ISAIAH 57 - Cho Bible Common Language 2016

Israel gui ah Agup Khawihnah nak cu M’shukchak ci

¹ Chang k’ni gui cu sik ci gui, cung ah mawng cu a u naw kä hmat ci, a u naw i ah kä ngai ci. Cun ung phi ngami ami sih ung sih kiuk nak naw kä k’et ba gui ci.

² Akni ah om ciah chang gui cu dimdeeih nak hmu u ne, dinggei sei ng’düm ci gui.

³ Nangmi kakciah chang gui, ng’thumcha vai shin ung law vä! Nangmi cu, cuun u ni, chang ah chuhta kat püi ci ni, pletbeng ci ni ah ta kä nami bä tuba ci nei.

⁴ Nangmi naw a u ang nami gaih tu? Nangmi naw a u ang nami m’lepse?

⁵ Theingeim ciah nami sing ghing gui ah ka ah ng’yaw ng’pawm u ne m’dekni pyan ah khanpughi cu nami khawihnah ci nei. Nangmi naw tui hta pei ah lungkhui ung nami htanau gui cu khawihnah nak ah nami douthak ci nei.

⁶ Nangmi naw ng’mi ciah lung gui cu a cun ung ka la neta, khanpughi cine nami khawihnah ci. Nangmi naw sapyit tui cu k’phyuh ne nami douthak ci, htang-douthak phi nami lawpüi ci. Shin gui avan cu kei naw ka yei nak ciah nami ngai ne ang?

⁷ Nangmi cu khawihnah douthak vai ah m’htung ah kai neta nami ng’tawng pawm ci.

⁸ Nangmi naw shemshai ciah agup gui cu nami im hmai m’kawt akyong täng ah nami tha ci. Nangmi naw nami na nawng ci; Nami suisak sut u ne, nami hni awn atäng ah ih phak nu gui ung kai u ne, kami ip ghawn ci. A cun ung nami sa na mi k’phyei ci.

⁹ Nangmi cu tuing’ui, suitui ng’ui gui awn ng’hluk hlüuh u ne, molek khanpughi khawihnah vai ah nami hteit ci. Nangmi naw nami khawihnah vai khanpughi gui hmuk khai ah ng’shä chang tüi ne, khoshou, kho ng’shawng, sih nak ah kho güt ah nami shui ci.

¹⁰ Nangmi cu ahei khanpughi gui shui ne nami cümbawng ung phi, kä nami m’lung k’si p ung ci. Nangmi naw shemshai ciah agup gui naw thagui ning pek gui ciah nami ngai ci, cun ah kya ne nami thagui kä ken law phung ci.

¹¹ Bawipa naw pyen ci, “Keina m’hnih sagei u ne, nami hleei pyen ne nami na m’thein ü awng vai ah, nami kyih ah khanpughi gui cu a u gui ang? Kei cu ak shounu a düm ah ka om ci kyasei, nami na m’tamkhah vai cu nami düm ei ne ma?

¹² Nangmi naw nami bi cu hman ciah nami ngai ci, cun ung phi nami bi gui cu kei naw ka m’dang lawk khai nei, nami agup gui naw kä ning hun ba gui hning khai gui.

¹³ M’htei htang vai ah nami kyah law ung, shin ah nami agup gui naw ning hun gui u sä? Ngami cu kho hnü ät akhi ah a kyak ung a cun naw zon gui khai nei! Cun ung phi kei ng’ap ciah chang läi cu shin ah kho ung om khai nei, ani naw kei cu ka Taigüim ung na khawihnak khai nei.”

M’hteihtang vai la Gaisak vai ah Khanpughi ah Shai tak

¹⁴ Bawipa naw pyen ci, “Ka chang gui kei ah law ba u sä. Ami lam ung ng’vawntam nak gui vai phung cu nawt heng vä. Lam phi co vä, pyang ge vä!

¹⁵ “Kei cu hlüngtai ne, theingcim ciah khanpughi nei, angtäi ah ka ghing ci nei, kei cu hlüngtai ne theingcim ciah hmun ung ka om ci, cn ung phi amlung neim ne ng’zuba thei ciah chang gui awn phi atäng ah ka om ci nei. Cun ah kyasei ngami ah m’lung üp nak la ngaih u nak cu kei naw ka k’thai ba sak ci nei.

¹⁶ Kei naw ka chang gui am ghin nak ka pek ci, kei naw ngami cu kä ka k’dün ba gui khai, ngawi yä kä ka m’lungshe naba gui khai.

¹⁷ Ami katnak la ami ng’yak hlüaih nak ah phäh ah ka m’lungshe na gui ci, cun ah kyasei kei naw m’lyuk gui ne, ka nawng gui ci. Cun ung phi ngami cu m’lung ling u ne, ami mät ah m’hni ah om lä ci gui nei.

¹⁸ “Ngami ah hnün thawh cu kei naw ka hmu gui ci, cun ung phi kei naw ka gai sak gui khai. Kei naw lam ka shüm gui khai, ka m’htei htang gui khai, thüi sei ci gui ka m’shuun gui khai.

¹⁹ Kei naw dimdeeih nak avan am ka pek ci nei, ang et nak la a shon nak avan ung! Kei naw ka chang gui cu ka gai sak gui khai.

²⁰ Cun ung phi chang shekha gui cu kä ng’dümphung ciah tuinu ah mäih ah kyak ci, awn ah tui hnawk cu kä düm phung ne ng’hlat ne, ng’än la ng’sawp u law püi ci.

²¹ Hmakak ci gui ah phäh ah phiawn nak vai kä om ci nei” cine Bawipa naw pyen ci.