ISAIAH 61 - Cho Bible Common Language 2016

Hun K’phyawn ah Mawng Thu Ni

¹ Uktu Bawipa naw ang mümcha awn kei cu na be sak ci. Ani naw na ghü ne na tüi ci, Dukhaih ci gui ah ma ah thu ni hteh pui vai ah, Am lung kyong she-kak ci gui gai sak vai ah, pha ne ami chum gui ah luat nak ah mawng thu ng’shäu vai ah, Thawng ung kium ci gui ah ng’pängze nak vai ah.

² Bawipa naw a chang gui a hun nak vai la Ami ga gui a tuk hnim nak gui vai ah akhin cu gawk law pyi ci nei, cine ng’thu ka shäu vai ah kei cu na tüi ci. Thüi kyap ci gui ami van k’büi gui vai ah kei cu na tüi ci,

³ Thüikyah nak ah hnün ung yei kyak nak la hüithäw nak, A yä ci gui am m’hlüngtai nak ah ngäi cu, Zion ung thüi kyap kyap ci gui am pek gui vai nei. Ngami cu Bawipa amät naw ang lin ah sing ghing ah mäih ah kyak khai gui. Ngami ami van naw hman ci cu bik khai gui. Ani naw abi ah phäh ah khanpughi cu m’hlüng tai khai gui.

⁴ Ngami naw ak shou didam lawk ciah mang gaw gui cu co ba khai gui.

⁵ Ka chang gui aw, khuihei chang gui naw nami bi bik khai gui nei. Ngami naw nami seime gui, nami lo gui, nami khaw gui, nami sapyit gui m’htei khai gui.

⁶ Nangmi cu khanpughi ah changshäm gui, Bawipa ah taigü gui ah ning hmat gui khai gui. Nangmi cu chang pakhui gui ah khawh cham awn yeikyai u ne, a cun gui nami ka-nak ah mawng nami khähghah khai.

⁷ Nami ng’a ca nak la nami thuihmai nak cu ng’pyi pyi ci nei. Nangmi cu nami mät ah kho ung nami om khai, Nami khawh cu a goi ah däm khai; Nami yei nak cu kä ng’pyi hlawt khai.

⁸ Kei naw taga nak cu ka m’hni ci, shedam nak la cheishoh nak cu ka thüi nak ci. Kei naw ka chang gui ung bekhüt ka m’cümhnah gui khai, Nangmi awn ng’täi ciah thukhän ka bik khai.

⁹ Ngami cu chang pakhui gui ah ng’lung ah ming thang khai gui; ngami hmu gui ciah chang päng naw kei naw hriham ka pek ah chang ah kyak ci gui ah hmat gui khai.”

¹⁰ Bawipa naw bi a bi ah phäh ah Jerusalem cu yeikyai ci nei. Ani cu ceimah lawk khai ah ng’lami hta ng’sui ng’sak ciah mäih ah kyak ci nei. Khanpughi naw ani cu hun nak la näng nak suisak sak ci nei.

¹¹ Geit m’shi cu ng’lih pyo ne a ghing gong ah mäih ah uktu Bawipa naw achang gui cu hun gui khai nei, chang pakhui avan naw ani cu m’hlüng tai khai nei.