JEREMIAH 13 - Cho Bible Common Language 2016

Akyong ah Suisak gui

¹ Bawipa naw na m’thein ci, hteit ne akyong ah suisak gui hleih ne, ka sui sak vai, cun ung phi tui ung ka ng’shüih sak vai.

² Cun ah kyasei kei naw hleih ne ka suisak ci.

³ Cun kawn ah Bawipa naw na ng’thu püi bam ä ne a pyen cu,

⁴ “Euphratis tuinu ah hteit neta na suisak gui cu lungkhui ung thup ä” cik ci.

⁵ Cun ah kyasei kei naw hteit ne cun gui cu Euphratis tuinu pei ah kathup ci.

⁶ Shou hta khäth Euphratis ah hteit ne suisak gui ka lak ba vai ah Bawipa naw na m’thein ba ci.

⁷ Cun ah kyasei kei hteit ba ne, ka thuh nak ah hmun cu ka hmu law ba ci, cun gui cu di ci, akni kä om ba sei, kei naw ka hmuk ci.

⁸ Cun kawn ah Bawipa naw kei na pyen nah ba ci, Ani naw,

⁹ “Shin gui Judah ah ng’shei nak la dämduh ciah Jerusalem ah ng’shei nak cu kei naw a i hawkcha ka m’di khai ciah kyak ci.

¹⁰ Shin ah chang shekha gui naw kei ami na ngaih vai ah mak ci gui. Ngami cu ak phlüt ah ami m’lung ling sei shekhak ci gui, ahei khanpughi gui khawihnah u ne, acun ah bii bik ci gui. Cun ah kyasei ngami cu kä ni ba ciah sui aktawi ah mäih ah kyak ci gui.

¹¹ Sui k’tawi cu khei ung htek khai ah pin ne ciah mäih, Israel la Judah chang gui ami van cu kei ung ami kawp vai ah kei naw ka ng’ya hlük ci. Cun ah kei naw ka bi cu ngami ci kei ah chang ah kya u ne, kei ah ming m’hlüngtai nak vai la m’tamkhah nak vai ami law püi vai ah kyak ci; cun ung phi ngami naw kei kä na ngai ci gui.

Sapyit tui K’hlüng

¹² Bawipa, Khanpughi naw na pyen nak ci, “Jeremiah, Sapyit tui hlüng phung sapyit tui awn ami k’be vai ah Israel chang gui cu m’thein gui ä. Ngami naw sapyit tui hlüng phung sapyit tui awn k’be vai ah hmat ci gui ah pyen ne ning m’shang khai gui.

¹³ Cun kawn ah na m’thein gui vai cu, kei Bawipa naw shin ah khaw ung om ciah chang cu ami awktat güt sapyit tui awn ka k’be gui khai: Cun gui cu David Ghangpughang ah htangshon ghangpughang gui, taigü gui, prophet gui la Jerusalem chang gui ami van ah kyak ci.

¹⁴ Kei naw ngami a hmaw ang vai, hlüng gui ng’khawng ne ami pazat ah mäih ah ka ci gui khai. A i chi hna nak m’gein sei chimgein nak naw phi ngami ka ngawn nak gui cu kä m’düm sak hlawt khai.”

Chang ah Ng’shei nak kä a Om vai ah Jeremiah naw M’cäi gui ci

¹⁵ Israel chang gui, Bawipa naw ning pyen ah gui ci nei! M’lung neim nak awn ani cu ngai vä.

¹⁶ Ani naw khaw hmüp nak kä a law püi pha ung, Ngami m’htung khan ah ng’vawn ne kä nami ng’tän phaung ani naw hmüp khui nu ah kyak khai ah kä a m’hlah pha ung, Bawipa nami Khanpughi cu m’tam khah vä.

¹⁷ Nangmi naw kä nami ngaih ah a kyak ung nangmi chang ah nami ng’shei ah phäh ah adüm ah ka kyap khai; Kei cu ak tung ah ka kyap khai, ka ng’phlitui cu long khai, a i ah kyasei ci ung Bawipa ah chang gui pha ne ami hteh püi gui ah phäh ah kyak ci.

¹⁸ Bawipa naw na pyen nak ci, “Ghangpughang la anu cu m’thein goi vä, ami mang kiang ungka kyum law u sä, a i ah kyasei ci ung ngami ah kyom ciah lukhu cu ami lu ungka kya law pyi ci nei.

¹⁹ Judah khaw a htum täng gaw nu gui cu ami khaai pyi nei; ngami ah a u kä hteit hlawt ci nei. Judah chang gui ami van cu omk’tu ah ami hteh püi gui nei.”

²⁰ Jerusalem, teng ä! Na ga gui cu a siiptäng ah ka lawk ci gui nei! Na teng khen vai ah ning ap ah chang gui, nang naw na khäh ghah nak ah chang gui cu a hawi ang?

²¹ Nang naw na teihpüi ah na ngaih ah chang gui naw ning tu u ne ami ning uk ah a kyak ung a i ah na pyen khai aw? Nang cu the lawk khai ah hnumi ah m’neh ah mäih ah na m’neh khai nei.

²² Shin gui avan a i ah kyasei a kyak law cine, nami ng’shi ah a kyak ung — a i ah kyasei nami sui kheei sei sui she nami sui ang ma cun cu nami katnak cu kyih aih vai ah a kyak ah phäh ah kyak ci.

²³ Asa le naw avun cu ng’thawng sak hning ne ang? Kawng hta naw a git ng’plon sak hning ne ang? Cun gui ami kyak hning ah a kyak ung akshe gui cu angdüng ah kya thei khai gui nei.

²⁴ Khong gau khokhi naw ko a zon ah mäih ah Bawipa naw ning püi pawng sak gui khai nei.

²⁵ Cun cu nami ma nak ah kyak ci, cine ani naw pyan ci nei. Shin cu nangmi ah khan ah abi vai ah ani naw akbäi ah kyak ci, a i ah kyasei ci ung nangmi naw ani cu m’hnih u ne, Khanpughi she gui nami khawihnah ah phäh ah kyak ci.

²⁶ Bawipa amät naw nami sui ning suh sak gui ne, ning lung aa sak gui khai.

²⁷ Ani naw a thüi nak gui nangmi naw nami bi cu ning hmu gui ci nangmi cu a im pei ah ami chu ng’ya hlüt ciah pami ah mäih, ng’sein ca naw seng aläk ah mäih ah khogui ma la lolai ung khogam khanpughi gui nami läk cu ani naw ning hmu gui ci. Jerusalem chang gui, nami ng’ziin ci nei, a i yah ung nami theingthap lawk khai ang?