JEREMIAH 11 - Cho Bible Common Language 2016

Jeremiah La Thukhän

¹ Bawipa naw na pyen nak ci,

² “Thukhän ah amawng gui cu ngai ä. Judah la Jerusalem chang gui cu m’thein gui ä.

³ Cun ung kei, Bawipa, Israel Khanpughi naw thukhän ah a mawng kä ngai ciah chang nü ah khan ah plah tam nak cu ka taik khai nei.

⁴ Cun ah thukhän cu cun ah khaw cu ngami ah phäh ah mei cang ah mäih ah mäih ah kyak ci. Egypt khaw ungka ka law püi ba gui yah ung ami pupa gui am ka pek gui thumkhän ah kyak ci. Kei ami na ngaih vai la kei ah ka thumkhän nü ami bi vai ah kei naw ka m’thein gui ci. Ka m’thein gui ci, kei amo na ngaih ah a kyak ung ngami cu kei ah chang ah kyak khai gui, kei cu ngami ah Khanpughi ah ka kyak khai.

⁵ Kei naw ami pupa gui awn shaitak ka bi cu kei naw ka paang khai, cun cu thuhbäi ami om nak ah bühmang ne anglei nik ciah khaw ka peik gui vai ah kyak ci.” Kei naw, “Ä, BAWIPA” ka cik ci.

⁶ Bawipa naw na pyen nak ci, “Judah mang gaw gui la Jerusalem lam gui ung hteit vä. Ka ng’thu cu shä vä, thukhän ah mawng gui ami ngaih vai la ami läk vai ah m’thein gui vä.

⁷ Kei naw Egypt ah ka ami pupa gui ka law püi ba gui sangung kei naw ami na ngaih vai ah akni ah m’cäi gui ne, kei naw acun ah hnüüp güt ung chang gui m’cäi gui ne ka k’paang gui ci.

⁸ Cun ung phi ngami naw kä ngai ci gui, kä läk ci gui. Cun nak vaisü ung chang nü cu ami m’lung ling ne shekha lä ne om ci gui. Kei naw thukhän ami k’paan vai ah ka ng’thumkhän gui ci, cun ung phi ngami naw mak ci gui. Cun ah kyasei cun ung ami guk ah m’kyuk nak avan cu ngami ah khan ah ka gawk sak ci.”

⁹ Cun kawn ah Bawipa naw na pyen nak ci, “Judah la Jerusalem chang gui naw kei cu na hnungtuk püi ci gui.

¹⁰ Ngami cu kei naw ka pyen maa nak ciah ami pupa gui ah katnak ung hteit ba ci gui; ngami naw ahei khanpughi gui cu khawihnah ci gui. Israel la Judah ami van naw ami pupa gui am kei naw ka peit ah thukhän cu m’shet ci gui nei.

¹¹ Cun ah kyasei thubäi, kei Bawipa naw thu ka k’bäi gui cu, kei naw di nak cu ami khan ah ka law püi khai, ngami cu kä phyawng khai gui. Ngami naw kei naw ka m’htei gui vai ah ami k’thäh ah a kyak ung kei naw kä ka ngai gui khai.

¹² Cun ung Judah la Jerusalem chang gui cu khawihnah ami douthak nak ah khanpughi gui ah hteit khai gui, ngami naw ami m’htei gui vai ah k’thäh khai gui. Cun ung phi shin ah dishum nak a gawk law ung cun ah khanpughi gui naw kä hun hning khai gui.

¹³ Judah chang gui ung ami mang gaw gui chü, ami khanpughi gui lawk ci, Jerusalem ung om ci gui naw, mang gaw ung ami lam gui chü ah shemshai ciah Baala Khanpughi ami khawihnah nak sonkiang gui cu pyan ci gui.

¹⁴ Jeremiah, shin ah chang gui ah ami chaw ah kei ah kä na tai gü en vai, kä na yoih thäh en vai. Ngami cu khüikha nak ung gawk ne, m’htei gui vai ah ami na khü law ah a kyak ung kei naw kä ka ngai gui khai nei.”

¹⁵ Bawipa naw pyen ci, “Kei naw ka m’hni ah chang gui naw akshekha cu bik ci gui nei. Kei ah Taigüim ung ngami ami Om nak hning vai ngami ung a i om khai aw? Ngami naw shaitak nak la seime awn khawihnah douthak nak awn leigai cu shung shet hlawt vai ah ngai u ne ang? A cun naw zeikia sak gui khai ang?

¹⁶ Kei naw ngami cu a hnah khlum ne akiom ah amtheih awn be ciah Olive sing ah ka khü gui man cu, cun ung phi tuh bäi, khaw hmum kyeek ah mäih ah a hnah gui cu mei awn m’khih ne, ang ban gui cu ka cheiuh khai.

¹⁷ “Kei, m’gäi ciah Bawipa naw,” Israel la Judah cu ka geit kaw gui khai; cun ung phi tuhbäi ami khan ah lei gai ka gawk sak khai. Ngami naw shin cu ami mät naw ami mät ah khan ah ami gawk sak ah kyak ci, a i ah kyasei ci ung ngami douthak nak awn kei cu na m’lungshe sak ci gui.

Jeremiah ngawn vai ah Akshe ah Tängpang nak

¹⁸ Kei ka ga gui naw na ngawn phak khai gui ah ami pawng htein cu Bawipa naw na m’shüm thein ci.

¹⁹ Kei cu ngawn vai ami hteh püi ah htome hta ah mäih ah ngaih gep nak om ci, ngami naw kei na hnungtuk püi ne akshe gui bi vai ami pawng püi cu kei naw kä ka hmat ci. Ngami naw pyen ci gui, “Sing ghing cu a gai sangung mi chuk khai nei; ani cu mi ngawn khai nei, cun ung ani cu a u naw phi kä shüm ba khai.”

²⁰ Cun kawn ah kei ah taigü ci, “m’gäi ciah Bawipa, nang ci taga ciah suki ah na kyak ci; nang naw chang gui ah ngaih-tüh la ami m’lung ngaih gui cu na m’nüm ci. Kei ah ka mawngma gui cu nang ah kut ung ka tha ci nei; cun ah kyasei shin ah chang gui ah khan ah phu na tuk cu na hmuh sak ä.”

²¹ Anathoth chang gui naw kei cu na ngawn hlük ci gui, kei naw Bawipa ah ng’thu k’pang ne ka ng’shäu ah a kyak ung, na ngawn khai gui ah pyen ci gui.

²² Cun ah kyasei m’gäi ciah Bawipa naw pyen ci, “kei naw ka m’kyuk gui khai nei. Ami hta nau gui cu ei ah cawi ne sik khai gui.

²³ Anathoth chang gui ah khan ah leigai ka law püi nak vai ah a khin cu kei naw ka k’bäi pyi ci nei, cun ah khin a gawk law ung ngami ung ka a u kä k’pawih khai nei.