Biblia Todo Logo
Bib sou entènèt

- Piblisite -

ISAIAH 8 - Cho Bible Common Language 2016


Isaiah ah Hta cu Chang gui ah Hmawk ah M’hnüt nak ah Kyak ci.

1 Bawipa naw ana pyen nak cu, “ca guk nak vaiah ang kawmnu la neta, a cun ah khan ah ca ng’lung ang kawm gui awn na guk vai cu: ‘Ak yaang ah gutä, ang ghit ah gutä!

2 Ngaih gep vai ah chang hnih taigü Uriah la Jeberechiah ah hta zechariah cu saksi bik khai goi ah na khü goi vai.”

3 Api shou hta khäta kakchu cu käu mah lawk ci. Kami hta ang tüi law ung, Bawipa naw ana pyen nak cu “Aming cu ‘Akzaang ah gut-ang ghit ah gut’ ah nami sui vai.”

4 Ak hmaw cu “Nunu papa ah kä ang khü pha ung, Damaskas ung khawh gui avan la Samaria ung ami guh-gui avan cu Assiria ghangpughang naw hteh pui yawp khai nei” cikci. Assiria Ghangpughang lawk ci.”

5 Bawipa naw nap yen ah bamä ci.

6 Ani naw, “Chang gui naw dinggei ne long ciah shiloah tui lawng cu hnungtuk püi u ne, Ghangpughang Rezin la ghangpughang pekah ah ma ah ami ng’hlet ah hmawk ah,

7 kei, Bawipa naw, Assiria ghangpughang la a gakap avan cu Judah tuk khai ah ka law püi gui khai. Ngami cu tuikam avan ung ng’güt ne lawk ciah Euphratis tuinu ah mäih ah gawk kawk khai gui.

8 Ngami naw Judah khaw avan cu kui ne küm u ne, phleing ung khüt sei k’plüm ne apäng avan küm khai gui” cik ci. Khanpughi naw na om püi gui ci! Ak phyaat ah ang phya naw mi khaw cu shungvong ci.

9 Nangmi chang pakhui gui, kyi kyawk ne ng’bum law vä! Asho nak ah khaw ung ka gui, ngai vä. Ng’tuk ge vai ah om vä, cun ung phi nami kyih vai nei! Ä, ng’tuk ge vai ah om vä, cun ung phi nami kyih vai nei!

10 Bi vai ah mawngma nami pyan vai! Cun ung phi cun gui cu kä näng hlawt khai. Nami m’hni chü ah nami ng’htau vai! Cun ung phi cun gui avan cu akholä ah kyak ci, a I ah kyasei ci ung khanpughi cu mikmi awn atäng ah om ci.


Bawipa naw Prophet Ng’thukbäi ci

11 Bawipa naw dämduh ciah a huham awn kei cu ng’thu nak bäi ne, chang gui naw ami läk ah lam cu kä ka

12 läk vai ah pyen ci. Ani naw, “Chang gui ah ngaih-tüh nak ung kä na ng’dawn en tu vai, ngami naw ami kyih kyawk gui cu kä na kyih en vai.

13 Nami shüm vai, kei, m’gäi ciah Bawipa cu, ka theingciim ci; Nangmi naw nami kyih vai cu kei tumat bang nei.

14 Kyihcat vai ah ka theingciim nak ah hmawk ah kei cu chang gui naw ng’vawn ne ami ng’täät nak ah lung awn ka tang ci; kei cu cun ah ka kyak ci, acun naw Judah la Israel uknak khaw ung chang gui la Jerusalem ung chang gui cu pha gui khai.

15 Chang akda cu ng’vawn khai gui; ng’tääk ne kyu u ne, ng’pyäuh khai gui. Ngami cu cun ung gawk khai gui.”


Aksi kä Ng’shica vai ah Ng’thukbäi nak

16 Nangmi, ka ning düihpüi gui naw khanpughi naw ana pek ah ng’thu gui cu ngäng ne nami m’htei vai.

17 Bawipa naw akchang gui ung ka, amät naw amät cu ng’thuh sak ci, cun ung phi kei naw ani ngaih u ne, ka ngaih u nak cu ani ung ka tha ci.

18 Shin ung kei cu Bawipa naw ana pek ah ak hmaw gui awn atäng ah ka om ci nei. M’gäi ciah Bawipa, Zien m’htung ung among kyang om ci naw, Israel chang gui am, ghing ciah thu.

19 Cun ung phi chang gui naw viik ne, sawbek ciah ng’cäbang ci la k’ce gui ah ng’thu nami k’thäh vaiah ning m’thein gui khai gui. Ngami naw, “Cun kawn ah chang gui naw mumcha gui ah ng’thu k’thäh hning ci gui, akghing nak vai sü aksi cu ng’shica hning ci gui” cik khai gui.

20 Nangmi naw nami shan gui rai cu, “Bawipa naw a ning m’theithang gui cu nami ngaih vai nei! K’ce gui cu kä nami ngaih gui vai-ngami ah ning m’thein gui naw käakni ah ning kyak sak gui khai.”


Yaica nak ah Akhin

21 Chang gui cu khaw ung ami m’lung thüi sei, ei cawi u ne ng’vaak khai gui. Ei ami cawi nak la ami m’lung ah shet nak awn, ami ghangpughang la ami khanpughi cu plah taam khai gui. Ngami naw khawmik cu k’dang khai guk.

22 Ngami naw m’dek teng khai gui, cun ung phi a i kä hmuk khai gui, yaica nak la mü hmüp nak bäng ah kyak khai, kyih kyawk vai ah mü hmüpnak cu.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite