JAMES 2 - Cho Bible Common Language 2016

Hmai Kä m’Hlah Vaiah Khäntam Nak

¹ Phäi nau gui aw, nangmi cu Bämang ciah Bawipa Jesuh Khrit cu nami yum ciah kyasei, chang ah yodäm pyam mang teng ne kä nami om ih vai nei.

² A vaisü ah nami ng’bum nak ung, bühmang ciah chang tumat cu ghui shawi awi ne sui k’ni sui ne law tuk khai; pyamtham ciah chang tumat cu, sui she sui ne law tuk khai;

³ Nangmi naw sui k’ni sui ne lawk cicu chang m’sui u ne, ngoh nak nami nam hnawn khai; sui she sui ne lawk cicu “A cän ung düi ä, kä cun ung kami kho pei ah ngoh law ä,” cine nami kiak nak ung,

⁴ nangmi cu chang khinkhawn ne, akshe nami m’lung ngai ciah kä kiak khai aw!

⁵ Ngai vä phäi nau gui aw! Khanpughi naw ani m’hni ci gui ah khan ah a shaitaak ah mäih ah, yum nak ung bühmang vai la Khanpughi ah uknak kho khäm vai ah, pyamtham ci gui cu, ghü gui ci nei.

⁶ Cun ung phi nangmi naw pyamtham cicu chang ah kä nami ngai ci, bühmang ci gui naw nangmi cu ning yoshe na gui u ne, yung ah m’kawt mang ah khlaak ung ning hteh püi gui ciah kä kya ne ang?

⁷ Ngahmi cu nangmi naw nami dou ah ming k’ni cu sawngkhei ci gui nei.

⁸ Khanpughi ah uknak ah thukhän cu nami läk ciah a kyak ung düng cicu nami bi vai nei: Cun ah thukhän cacim ung om ci cu; “Na chang paw cu na mät awn m’täng ne nam hni vai nei,” ciah kiak ci.

⁹ Cun ung phi chang ah yodäm düt nami teng ah a kyak ung, cheishoh nak nami bik ci kya ne, thukhän nami m’shet ah phäh ah m’khoichaa nak nami gah khai nei.

¹⁰ Thukhän tumat m’shet ciah chang cu thukhän avan m’shet ciah kiak ci nei.

¹¹ “Chang ah chu hta kä kat püi vai,” ciah thukhän cu pe ne, “Chang kä ngawn vai,” ciah thukhän phi a peit ah kyak ci. Chang ah chu hta kä nami kat püi ung phi, chang nami ngawn ah a kiak ung, thukhän nami m’shet ciah kyak ci.

¹² Cun ah kyasei phiawn nak ah thukhän awn, m’khoichaa nak gah khai gui ah, chang gui ah mäih ah, nami om ih vai nei.

¹³ Chimgein nak kä om te ciah chang ah khan ah, Khanpughi naw m’khoichaa nak abi hnüüp ung, chimgein nak kä m’dang khai nei, Cun ung phi m’khoichaa nak ah khan ah chimgein nak ah m’khütnäng nak om ci nei.

Yumnak La Hnünthawh Nak

¹⁴ Chang tumat cu ka yum ci nei, cine thu akni ah a pyein ung phi a hnünthawh nak ung kä ang dang ung, bä tuk khai ang? Cun ah yum nak naw ani hun hning khai ang?

¹⁵ Sui vai, ei vai kä om ciah phäi hta, pai hta gui cu;

¹⁶ “Khanpughi ning m’shumphyuk gui sä, awh ci sui ne, phü ne ei vä,” cine akni ah thu püi gui düt ne, a i kä peit taak gui ung, bä khai ang?

¹⁷ Zum nak cun phi acun ah mäih kyak ci, hnünthawh bilawh nak ung kä dang ciah yum nak cu ak si ah kyak ci.

¹⁸ Cun ung phi chang tumat mat naw, “Chang tumat ung yum nak om ci, ahei tumat ung hnünthawh nak om ci,” cine, a kyak law ung, Kei naw “Hnünthawh nak kä om ciah yum nak cu nam hnuh vä, kei naw ka hnünthawh nak awn ka yum nak cu ka ning m’hnuh gui khai nei,” cine ka pyein khai.

¹⁹ Khanpughi tumat bäng om ciah nami yum ci, bä ci! Khoshe gui naw phi acun ah yum ne, kyi ne ng’khlet ci gui.

²⁰ Chang k’aang aw! Hnünthawh nak kä om ciah yum nak cu akholä ah a kyak ah mawng na hmat hlük ci ang?

²¹ Mi pughi Abraham naw Khanpughi ung düng nak cu a i hawkchaa ah ang a gah tu? Ani naw a htapa Isaak cu kiang ung taih ne a khawihnah nak ah, a hnünthawh nak awn ah kyak ci nei.

²² A yum nak la a hnünthawh nak ang cawih cu kä nami hmuhmat ci maa? A hnünthawh nak naw a yum nak cu kümbe sak ci nei.

²³ “Abraham cu Khanpughi yum ci, ayum nak awn ani cu, Khanpughi naw chang düng ah k’bääi ci,” ciah cacim lawk cicu akcang ah kiak ci. Cun ah kyasei Abraham cu Khanpughi ah teihpüi ah khü ci gui.

²⁴ Chang cu ayum nak bäng awn ah kä kyak ci, a hnünthawh nak awn, Khanpughi ung düng nak a gah cu nami hmat ci nei.

²⁵ Acun ah mäih ah hlawhlaang ciah Rahab ah mawng cu kyak ci. Ani naw Israel chang sübük ci gui cu, dou gui netah phyawng ne alam hei ung ami hteh ba vai ah m’thei gui ci. Cun ah a hnünthawh nak awn ani cu Khanpughi ung düng nak gah ci.

²⁶ Cun ah kyasei, mümcha kä om ciah pumsa cu ak si ah a kyak ah mäih ah, hnünthawh nak kä om ciah yum nak cu aksi ah kyak ci.