Biblia Todo Logo
Bib sou entènèt

- Piblisite -

ISAIAH 59 - Cho Bible Common Language 2016


Chang gui ah Katnak Prophet naw M’shuk chak ci

1 Bawipa cu, aning hun nak gui vai ak tha ken ci, aning m’htei gui vai ah nami khü ung, ang yak nak vai ah ak hnga pang ciah kä nami ngaih vai nei!

2 Nang mi, nami hmakat nak ah phäh ah ani naw kä aning yak gui ah kyak ci. Nangmi naw ani khawihnah vai ah nami k’thanak yah ung, nangmi la khanpughi ah ng’lak ung ning m’cha gui cicu nangmi ah katnak ah kyak ci —

3 Nangmi cu nami hleei hlak nak, nami kiawi pang nak, nami ngawn pha nak awn nami cheishoh ciah kyak ci.

4 Nangmi cu yung ah nami hteh ung phi, taga khai ah a i kä nami bik ci. Amawngma ung nami näng vai düt ah nami hleei ci. Nangmi naw chang ah mat nak vai cu pawng püi ne nami law püi ci.

5-6 Nangmi naw akshe nami pawng püi cu, k’phyu m’ä mah ah m’tui akheh ah mäih ah sih nak pyang ci. Pum ät kheh sei, phyu tumat lut lawk ci; cun ung phi nami pawng püi naw nami khan ah kä ah ni ah bi bik khai — ngami cu bangkaga ng’gan awn tah ah sui ah mäih ah a i ah kä mawng khai.

7 Nungmi cu ang däih ah akshe bi vai ah nami pawng m’thein ci, acun cu akghat ah bi vai ah nami naing ci. Nangmi cu changui nagawn vai ah nami kut kä ng’gin ci. Nangmi nami hteh nak päng ah dishum nak bäng k’pawih shüt ci ci,

8 nangmi ah om nak a u phi phiawn nak kä om ci. Namibi nü kä taga ci. Nangmi naw ng’koi ciah lam nami läk ci, cun ah lam ung hteit ciah chang phung cu phiawn nak kä om ci.


Chang gui naw Ami Kat nak Ng’yu ci gui

9 Chang gui naw pyen ci gui, “Na shedam na gui ciah kut ung ka, a i ah kyasei khanpughi naw kä ana hun gui ci cu, tuhbäi mikmi naw mi hmat ci. Mi hteh nak vai ah akdei cu mi ngaih u ci, cun ung phi, hmüp khui ah kyak ci,

10 Chang mik m’dauh ah mäih ah mikmi cu m’thäp ne mihteit ci mikmi cu hnüüng ng’lung ung plai sei mi ng’taak ci mü hmüp ah mäih ah, hmüp ciah sih nak ah khaw ah mäih ah.

11 Mikmi cu kyi kyawk ne mi ng’hlet ci. Cheishoh nak la shedam nak ung na hun gui khai ah khanpughi cu kami ging co ci, cun ung phi, a i phi i ah kä kya lawk ci nei.

12 “Bawipa nan ning hnung’tuk püi ne kami katnak cu da lawk ci nei. Kami katnak naw na k’bünphei gui ci nei, kei mi naw cun gui avan kami hmat ci nei.

13 Keimi naw kami ning hnung’tuk pui küknet püi ci nei, kami ning läk vai ah kami mak ci nei. Kei mi naw chang hei gui shedam na u ne, nang ung ka, a hei ah kami ng’hlat ci nei. Kami ngaih-tüh kä hman ci, kami ng’thu phi hleei ah kyak ci.

14 Taga nak cu k’täm pyi ah kyak ci, düng nak cu kä ng’et law hlant ci. Chang gui ah mawng ng’thumcha nak ung düng nak kä om ci changah lung ang düng nak kä om ci, ba nak cu a cun ah hmun ung kä hmuh nei.

15 A cun ung düng nakcu aphihta bäng om ci kya sei, akshe bi nak nawng ci gui amät naw amät cheishoh ciah hmuk ci. Bawipa naw shin cu hmu neta, cung cu kä taga ciah kyasei ani cu kä yei ci.


Bawipa naw Achang gui Gung khai ah Pawng ci

16 Ami shedam nak gui m’htei htang tuk khai, a ukä om ci, cicu hmu neta, ani cu cäi ci. Cun ah kyasei ani naw amät ah huham cu mang ne, ngami gung gui ne, näng nak cu cah ci.

17 Ani naw taga nak cu saphaw ah mäih ah sui ne, hun nak huham ah kyak ciah lukhu cu ng’büng khai. Anawng gui düng khai ah bi nak hlü aih ah sui cu amät naw sui ne, chang gui ah yai ca nak ah cheishoh nak cu m’lyuk ne phu tuk khai.

18 Ani naw aga gui cu a shou nak ah khaw ah amiom ung phi ami bi ah ciah m’kyuk gui khai.

19 Akhei ung ka naw ak kyang ung khüt khai ah chang päng naw ani la a huham cu kyih kyawk khai. Ani cu ng’güüt ciah tuilawng mäih, ng’pheet ciah khokhi ah mäih ah lawk khai.

20 Bawipa naw a chang gui pyen ah gui ci, “Kei cu Jerusalem ah ka lawk khai, ning shungvong gui ne, katnak ung n’hlat ci gui nami van ka ning hun gui khai.

21 Nangmi awn thum khän ka bik khai: kei naw ka huham la ka m’theithang gui cu khonglän ung nami ka vai ah ka ning pe gui ci, tuhbäi ung tün ne lawk ciah a khin avan ung, nangmi naw kei cu nami na läk vai, kei na ngai khai gui ah nami htanau gui la nami hta ng’shon gui nami m’thei thang gui vai.”

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite