ISAIAH 58 - Cho Bible Common Language 2016

Ei hlawi Akang

¹ Bawipa naw pyen ci, “Nami mtau hning ah m’lau vä! Ka chang gui Israel gui am ami katnak m’thein gui vä!

² Ngami naw a hnüüp tä na khawihnah ci gui, kei ah ka lamcu kmat u ne, kei ah ka thukhän cu läk hning ci gui ah pyen ci gui nei. Ngami naw clung ciah thukhän gui ka pek gui vai ah ng’ya hlük ci gui ah pyen ci gui. Ngami naw kei na khawihnah u ne yeikyai nak gah ci gui.

³ Chang gui naw ng’shih ci gui, “Bawipa naw a i ah kä ana sui gui ung, a i vai mikmi ei mi hlawi vai ang? Ani naw a i ah ka ana ngaih gui ung a i vai ei kä ei ne mi hteh vai ang? Bawipa naw ngami pyen na gui ci, “akcang cu, nangmi ei nami hlawi sang ung nami mät ah ng’yak hlü shui u ne, nami chang gui nami shedam na gui ci.

⁴ Ei nami hlawi naw ning kiawipang sak gui ci, nangmi ng’vaw u ne, nami ng’tuk ci. Shinah mäih ah ei nami hlawi nak naw, nangmi ah taigü ka nng ngaih pe gui khai ah, na ci hning khai ah nami ngai ne ma?

⁵ Einmai hlwi ng, nami mät naw nami mät nami yaica sak ci; khum’ghaw ah ng’voi ah mäih ah nami lu ngüm ne kawp ne, sui she phüi ne, m’vut ung ng’zaän ne nami kyak ci. Cun ma nangmi naw ei hlawi ah nami pyen? A cun ah mäih cu kei naw ka yei nak khai ah nami ngai ne ma?

⁶ “Kei naw ka ng’yak hlü ah ei hlawi cu shin ah kyak ci: khih pawn nak gui nami hen vai, kä taga ciah puih gih nami nawt hen vai, nami yawshe nak gui nami luat sak vai.

⁷ Ei cawi ciam nami ei nami k’pai tu vai, a i m kä om sei dukhaih ci am, nami im kawt nami hmawn pek vai. A sui vai kä om ci am suisak nami pek vai, nami mätyah m’htei htang vai ah kä nami ma en vai.

⁸ “Cun ung kei ah bämang nak cu ngawi thaih hni pyü ah mäih ah na khan ah ng’shü sei, na nat nak gui a van cu ang ghit ah khan khai nei. Kei naw ungtäi sei ning om püi gui ne ka ning hungui ci; kei ah ka naw apäng avan ung ning shungvong gui khai.

⁹ Nami k’taigü ung ka ning m’shang gui khai, nami na khü ung ka äi khai. “Zawhnem nak, tawk ne shedam nak lo thu she gui cu.

¹⁰ Ei cawi ciam ei m’bei ne, gein vai ciah chang m’htei htang ne, nami lüak ung, nami pei leng yung ak hmüp avan cu hnüüp ng’lung lai ah mäih ah dei ne khang khai nei.

¹¹ Cun ung kei naw angtäi sei lam ning m’shüm gui ne, akni gui awn ka ning büh bei sak gui khai. Kei naw ning khüighat sak gui ne ka ning gai sak gui khai. Nangmi cu tui akda awn sawi ah duin ah mäih ah nami kyak khai, kä ket hlawt ciah tuilawng ah mäih ah nami kyak khai.

¹² Nami chang gui naw cau ng’phye ng’gäi cicu co ba khai gui, cawh kyan pyi phyim angnei ah khanah. Co ba mä khai gui, Nangmi cu Mang k’pang co ba ne, im she m’tho ba ciah ning hmat gui khai gui.”

Kyiin Hnüüp Theing sak ci gui ah Phäh ah Ng’chengnak

¹³ Bawipa naw pyen ci, “Nangmi naw kyiiin na hnüüp cu theingthap sak ne, a cu hnüüp nami mät ah Ng’zak hlü ah kä om ne; kei ah theingcim ciah hnüüp cu m’kümto u ne, m’tamkhah u ne; kä hteit hton ne, kä ng’bilo ne, kä ng’thu she ne nami kyak ung;

¹⁴ Kei ah bi nami bi nak ung ka gawk lawk ciah yeikyai nak cu nami hmuk khai. Khaw avan ung chang ah m’tam khah vai ah ka ning pyang gui khai. Kei naw nami a Jakob am ka pek ah khaw ung nangmi cu nami yeikyai khai. Kei, Bawipa naw ka pyen nei.”