JEREMIAH 10 - Cho Bible Common Language 2016

Agup Khawihnah La Khawihnah Akcang

¹ Israel chang gui, nangmi ah phäh ah Bawipa ah ng’thu cu

² Ngai vä. Ani naw pyen ci, “Ahei pakhui gui ah lam cu kä nami läk vai; kä hmuh man gui khomikung dang sei, ahei pakhui gui ami kyihkyawk ung phi, cun naw nangmi kä ning tüihtok en gui sä.

³ Shin ah chang gui ah yum nak cu akholä ah kyak ci. Bung hmu ah sing chuk ci gui; Cun cu sung aat ci naw m’shük awn aat ne pyang ci,

⁴ Cun kawn ah ngui la ghui awn cüiche ci. Cun cu kä a yung kiak vü vai ah m’si awn khen ne ami pyan ah kyak ci.

⁵ Cun ah a gup gui cu pacüh lo ung biit hta m’kyih nak ah mäih ah kyak ci gui; kä ng’thu thei ci gui; Ngami cu kawh chan gui vai ah kyak ci gui, a i ah kyasei ci ung ngami cu kä hteit hton hlawt ci gui. Kä nami kyih gui vai; ngami naw akna ah kä ning bi hlawt khai gui, akni phi kä ning bi pe hlawt khai gui.”

⁶ Bawipa, nang ah mäih a u phi kä om ci; nang cu na m’gäi ci, nang ah ming cu dämduh ne huham mah ci.

⁷ A u naw kä ning m’tamkhah ne om hlawt khai aw, pakhui avan ah ghangpughang aw? Nang cu m’tamkhah vai ah na khinkha ci nei. Chang pakhui gui, cüivai ci gui avan ung phi kia, ami ghangpughang gui ung phi kia, nang ah mäih tumat phi kä om ci nei.

⁸ Ngami ami van cu awng ang gu k’taak ci gui nei. Sing ami pyan ah agup gui ung ami ng’thei thang vai a i om khai ang?

⁹ Ngami ah a gup gui cu spain ah ka ngui, Uphaz ah ka ghui gui awn vook ne, cuiche saya gui naw avan ami pyan nei. Cun gui cu shuntah thei ci gui ah tah ah, sui amvon la amkim gui ami m’sui gui nei.

¹⁰ Cun ung phi nang, Bawipa, cu Khanpughi akcang nei, nang cu ghing ciah Khanpughi, angtäi ghing ciah ghangpughang nei. Nang na m’lungshe ung khomdek cu thüng ci, nang ah m’lungshe cu changpakhui gui naw kä näng ci gui.

¹¹ (Nangmi chang gui naw nami m’thein gui vai cu khomdek la khankho mik tui pyang ciah kä kyak ciah khanpughi gui cu m’di vai nei. Ngami cu khomdek khan ung ahawi ah phi kä om tuba khai gui.)

Khanpughi M’hlümtai nak ah Ng’Äi

¹² Bawipa naw khomdek cu a huham awn pyang ci; A cüvai nak awn khonglei cu tüisho ne khankho cu ng’phiah sak ci.

¹³ Ani ah ang thukhän awn khankho ah akhan ung tui cu gai ne; ani naw khocawi ah ka khongmei gui cu law püi ci. Ani naw khaw k’aa ung khaw lailäp sak ne, akhei ung ka khokhi cu tüi lawk ci.

¹⁴ Ashin ami hmuh nak awn chang gui cu awng aang u ne, a i kä hmat ci gui; agup gui pyang ci gui naw kä ng’ya hlü ba ci gui, a i ah kyasei ci ung ami pyan ah khanpughi gui cu kä bä ci la kä ghing ciah a kyak ah phäh ah kyak ci.

¹⁵ Ngami cu a kholä ah kyak ci gui, päiphi vai ah kyak ci gui; Bawipa naw ngami cu m’kyuk gui khai ah a law ung, ngami cu m’di gui khai.

¹⁶ Jakob ah Khanpughi cu cun gui ah mäih ah kä kyak ci; ani cu apäng tüipyang ciah tumat nei, ani naw Israel gui cu amät ah chang tu k’cang ah ghü gui ci, m’gäi ciah Bawipa cu ani ah ming nei.

Lawk khai ah K’tämnak

¹⁷ Jerusalem chang gui, nangmi cu ning khaai gui ci gui nei! Nami khawh gui avan m’cut vä.

¹⁸ Bawipa naw shin ah kaw ungka ning k’täm law gui khai nei. Nangmi ungka tumat phi kä k’pawih khai ah ani naw ning deng gui khai nei. Bawipa ah thu pyen ah kyak ci nei.

¹⁹ Jerusalem chang gui cu kyap m’lau u ne, “mikmi naw a i hlawk ah shek khai ah mi m’neh awh ci ang! Mi hmaleim cu kä khan khai nei. Shin cu mi näng khai ah mikmi naw mi ngani te ci nei!

²⁰ Mi k’pyu gui cu she yawp ci nei; k’pawn nak ah gui gui phi pit ci nei. Mi htanau gui cu hteit yawp ci gui; mi phung gui co ba khai a u kä k’pawih ba ci nei; yih dung gui bat ba khai phi a u kä om ba ci nei.”

²¹ Kei naw ka m’hlan ci, “mi ng’vai hta gui cu gu aang ci gui; ngami naw Bawipa naw lam ana m’shüm gui vai ah kä k’thäh ci gui. Acun cu ngami ah ami shum nak ah kyak ci, cun ah kya ne mi chang gui cu püi pyang ci gui.

²² Ngai vä! Ng’thu gawk lawk ci nei! A siip täng pakhui ung dämduh ciah ng’küknet nak ah kyak ci nei; Ani ah gakap gui naw Judah mang gaw gui cu sa-ui gui ah om nak ah hmun khaw ng’gau ah kyak sak khai gui nei.”

²³ Bawipa, a u naw amät ah mawng lam kä m’khüt ciah ka hmat ci nei; a u naw phi amät ah ghin nak cu kä k’pang hning ci nei.

²⁴ Bawipa, na chang gui ng’düng sak gui ä; Cun ung phi keimi ah khan ah kä nuipai aih sä, na m’lungshe yah ung kä na m’kyuk en gui ä, cun cu keimi ah ng’pyi nak ah kyak khai nei.

²⁵ Nang kä ning khawihnah ci gui ah pakhui gui la nang ning hnu nak ciah chang gui ah khan ah na m’lungshe nak cu ng’hlah sak ä. Ngami naw na chang gui ngawn ci gui; Ngami naw keimi cu akbe ah na m’di gui ci gui, Kami ah khaw cu m’di shüt ci gui nei.