ISAIAH 7 - Cho Bible Common Language 2016

Ghangpughang Ahaz ah Phäh ah Ng’thum’khäh

¹ Ghangpughang Ahaz, Jotham ah hta, Uzziah tu naw Judah khaw a uk yah ung ng’tuk nak om ci. Siria ghangpughang Rezin la Israel ghangpughang Remaliah ah hta pekah naw Jerusalem cu tuk ci goi, cun ung phi kä khäm hlawt ci gai.

² Siria gakap gui cu Israel khawpäng ung gawk law pyi ci gui nei, ciah ng’thu cu Judah ghangpughang ung gawk law khäta, ani la a chang gui ami van cu ang htei ah kyi u ne ta, khaw akhi ung sing ghing a hnün ah mäih ah ng’hlet ci gui.

³ Bawipa naw Isaiah am, “Na hta Shear Jashub cu hteh püi ne Ghangpughang Ahaz cu va hmu ä. Ani cu akhan tui büm ung ka tui laknak ah mawngah khütnak, tah tah ci gui ah bi nak ah lam ung na hmuk khai nei.

⁴ Ang nih nak vai, akcing ah a om vai. Kä a kyih kyawk vai, kä a m’lungso vai ah na m’thein vai nei. Ghangpughang Rezin la a Sirian chang gui la Ghangpughang Pekah ah m’lungshe nak cu ui ngän ngän ciah sing tawn hnih hlawk ah kyih vai ah kä kya ba ci nei.

⁵ Siria la Israel la a ghangpughang gui cu atäng ah m’zih vai tumat bik ci gui.

⁶ Ngami naw Judah khaw cu tu neta, chang gui cu ngami täng ah om khai gui ah m’kyih kyawk neta, Tabeel ah hta cu mang kyang ung hmoh vai ah ng’ge ci gui.

⁷ “Cun ung phi kei, Bawipa naw ka ng’shäu cu, shin cu

⁸ kä kya hlawt phung khai: A i ah kyasei ci ung Siria cu amät ah mang gaw tung ah kya ciah Damaskas ah kä khüi ghat pi ci, Damaskas cu Ghangpughang Rezin ah ta kä khüi ghat pi ci. Israel gui cu khokum chuk-kip lei hma ah kyong ung, aktä ah ng’phye ne ng’gäi u ne pakhui khaw tumat ah kä kya ba khai gui.

⁹ Israel cu Samaria, amät ah mang gaw tung ah ta kä khüi ghat tuba ci. Samaria cu Ghangpughang Pekah a hta kä khüi ghat tuba ci. “Nami yumnak kä a khäng htek ah akyak ung, nangmi kä nami khäing htek khai.”

Immanuel ah Mawng M’hnüt nak

¹⁰ Bawipa naw Ahaz am ng’thu a hei m’khäh ba ci:

¹¹ “Bawipa na khanpughi naw m’hnüt nak aning pek vai ah na k’thäh vai. Cun cu shi nak ah khaw ung zu thuk ciah phi kya hning ci, Khankhaw ah hang hlüng ci ung ka ah phi kya hning ci nei.”

¹² Ahaz naw m’shang ne, “Kei naw m’hnüt nak cu kä ka k’thäh khai. Bawipa m’nüm vai cu kei naw ka mak ci nei” cik ci.

¹³ Ani am Isaiah naw, “Ngai vä, tuhbäi, David ghangpughang ah hta ng’shon gui. Chang gui naw ami ning chum vai ah na kyak cu she aih ci nei — khanpughi naw phi aning chum vai ah na kyak khai ma?

¹⁴ Bä khai, Bawipa amät naw m’hnüt nak ning pek khai: hmumihta cu käu mah ne pamihta ah hta lawk khai, aming cu ‘Immanuel’ ah sui khai gui.

¹⁵ Amät naw a i phi m’hnüt bäi hning khai ah ang vai law sangung, chang gui naw sei suuk aw ne, khuitui ei khai gui.

¹⁶ Cun ah khin kä a gawk law pha ung phi, nangmi naw nami kyih ah ghangpughang goi ah ami khaw cu shekak khai nei.

¹⁷ Bawipa naw nang ah khan ah, na chang gui ah khan ah, mang im kyongchang van ah khan ah, Israel khaw, Jndah ung ka ang pai kawn ung gawk law man ciah sheka pi ciah yaica nak ah hnüüp cu law püi khai nei — ani naw Assiria ghangpughang cu law püi khai nei.

¹⁸ Cun ah khin a gawk law ung, Bawipa naw m’hnüt nak ah tum ne, Nile tuinu ah sho pik bäih ciah tuihta gui ung ka, Egypt chang gui cu k’pi gui ah mäih ah ami law vai la, Assirian gui cu ami khaw ung ka khoi gui ah mäih ah ami law vai ah k’bäi gui khai.

¹⁹ Ngami cu lung chawng kho ng’nawi gui, lung khui gui ung ng’phäi u ne, ng’hlingk’cam gui la khulim khaw gui nü küm khai gui.

²⁰ Cun ah khin a gawk law ung, Bawipa naw luk’teiu ciah kyak ciah Euphratis kan ne Assiria ghangpughang — cu ng’vat lawk khai! Ani naw nami m’khamu, nami lumu la nami pum ung mu avan cu ning teiu pe gui khai.

²¹ Cun ah khin a gawk law ung, lo bik ciah chang tumat ung pat hta tumat la me k’hnih bäng a om ba ung phi,

²² a cun gui naw ani ung hlü ciah suuktui phung avan pek khai gui nei. Ä, khaw ung api pawih ba ci gui naw ami ei vai ah suuktui la khoitui om khai nei.

²³ “Cun ah khin a gawk law ung, sapyit la akni gui ung phi agha ciah phung ghing ne ngui phya gha ci phu nak ciah sapyit gui cu ng’hling k’cam gui la ng’hling gui naw li shi khai gui.

²⁴ Chang gui cu a cung ung li la m’la kawt ne sa yüh ne hteit khai gui. Khawpäng avan cu ng’hling gui la ng’hling — k’cam gui awn be khai.

²⁵ Geit kaw nak man ah khaw-gui avan cu ng’hling gui naw li shi sei, a u phi cu ah kä hteit ba khai. Sei gui la htome gui ah lum nak ah hmun ah kyak khai.”