ISAIAH 55 - Cho Bible Common Language 2016

Khanpughi ah Peit ah Chimgein nak

¹ Bawipa naw pyen ci, “Tui gha ciah chang nü law vä — shin ung tui om ci nei! Ngui kä tak ciah chang gui law vä — htam’guh khleih ne ei law vä! Law vä! Wine la suktui khleih vä — nang ung a i phi kä ng’pyi khai nei!

² Phü m’ghüm vai ah kä kyak ci ung, a i ah kyasei ngui na mang ang? Na ng’cheng chuh cu mang neta, a i ah kyasei, ei na cawi lä ang? Kei cu na ngai ä, kei ah pyen ah bilo ä, cun ung ei ak ni pi ei ne na yeikyai khai nei.

³ “Tuhbäi ngai vä, ka chang gui aw, kei ah law vä; kei ah law vä, ghin nak nami gah khai! Kei naw khonglän ciah ka ng’thukhän cu nangmi awn ka bik khai, David ung shai ka tak ah hriham cu ka ning pe gui khai.

⁴ Kei naw ani cu pakhui gui ah ang vaihta la gakapbawi ah ka pyang ci, kei naw cun gui awn ani ungka naw ka huham ka m’dang ci.

⁵ Tuhbäi nang naw a khohei pakhui gui cu na k’thäh khai ayan läi ngami naw kä ning hmat man ci gui, cun ung phi tuhbäi ngami cu dawng ne law ne, nangmi ung ng’dawn tuk khai gui! Kei, Bawipa nami Khanpughi, theingcim ciah Israel Khanpughi naw, shin gui avan kya lawk khai ah ka bik khai; kei naw m’tamkhah nak la bäimang nak ka ning pe gui khai.”

⁶ Bawipa ah ng’hlat ne, ani ah k’taigü vä, Tuhbäi ani cu ng’et pyi ci nei.

⁷ Chang omshe gui naw ami ghin om nak ah lam cu nawng u sä, ami ngaih-tüh nak cu m’thawng u sä. Ngami cu Bawipa, mi Khanpughi ah ma ah ng’hlah sak gui vä; ani cu chimgein ne, ang ghit ah m’geinsei ci nei.

⁸ “Bawipa naw pyen ci, “Kei ah ka ngaih-tüh gui cu nangmi ah mäih ah kä kyak ci, kei ah ka lam cu nangmi awn kä täng ci.

⁹ Khankho cu khomdek ah a hlüngpi ah mäih ah, kei ah ka lam la ka ngaih-tüh gui cu nangmi ah ta hlüng pi ci.

¹⁰ “Kei ah ka ng’thu cu khüitoi la kho k’aa ah mäih ah kyak ci. Cun cu khomik ungka kya law ne, khomdek cu tui awn shawi ci. A cun naw geit kaw gui cu däm ng’ghaw sak ci, geit vai ah m’shi la ei vai ah ei cu kyak sak ci.

¹¹ A cun ah mäih ah kei ah ka pyen ah ng’thu cu kyak khai nei — kei naw ka pawng püi cu bi vai ah cun cu kä shum khai; kei naw bi vai ah ka tüih law päng cu, a cun naw bik khai.

¹² “Nangmi naw Babilon cu yeikyai ne nami hteh tak khai; Nangmi dimdeeih nak awn mang gaw ah k’pung ah nami lut lawk khai nei. Khomhtung gui la khogui gui naw m’lau ne ng’äi m’cu khai gui. Sing ghing gui cu yei ne m’lau khai gui nei.

¹³ Tuhbäi hling k’cam gui ah ghing nak ung a geit-ghing gui tho lawk khai; Ng’hling ghing gui ah hnün ung mirtle sing gui tho lawk khai gui. Shin cu ngawi yä om khai ah m’khüt nak ah kyak ci, Kei, Bawipa naw ka bi gui m’shüm hnuh ba ah kyak ci.