JEREMIAH 14 - Cho Bible Common Language 2016

Kyih vai ah Khaw Käu nak

¹ Khaw a käu vai ah mawng Bawipa naw ana pyen nak cu,

² “Judah cu thüi kyap ci; ani ah mang gaw gui cu sik ci gui, ani ah chang gui cu azä ne m’dek ung ng’zän ci gui, Jerusalem cu m’htei vai ah ng’khü ci.

³ Bühmang chang gui naw ami changshäm gui cu tui than khai gui ah tüi gui ci gui; ngami cu tukan gui ah hteit ci gui, cun ung phi tui kä hmuk ci gui; ami tui um a ghawng ah ng’hlat law ba ci gui. Ami k’tha ken sei, ng’gogan u ne, ami hmai thup ci gui.

⁴ A i ah kyasei ci ung khaw kä aa ci, khomdek chawng yawp ci, lo mah gui ami m’lung nak ci; ngami ami hmai thup ci gui.

⁵ Khobung ah kigangnu naw a hta thai hta cu nawng ci a i ah kyasei ci ung khu lim kä om ci.

⁶ K’pya ng’se gui cu m’htung lai ung tui ne, saui ah mäih ah ng’haawk ci gui; ami ei vai kä om sei ami mik ng’phiui ci.

⁷ Ka chang gui cu kei ah kyap lawk ci gui, “kami katnak naw ana kyuk gui ung phi, Bawipa, na shaitak ah mäih ah na m’htei gui ä. Keimi naw nang cu akda vei kami ning hlah tak ci, katnak bi ne kami ning hnungtuk püi ci.

⁸ Nang bäng cu Israel gui ah ngaih u ah na kyak ci; nang bäng cu lei gai ung na hun gui ciah na kyak ci. Nang cu a i ah kyasei mi kho ung khin ah mäih ah mü ät bäng ip tuk ciah lam hteit khin ah mäih ah na kiak?

⁹ A i ah kyasei nang cu cäi vai ah ami hteh püi ah chang ah mäih, amgein kaa gakap ah mäih ah Huham kä om ciah na kiak? Bawipa, akcang ah nang cu keimi awn na om ci nei! Keimi cu nang ah chang gui nei; kä na nawng en gui ä!

¹⁰ Bawipa naw shin ah chang gui ah amawng pyen ci, “Ngami cu kei ungka dawng vai m’hni ci gui, ami mät naw ami mät kä m’htei hlawt khai gui. Cun ah kyasei kei naw ngami kä ka yei na gui ci. Kei naw ngami ah cheishoh nak cu shüm ba ne, ami katnak ah phäh ah ka m’kyuk gui khai.”

¹¹ Bawipa naw kei cu na pyen nak ci, “Shin ah chang gui m’htei htang gui vai ah kä na k’thäh en vai.

¹² Ngami ei ami hlawi ung phi kei naw ka m’htei gui vai ah ngami naw ami k’thäh cu kä ka ngai khai; ngami naw m’khih ne douthak nak la htang-douthak nak ami na douthak law ung phi kei naw kä ka yei na gui khai. Cun nak vaisü ung ng’tuk nak, ei cawi nak la gawpai nak awn kei naw ka ngawn gui kei.

¹³ Cun kawn ah kei naw, “Uk ciah Bawipa, nang naw na hmat ah mäih ah prophet gui naw chang gui ami m’thein gui cu, ei cawi nak la ng’tuk nak kä om khai, a i ah kyasei ci ung nang naw shai na tak pyi ah kyak ci, mi khaw dimdeeih nak bäng om khai, cik ci gui.”

¹⁴ Cun ung phi Bawipa naw na m’shang ne, “Prophet gui naw kei ah min gung ami hleei pyen ci gui nei, kei naw ngami kä ka tüi gui ci, kei naw a i ng’thu kä ka k’bäi gui ci, ng’thu m’kha ät phi kä ka pyen na gui ci. Ngami naw ami pyen ah muimang cu kei ung ka lawk ciah kä kyak ci; ngami ah cängbang nak gui cu ami ngaih düt akholä ah kyak ci.

¹⁵ Kei, Bawipa naw, cun ah prophet gui ah khan ah a i ka bi vai cu ka ning m’thein gui ci, ngami cu kä ka tüih gui, kei ah min ung thu pyen u ne, shin ah kho cu ei cawi nak la ng’tuk nak la ei cawi nak awn ka ngawn gui khai.

¹⁶ Ngami naw shin ah mawng ami m’thein gui ah chang gui phi ngami ah mäih ah ngawn gui vai. Ngami ah pumsa gui cu Jerusalem lam gui ung ghawh gui vai, cun gui cu a u naw kä phuh gui khai. Cun gui cu ami van ah khan ah gawk khai — ami chu gui, ami htapami gui, la ami hta hnumi gui ah khan ah gawk khai. Ami shekat nak ah phu ami gah vai ah kei naw ka bi gui khai.”

¹⁷ Ka azä nak ah mawng chang gui am ka m’thein gui vai ah Bawipa naw na ng’thum khan ci: “Amü a hnüüp ka mi kung ng’phli tui long sä, ka thüi kyah nak cu kä ng’düm phung sä. Cun cu ka chang gui ak nui ah leim ne, ana ah ami m’neh ah phäh ah kyak ci nei.

¹⁸ Kei cu lolai ma ah ka hteh ung ng’tuk nak ung ami ngawn gui cu ka hmuk ci; kei cu gawnu gui ung ka hteh ung ei ah cawi ne sik ciah chang gui cu ka hmuk ci. Prophet gui la taigü gui cu ami bii bik ci gui, cun ung phi a i ami bi kä hmat ci gui.”

Chang gui naw Bawipa Ami Thäh Chah nak

¹⁹ Bawipa, Judah cu akbe ah na hnungtuk püi ne ma? Zion chang gui cu na thüi na gui ne ma? Keimi kä kami gai ba hlawt khai ah a i ah kyasei akshe ah na na nat sak gui ang? Keimi naw dimdeeih nak kami shui ci, cun ung phi akni kä kya lawk ci; Keimi naw gai gawng vai kami ngaih u ci, cun ung phi kyih vai düt gawk lawk ci.

²⁰ Bawipa, nang ning hnungtuk püi ne kami hmakat cu, kami mät ah katnak la pupa gui ah katnak cu kami ng’kiaa ci nei.

²¹ Na shaitak shüm ba ä, kä na päi pih en gui ä; Bä ciah na mang kiang ah hmun ah kyak ciah Jerusalem ah khan ah Thui ng’aa nak cu kä law en püi ä. Keimi awn na bi ah thukhän cu kä m’shet en ä.

²² Chang pakhui gui ah a gup gui naw khaw kä aa sak hlawt ci; khomik amät naw khogoh kä ng’kiak sak hlawt ci. Keimi naw nang cu kami ning ngaih u ci nei, Oh Bawipa, kami khanpughi, a i ah kyasei ci ung nang cu shin gui bik ciah na kyak ci.