ISAIAH 64 - Cho Bible Common Language 2016

¹ A i ah kyasei nang naw khomik hmawng ne kä nakyum law ang? Khom’htung gui naw ning hmu u neta kyi ne n’gthüng khai gui nei.

² Ngami cu mei ng’ling ah khan ung ng’kiah ciah tui ah mäih ah ng’hlet khai gui nei. Na ga gui ah ma ah law ne na huham cu m’than law sak ä, chang pakhui gui cu nama ah ng’hlet sak gui ä!

³ A zan ung hnü ät nang cu law ne, keimi naw kä kami ngaih-tüh ah kyih kyawk gui vai na bik ci nei; Khom htung gui naw nang ning hmu u neta, kyi ne ng’thüng ci gui nei.

⁴ Nang ah mäih khanpughi cu a u naw kä ng’ya man ci, kä hmu man ci nei, ami ngaih u nak ani ung tha ci gui ah phäh ah shin ah mäih bik ci kä om man ci nei.

⁵ Hman ci bi neta yeikyai ciah chang gui, a i hawkcha ah ngami ami ghin vai ah na ng’yak hlü cu shüm ba ciah chang gui cu nang keimi ah khan ah na m’lung she ci, cun ung phi keimi cu kami hma lä ci nei; nang cu dämduh ciah m’lungshe ci sei phi eimi cu kami cheishoh lä ci nei, cau tün ne a cun ah kami kyak ci nei.

⁶ Keimi kami van cu kami hmakak ci nei, keimi ah akni pi ah kami hnünthawh cu lelawi pikbäih ci nei. Keimi kami kat ah hmawk cing hnah chawng, khokhi ah zon awn kami täng ci nei.

⁷ A u phi taigü ne nang ah kä ng’hlat lawk ci; a u phi nang naw na m’htei vai ah kä hteit ci. Keimi kami hmakat ah phäh ah, nang naw na na nawng gui ci, kei mi ung ka na ng’thup ci.

⁸ Cun ung phi Bawipa, nang cu kami ning pa nei. Keimi cu k’am m’dek ah mäih ah kami kyak ci, nang cu k’am sheh ciah mäih ah na kyak ci. Nang naw na na tüisho gui ci,

⁹ Cun ah kyasei keimi ah khan ah kä m’lungshe aih en ä, keimi na hnungtuk püi gui ne kami katnak ngawi yä kä k’pang en ä. Keimi na na chang gui nei, keimi na m’gein gui ä.

¹⁰ Nang ah theingthap ciah mang gaw gui cu ng’kiang k’de ah mäih ah kyak ci; Jerusalem cu dishum ne shiu ci,

¹¹ Kami Taigüim, theingthap ne kyom ciah hmun, kami pupa gui naw ami ning m’hlüngtai nak man cu mei naw m’khih sei di ci nei. Keimi naw kami m’hni ah hmun gui avan cu di yawp ci nei.

¹² Bawipa, shingui avan ah phäh ah kä thük ne naom ci ma? Nang naw a i phi kä na bik khai ma, kei mi naw kami näh hning ah ta, nui pi khai ah na na ci gui khai ma?