JAMES 4 - Cho Bible Common Language 2016

M’dekkhan awn Khawtsheng Nak

¹ Nangmi ung ng’tuk ah nak la ng’vookshan nak cu a hawi ah kaa gawk lawk ci ang? Cun gui cu nami m’lung kyong ung phu ne ng’kiah ciah lünlawi nak vai, ng’yak nak hlü aih ungka lawk ci nei.

² Nangmi cu nami ng’yak hlü phung kä gah hlawt u netah chang nami ngawn ge khai ah nami pawng ci. Nami ng’yak hlü aih cu kä nami gah law ah a kyak ung ng’tuk nami ghüh ci, ng’vook nami lup ci. Nami ng’yak hlü kä nami gah ah mawng cu, Khanpughi ah kä nami ng’yoih ah hmawk ah kyak ci.

³ Nami ng’yoih ung phi kä nami gah ah mawng cu, akshe ah nami ng’bü nak la nami mät ah hlimtui nak vai düt ah nami mang nak hlü ah hmawk ah kyak ci.

⁴ Kä bekhüt ciah chang gui! Khomdek ng’yak hlü ah teihpüi cu, Khanpughi ah gaa ah kyak ci nei, ci cu kä nami hmat ci maa?

⁵ “Khanpughi naw mikmi ah kyong ah a thunthan ah mümcha cu, kyihkyawk vai ah ng’yak nak hlü awn be ci nei,” ciah cacim ung om cicu kä bä khai ah kä nami ngaih en vai nei.

⁶ Cun ung phi Khanpughi ah na peit gui ah chimgein nak cu khüighaat ba pi ci nei. Cacim theing naw, “Khanpughi naw chang ah ng’shei ci gui cu hnu nah gui ne, m’lung neim sak ci gui cu, chimgein nak pe gui ci nei,” ciah a pyein ah bä nak ah kyak ci.

⁷ Cun ah kyasei Khanpughi ah ng’yak hlü cu läk ne khoshe cu nami k’täm vai nei, cun ung nangmi ungka dawng khai nei.

⁸ Khanpughi ah pei ah nami law vai, cun ung nangmi ah pei ah Khanpughi lawk khai. Cheishoh ciah chang gui! Nami kut m’si vä. Thuvi ciah chang gui nami m’lung theing sak vä!

⁹ Thüisei vä, kyap m’lau vä; nami gaih nak cu, kyah nak ah ng’lat sak vä! Nami yei nak cu thüi nak ah ng’lat sak vä!

¹⁰ Bawipa ah ma ah nami m’lung neim sak vä, cun ung ning m’hlüngtai gui khai nei.

Khritha Phäinau Käm Khoichaa Vai ah Khän ne M’cäi Nak

¹¹ Phäinau gui aw, tumat la tumat kä ng’täitawk tu vä. A khritha phäinau täitawk ne m’khoichak ciah chang cu, thukhän täitawk ne m’khoichak ciah kyak ci nei. Thukhän nami m’khoichaa ah a kyak ung nangmi cu thukhän läk ciah kä kya ne, m’khoichak ciah nami kyak khai.

¹² Khanpughi tumat bäng cu thukhän pek ci la m’khoichak ciah kyak ci nei. Ani bäng naw vah hun hning ci, m’di hning ci. Nang cu a u chang ah kya ne, nak chang paw cu nam khoichaa tu ang?

Kä Khähghah Vai ah Khän ne M’cäi Nak

¹³ Tuhbäi na ngai vä, “Tuhngawi baw, ngawi ung baw, mang gaw tumat ah hteit ne, kho kum ät kami om khai. A cu ah sumlei ne ngui akda kami gah khai,” cine, nangmi amshah naw nami pyein ci.

¹⁴ Nami ghin nak ngawi ung a i ah a kyak vai ah kä nami hmat ci! Nangmi cu a shäng hta thawk ne khu netah maih ba ciah meikhu awn nami täng ci.

¹⁵ Nangmi naw nami pyein vai cu, “Khanpughi naw ang yak hlü ah a kyak ung keimi cu ghing ne, kami bilo hnüntho,” ciah kyak ci.

¹⁶ Cun ung phi nangmi tuhbäi chang ah ng’shei ne nami khähghah ci, cun ah khähgha nak phung cu cheishoh nak ah kyak ci.

¹⁷ Cun ah kyasei akni hmat lang ne kä bik ciah chang cu, shetkat nak bik ciah kyak ci.