JEREMIAH 15 - Cho Bible Common Language 2016

Judah Chang gui ah Phäh ah Ng’yiin nak

¹ Bawipa naw na pyen nak ci, “Ashin ung Moses la Samuela naw ng’düi ne ani na ng’paa nak ung phi kei naw shin ah chang gui am a i m’gein nak phi kä ka m’dang gui khai. Ahei ah hteh sak gui ä; kei ah pei ung ka naw ahei ah hteh sak gui ä.

² Ngami ahawi ami hteh vai ami ning shi law ah a kyak ung kei naw ka pyen cu m’thein gui ä: amshah gui cu nat nak awn ng’ziin ne sik khai gui. Cun cu ngami ah hteh nak vai ah kyak ci! Am shah gui cu ng’ziin u ne ng’tuk nak ung sik khai gui — Cun cu ngami ah hteh nak vai ah kyak ci! Amshah cu ei ah cawi ne sik khai gui Cun cu ngami ah hteh nak vai ah kyak ci! Amshah cu pha ne hteh püi khai gui Cun cu ngami ah hteh nak vai ah kyak ci!

³ Kei, Bawipa naw ka k’bäi ci, kyih vai ah mawng phli cu ngami ah khan ah kya lawk khai: ngami cu ng’tuk nak ung ngawn gui khai gui; ami pumsa gui cu ui gui naw ng’gut gui khai gui, kha gui naw ei khai gui, k’pawih ba ci gui cu khisa gui naw k’tüi ne ei khai gui.

⁴ Khomdek khan ung chang avan naw ami kyihkyawk gui vai ah ka bik khai, cun cu Hezekiah ah hta Manasseh Jerusalem ung Judah ghangpughang ah a kyak sang ung abi lawh ah phäh ah kyak ci.

⁵ Bawipa naw pyen ci, “Jerusalem chang gui, a u naw nangmi ning chihna gui khai ang? Nangmi ah phäh ah a u thüi sei khai ang? A u naw nami gawgai ah mawng ng’düi ne ning shi gui khai ang?

⁶ Nangmi chang gui naw nami na hnungtuk püi ci; Nangmi naw nami na ng’hlah tak ci. Cun ah kyasei kei naw ka kut shäng ne ka ning güüt gui khai, a i ah kyasei ci ung kei cu ka m’lungshe ka k’üüp nak ka cüm lawk ci.

⁷ A gawnu päng kho avan ung kei naw nangmi cu ko ah mäih ah khokhi ung ka ning ghawt gui khai. Ka chang gui, kei naw ka ning m’di gui khai, Nami htanau gui cu kei naw ka ngawn gui khai, a i ah kyasei ci ung nangmi naw akshe ah nami om cu kä nami ng’düm sak ci.

⁸ Tuinu ah kem ah laigin ah ta nami khaw ung hmei nu cu da law pi khai. Kei naw nami chang nong gui cu ami hnüüp lung ung ngawn gui ne, ami nu gui cu ka yaica sak gui khai. Kei naw ngami cu ang ghit ah kyihkyawk sak gui ne ka cäicat sak gui khai.

⁹ A hta chih maih ciah nu nu cu ng’gäih pyi ci nei, ang ghi kä ng’täi ba ci nei. Ani ah khok dei cu mühmüp ah ng’hlat ci nei; ani cu thüisei ne amlung kyong na pyi ci nei. Ghing ba shut ciah cun ah nangmi cu nami ga gui am ka ning ngawn sak gui khai nei. Kei, Bawipa naw ka pyen nei.”

Bawipa ah Ma ah Jeremiah K’ce ci

¹⁰ A i hlawk ah kä yei ciah chang ang kei cu! A i ah kyasei khomdek khan ung kanu naw ana hta nak ang? Shin ah kho ung chang nü awn kani ng’cuh can lawk ci nei. Kei naw a u am kä ka k’pu ci, a u ah kä ka puk ci, cun ung phi chang nü naw na tam ci nei.

¹¹ Bawipa, kei naw nang ah bii akni ah kä ka bi ah a kyak ung, ka ga gui khuikhanak la shedam nak ami gawk law ung ami ng’paa nak vai ah kä ka hnungtuk ah a kyak ung ami ng’plah taam nak avan cu bä sä.

¹² (M’si cu a u naw kä hnget hlawt ci, aktung pi ah a siiptäng ah ka kyei awn ami k’caw ah m’si cu a u naw kä hnget hlawt ci.)

¹³ Bawipa naw na pyen nak ci, “ka chang gui ah khawh them gui la khawh cham gui hteh püi khai gui ah kei naw ga gui ka tüi lawk khai. Cun cu kho avan ung ngami naw katnak ami ah phäh ah m’kyuk nak gui ah kyak ci.

¹⁴ A i kä ami hmat nak ah kho ung ngami naw ami ga gui ah bii ami bi vai ah kei naw ka bi gui khai, a i ah kyasei ci ung kei ah m’lungshe nak cu mei ah mäih ah kyak ci, cun naw khonglän ung ui gui khai.”

¹⁵ Cun kawn ah kei naw, “BAWIPA, nang naw nah mat ci. Na shüm ba ne na m’htei htang ä. Na k’dudei nak ci gui ah khan ah phu na tuk sak ä. Ngami naw kei na näng ne ami na ngawn güt nang naw kä hnim gei en ä. Kei ami na shedam nak cu nang ah hmawk ah kyak ci, cicu shüm ba ä.

¹⁶ Nang naw na na ng’thu püi ci, na ng’thu päng cu kei naw ka ngai ci. Kei cu nang naw na na khäm ci, Bawipa, m’gäi ciah khanpughi, cun ah kyasei nang ah thu lung naw kei ah m’lung naw kei ah m’lung cu zeikia nak ah lünlowi nak awn be sak ci.

¹⁷ Kei naw ka mät ah khin cu gaih ng’pian om k’ni düt awn kä ka ng’pyi sak ci. Nang ah thukbäi gui cu ngai ne, ka mät naw ka mät om ne, m’lungshe nak awn ka be ci.

¹⁸ A i ah kyasei kei ka yaica tu lä ang? A i ah kyasei a hmaleim gui kä m’tui m’seih ang? A i ah kyasei cun gui kä akhan ang? Khocha ah kawi ne ket ciah tui hta lawng ah mäih ah nang naw kei cu nana thüisei sak hlü ne ma?”

¹⁹ Cun ci ngäta Bawipa naw, “Nang na law ba ah a kyak ung kei naw ka ning la ba khai, nang cu kei ah changshäm ah na kya ba khai. A kholä ah ng’thu nak vaisü ung bä ciah thu na ng’shäu vaisü ung nang cu kei ah prophet ah na kya ba khai süte. Chang gui cu nang ah law ba khai gui, ngami ah nang na hteh vai kä hlü ci.

²⁰ Nang naw ngami na näng nak gui vai ah m’liu ciah kyei k’paang ah mäih ah ka ning pyang khai. Ngami naw ning tuk khai gui, cun ung phi kä ning hnim hlawt khai gui. Kei naw nang cu ning shungvong ne k’pang ne ka ning phiawn khai.

²¹ M’ghäm ce ciah chang gui la shekhak ciah huham ungka kei naw ka ning gung khai. Kie, Bawipa naw ka pyen ci.