JEREMIAH 1 - Cho Bible Common Language 2016

Jeremiah

¹ Shin ah ca-uk cu Hilkiah ah hta Jeremiah ah thu pyen guk ah kyak ci, ani cu Benjamin khopäng, Anathoth gawnu ung taigü tumat ah kyak ci.

² Amon ah hta Josiah, Judah ghangpughang ah a kyak nak, akum gha lei thum nak ung Bawipa naw Jeremiah am ng’thu pyen ci.

³ Cun kawn ah Josiah ah hta Jehoiakim ghangpughang ah a kyak yah ung ani cu ng’thu püi bamä ci. Cun kawn ah Bawipa naw ani cu akda vei ng’thu püi ci, Cun cu Josiah ah hta Zedekiak a uk nak akum gha lei ät güt ung ah kyak ci. Acun ah khokum a cha hma nak ung Jerusalem chang gui cu omktu ah hteh püi gui ci gui.

Jeremiah Akhü nak

⁴ Bawipa naw kei na pyen nak ci,

⁵ “nang am ghin nak kä ka ning pek pha ung kei naw ka ning ghü ci. Nang kä na ng’tüi pha ung changpakhui gui ah prophet ah kei naw ka ning ghü ci.”

⁶ Kei naw ka m’shang ci, “Uk ciah Bawipa kei ka hmaw aih ci, a i hawkcha cha ka ng’htau vai kä ka hmat ci.”

⁷ Cun ung phi Bawipa naw kei cu na pyen nak ci, “Nang na hmaw aih ciah kä pyen ä, kei naw ka ning tüih nak ah chang gui ah hteit ne, nang naw na pyen vai ah kei naw ka ning thum khän cu m’thein gui ä.

⁸ Nang naw kä na kyih en gui vai, kei naw nang ning om püi ne ka ning shung vong khai, kei Bawipa naw ka pyen ci.”

⁹ Cun kawn ah Bawipa naw a kut shäng ne, ka m’nei cu pyen vai ah ng’thu gui cu kei naw ka ning pek ci nei.

¹⁰ Tuhngawi kei naw nang am changpakhui gui la uk nak kho gui cu angzung ah mawi ne, phu ne, m’di ne ghawt ne, cokyang ne geitkaw ne kyak ah huham cu ka ning pek ci nei.

Müimang Hnih

¹¹ Bawipa naw na ng’shik ci, “Jeremiah, a i ang na hmuh?” Kei naw m’shang ne, “Amon sing ban ka hmuk ci nei” ka cik ci.

¹² Bawipa naw, “nang na hman ci nei, kei cu ka ng’thu gui abä ah ka hmuk khai ah ka ngäng ci nei” cik ci.

¹³ Bawipa naw na pyen ah bamä ci, “A i ang na hmuh ba mä” cine na ng’shik ci. Kei naw m’hlam ba ne, “A siip täng ah ng’kiak ciah k’am cu kei naw ka hmuk ci, cun cu shi täng ah ng’keing ne ng’lat law hlük ci.”

¹⁴ Ani naw na pyen ma ne, “A siip täng ah ka dishum nak cu shin ah khaw ung om ciah avan ah khan ah gawk lawk khai nei,

¹⁵ a i ah kya seici ung a siiptäng ah ka changpakhui avan cu kei naw ka khü gui ci. Ami ghangpughang gui naw ami mang-kiang gui cu Jerusalem m’kawt gui la angveing paang gui, la a cun ah mäh ah ahei Judah mang gaw gui angveing gui ung cokyang ci gui.

¹⁶ Kei naw ka chang gui cu ka m’kyuk gui khai, a i ah kyasei ci ung ngami cu hma kak ci gui: ngami naw kei na nawng ci gui, ahei Khanpughi am khawihnah douthak ci gui, agup gui pyang ne khawihnah ci gui.

¹⁷ Jeremiah, pawng ge ne omä; kei naw na pyen vai ah ka ning thumkhän avan cu hteit ne m’theun gui ä. Tuhbäi ngami kä kyih en gui ä, na kyih gui ah a kyak ung, ngami awn na om sang ang na kyi law pi khai ah kä ning pyang khai.

^18-19 “Ngai ä, Jeremiah! Shin ah khaw chang nü, bawi gui, taigü gui la chang gui-naw ning hnungtuk khai gui nei. Cunung phi cun gui na m’khät nak vai ah k’thagui cu tuhngawi kei naw ka ning pek ci; nang cu khäng sei k’paang ah mäh ah na kyak khai. Ngami naw nang kä ning hmim hlawt khai gui, kei naw nang ning ompüi ne, ka ning shungvong khai. Kei, Bawipa naw ka pyen ci.