ISAIAH 52 - Cho Bible Common Language 2016

Khanpughi naw Jerusalem Gung khai

¹ Jerusalem, na khüighat vai, na dämduh ba vai nei! Theingcim ciah khanpughi ah mang gaw, suinu na sui bei vai nei! Khui hei gui cu na m’kawt ung kä lut tu ba phung khai gui nei.

² Jerusalem, na phyawn vai ah ng’kia ä! M’vut ung ka tho ne na mang kiang ung ngo ä! Ami pha ah Zion chang gui, ning khit gui ciah m’si gui cu k’phian vä!

³ Uktu Bawipa naw a chang gui pyen ah gui ci Nangmi khlei htein ah nami kyak yah ung nangmi ah phäh ah ngui a u naw kä m’hnüt ci; a cun ah mäih ah nami phyawn nak vai ah phi a i kä pek vai.

⁴ Egypt khaw ung khohei chang ah kya ne nami om tu yah ung nami mät ah m’hni ah nami om ci; Assiria gui naw güt ne ning hteh püi gui ne, nangmi ah phäh ah a i kä m’hnüt ci gui.

⁵ Tuhbäi Babilon ung phi acun bä ah kya law ba ci; nangmi ning pha gui ci gui, nang mi ah phäh ah a u naw a i kä pek ci. Ning uk gui cicu khä hghah u ne, chang ah ng’shei u ne, ang däih ah kei a i ah kä ami na sui nak cu m’dang ci gi.

⁶ Akhin a gawk law ung, kei khanpughi ah ka kyak la kei naw ka ning thu gui cu, nangmi naw nami ng’kiaa khai nei.”

⁷ Dimdeeih nak ah ng’thu, thuni law püi ne, khomhtung kau ne lawk ciah, shächang hmuh tu cu cäicat aih vai ah kyak ci nei! Ani naw näng nak ng’shäu neta Zion a pyen nak cu, “Na khanpughi cu ghangpughang nei!”

⁸ Mang gaw ngäng ci gui cu m’lau ci gui, atäng ah yei ne m’lau ci gui! Zion ung Bawipa a law ba cu ngami naw ami mät ah mik awn hmuk ci gui nei!

⁹ Zei ne m’lau vä, dishum ciah Jerusalem! Bawipa naw a mang gaw cu ngäng ne, a chang gui cu shungvong khai nei.

¹⁰ Bawipa naw thingcim ciah a huham cu m’dong khai; Ani naw a chang gui cu hun gui khai, khomdek khan avan naw cun cu hmuk khai.

¹¹ Taigüim ung ka, khawh gui kawt chang ci gui nami van, Babilon ung ka ang ghit ah hteit vä! Hlawi zeeih phungcu kä nami tawn en vai nei; Nami mät theing cim sak neta hteit vä!

¹² Tuhbäi ung ang ghit ah nami hteh tak vai kä hlü ci; nami phiawn vai ah nami tha nak vai kä hlü ci. Bawipa nami khanpughi naw lam ning m’shüm gui ne apäng ung ning shungvong gui khai.

Yaica ciah changshäm

¹³ Bawipa naw pyen ci, “Ka changshäm cu a bilawh nak ung näng nak om khai; Ani cu a hlüngtai ah m’tam khah khai gui.

¹⁴ Chang akda cu ani hmu u neta cat ci gui; Ani cu sheshui düt ne kyak ci kya ne, Chang ah mäih phi kä law ba ci.

¹⁵ Cun ung phi tuhbäi chang pakhui akda naw ani cu cäicat ne m’hlüng tai khai gui, ghangpughang gui cu cäi hmawtaw ne kä thung’htau ci gui. Ngami naw kä ami hmuh hmat man cu, hmuhmat lawk khai gui nei.”