JAMES 1 - Cho Bible Common Language 2016

¹ Kei James, Khanpughi la Bawipa Jesuh Khrit ah changshäm naw, khomdek khan avan ung om ci gui ah Khanpughi ah chang gui-am, yeikyai nak thu ka ning m’khäh gui ci nei.

Yumnak la Cüivai nak

² Ka phäi nau gui aw, nami lam ung tüihtok nak a hlü hlü a gawk law ung, yeikyai nak vai nei, ciah nami yum vai.

³ Cun ah mäih tüihtok nak cu yum nak awn m’khüt näng kawn ah khüighaat ne thamah nak cu dang lawk ci, cicu nami hmat ci nei.

⁴ Nami khüighaat nak naw, yu kyak nak kä om khai ah, ning chaang gui sei, ng’laklo nak kä om ne, nangmi cu küm nak la be nak awn nami om khai nei.

⁵ Nangmi ung chang tumat mat cu cüivai nak ang laklo ah a kyak ung Khanpughi ah taigü sä, Khanpughi naw cüivai nak pek khai nei: a i ah kyasei ci ung, Khanpughi naw ng’khai ne pek ci, chang van-am ng’khai ne pek ci.

⁶ Cun ung phi nami taigü ung yum nak awn ngaih kä pai ne nami taigü vai. Ang ngaih pai cicu kho naw khi sei ng’hnawk ciah tui hnawk ah mäih ah kyak ci.

^7-8 Cun ah mäih ah chang cu, am lung pai ci, a i kä phupit kaiyawih thei ciah changah kya ne Bawipa ah ang yoih cu gah khai ah kä ang ngaih en vai nei.

Pyamtham Nak la Bühmang Nak

⁹ Pyamtham ciah khritha tumat cu Khanpughi naw a yu chaan tu ah a kyak ung yeikyai sä,

¹⁰ bühmang ciah khritha tumat cu Khanpughi naw a yuk neim sak ung yei kiai sä. Bühmang ci gui cu cheipai ah mäih ah thuum ne ng’kawn khai gui nei.

¹¹ Hni liing naw aghing cu chawng sak ne, apai cu kiawi sak ci, cun ah kyasei akiom nak cu dimaih ci. Acun ah mäih ah bühmang ciah chang cu, amät ah bi abi yah chung ung dimaih nak om khai nei.

M’nüm Nak La Tüihtok Nak

¹² Tüihtok nak om pang sei phi bekhüt ciah chang cu, yeikyai nak om ci, a i ah kyasei ci ung cun ah mäih m’nüm nak näng ciah chang cu Khanpughi naw, m’hni ciah chang ah khan ah a shaitaak ah, ghin nak ah m’cümhnah cu gah khai nei.

¹³ Chang tumat cu, cun ah mäih tüihtok nak a aut law ah a kyak ung, “Khanpughi ah tüihtok nak nei,” cine kä a pyein-en vai. Akshe naw Khanpughi cu kä tüihtok hlawt ci, Khanpughi amät phi a u kä tüihtok ci.

¹⁴ Cun ung phi chang tumat tüihtok nak a gah nak cu, amät ah shekak ciah ang yak hlü nak lam ah a läk nak ah kyak ci.

¹⁵ Cun ah shekak ciah ng’yak hlü nak cu tüisho law ne cheishoh nak cun phi däm ng’vai law ne, sih nak ah hta lawk ci.

¹⁶ Ka phäi nau gui aw, kä nami ng’laklo-en vai nei!

¹⁷ Nikiom ciah m’shumphyuk nak la kümbe ciah m’cümhnah nak cu, khankho ah kaa lawk ci; Cun cu käng khukhlat ci, hmüp nak kä law püi ci, khankho dei tüisho ciah Khanpughi ungka lawk cia kyak ci.

¹⁸ Khanpughi naw amät ah ng’yak hlü ah, ang thudüng awn chang ghing ah nang dang sak gui ci, cun ah kyasei mikmi cu a tüisho gui nüng ung ak bä pi ah mi kyak ci.

Ngaihyak Nak La Bilawh Nak

¹⁹ Phäi nau gui aw! Nami shüm ba vai cu, ngaihyak nak ung nami yangkhai vai nei, ng’pyeinsak nak la m’lung she nak läi ung, nami shokshü vai nei.

²⁰ Chang ah m’lung she nak naw, Khanpughi ah düng nak kä m’düng thei ci.

²¹ Cun ah kyasei, kä nik ciah om ih la shekak ciah hnünthawh nak cu nami ng’cim sak vai nei. Khanpughi cu dou ne, Khanpughi naw nami m’lung kyong ah a geit ah thu cu nami kutshum vai, acun naw nangmi cu ning hun gui hning ci.

²² Thucim nami ngaihyak nak tu düt awn kä nami hleeihlak-en vai nei; cun ah thu cu akcang ah nami mang thei vai nei.

²³ Thucim cu ngaiyak tu netah akcang ah dang khai ah kä mang ciah chang cu, hman ung a müi teng netah, a müi bäbä hmuk ciah chang awn täng ci.

²⁴ Hman a teng yah ung amüi kyom ciah ngai ci, cun ung phi, a hei ah a hteh ba kawn ah amüi cu kä shüm ba ci.

²⁵ Cun ung phi chang gui phiawn sak gui ne, kümbe ciah thukhän cu tengkhen ne ngaiyak ciah chang cu, ngai tu netah m’hnih ba düt ciah kä kya ne, akcang ah mang thei ciah kiasei; cun ah chang cu a bilawh nak päng ung Khanpughi naw m’shumphyuk khai nei.

²⁶ Chang tumat cu amät naw amät ayum nak om ciah a pyein ung phi, am gawng kä ah khäm ah a kyak ung, ayum nak cu akholä ah kya ne, amät naw amät m’hleei ciah kyak ci.

²⁷ Pa Khanpughi ah ma ah theing ne ciim ciah ayum nak om ciah chang cu; geinvai ciah hmeihta nausen gui la hmeinu gui cu, m’theithang ne, m’dekhan shetkat nak gui phiawn nak vai ah, a htingling ah om ciah chang ah kyak ci.