nupa gui ah khan ah a i ah kya lawk khai cicu kei naw ka ning m’thein gui khai.

⁴ Ngami cu kyihkyawk vai ah gaw nak ung sik khai gui, ngami ah phäh ah a u kä thüisei khai, a u naw kä phuk gui khai. Ngami ah pumsa gui cu m’dek ung eek ng’pum ah mäih ah ng’zäu khai gui. Ngami cu ng’tuk nak ung ngawn gui khai gui, ei ah cawi ne sik khai gui, ngami ah pumsa gui cu kha gui ah ei, khisa gui ah ei ah kyak khai.

⁵ “Nangmi cu thüi kyah nak ah im ung kä nami luh vai. A u ah phäh ah phi kä nami thüi sei vai. Kei naw ka chang gui cu deimdeeih nak awn hriham kä ka pe ba gui khai, m’hni nak la chimgein nak kä ka m’dang gui khai.

⁶ Büh mang ci la dukhaih ci gui cu shin ah kho ung sik khai gui, cun ung phi a u naw kä phuh gui khai, ngami ah phäh ah a u kä thüisei khai. A u naw phi a thüi am dang nak ah amät vun kä nat sak khai, alu kä k’teek khai.

⁷ Am hni ah chang sik ci a om ung k’büi nak ah a u naw phi kä ei awk püi khai. A u naw phi m’gein nak kä m’dang khai, a nu, apa chük ciah phäh ah phi a u naw kä m’gein khai.

⁸ “Ami ng’ei awk nak ah cun ung kä nami luh vai. Ngami awn ei awk vai ah kä nami ngoh en tu vai.

⁹ Kei m’aäi ciah Bawipa, Israel Khanpughi naw ka pyen cu nami ngaih vai. Ami zeikiai, lün lawi nak ah k’aw gui la hta m’um pawi ung ami yeikyai nak ah k’paw gui cu ka dim sak khai. Cun ah a kyak gui cu shin ung om ciah chang gui naw hmuk khai gui.

¹⁰ “Nang naw shin gui avan na m’thein gui ung, ngami naw a i kyasei kei naw aknui ah ka m’kyuk gui khai ah ka k’bäi cu ning shikkhai gui. Ngami naw a i chei shoh nak ang ami bi, a i katnak bi ne Bawipa ami Khanpughi ami hnung tuk püi cu ning shik khai gui.

¹¹ Bawipa ah thu pyen cu na m’thein gui vai, nami pupa gui naw kei na ng’hlah ta ne, a hei Khanpughi gui khawihnah ne a bii bik ci gui. Ngami naw na nawng u ne ka m’thein thang cu kä ngai ci gui.

¹² Cun ung phi nangmi naw nami pupa gui ah ta kapi khai ah nami bik ci nei. Nangmi nami van cu nami m’lung ling ne nami shekhak ci, kei kä na mi na ngai ci.

¹³ Cun ah kyasei kei naw shin ah kho ungka ning k’täm gui ne, nangmi la nami pupa gui naw kä nami hmat man ah kho ung ka ning gawk sak gui khai. Acu ah nangmi naw amü a hnüüp ahei khanpughi gui ah bii nami bik khai, kei naw chimgein nak kä ka ning m’dang gui khai.

Omktu ah kaa Ami law ba

¹⁴ Bawipa naw pyen ci, “Egypt khaw ah ka Israel chang gui law püi ba gui ciah ghing ciah khanpughi, kei ung chang gui kä ami ng’gun taam nak ba vai ah akhin cu gawk lawk ci nei.

¹⁵ Acun nak vaisü ung Israel chang gui cu a siiptäng khaw la kei naw ka püi pyang sak nak gui ah akhopäng hei gui ung ka ka law püi ba gui ciah ghing ciah khanpughi ah ka kyak nak ung guntaan khai gui nei. Kei naw ami pupa gui am ka pek gui ah ami mät ah khaw ung kei naw ka hteh püi ba gui khai. Kei, Bawipa naw ka pyen ci nei.

Gawk lawk khai ah M’kyuk nak

¹⁶ Bawipa naw pyen ci, “Law ne shin ah chang gui pha gui khai gui ah kei naw ngakpha chang akda ka tüi ci. Cun kawn ah kei naw sak züh gui akda ka tüi ci, ngami nawkhogui khomhtung päng gui la lungkhui gui ung züh gui khai gui.

¹⁷ Kei naw ami bi phung ka hmuk ci. Kei ah kä hmuh vai ah thuh a i kä om ci; ngami ah katnak cu kei ah hmuh nak ung kä phyawng ci.

¹⁸ Ami katnak la ami cheishoh nak ah phäh ah kei naw a goi ah ka pe gui khai, a i ah kyasei ci ung ngami naw ka chaw cu agup gui awn lelawi sak ci gui, cun gui cu gook ah mäih ah ami ghin nak kä om ci, cun gui cu ngami naw kä hman ciah ami khanpughi gui awn be sak ci gui.”

Bawipa naw Akhüi Ghat sak vai ah Jeremiah ah Taigü nak.

¹⁹ Bawipa, nang cu kei na shungvong ne k’thagui na pek ciah na kyak ci; ka khüikha sangung nang naw na na m’htei ci. Chang pakhui gui cu khocawi ah ka nang ah law u ne tap yen khai gui, kami pupa gui ung a i kä om ci, khanpughi she gui bäng om ci, ahei a i kä om ci, kä ei mang vai ah agup gui bäng om ci.

²⁰ Chang gui naw ami mät ah khanpughi pyang hnung u ne ang? Ka nei, ami pyan hning ah a kyak ung cun cu khanpughi akcang ah kä kyak khai nei.”

²¹ Cun ah kya sei, Bawipa naw pyen ci, “Hnü ät awn avan geah changpakhui gui am kei ah m’gäi nak la huham cu ka hmat sak gui khai; ngami naw kei Bawipa ah ka kyak cu hmat khai gui.