ISAIAH 50 - Cho Bible Common Language 2016

¹ Bawipa naw pyen ci, “Pami tumat naw akchu ang chaa püi ah mäih ah, kei naw ka chang gui a hei ah ka tüi gui ciah nami ngai ne ma? Cun ung ng’chaa nak ah ca a hawi ang? Chang tumat naw a hta gui khlei htei ah a yoih gui ah mäih ah, nangmi cu chang pha ah ka ning yoi gui ciah nami ngai ne ma? Nangmi nami katnak ah phäh ah pha ne ami ning hteh püi gui ah kyak ci; Nami cawi m’sa ah phäh ah ami ning k’täm gui ah kyak ci.

² “Kei naw ngami ka hun gui khai ah ka hteh shi gui yah ung, a i ah kyasei kä ami na m’shan ang? Kei naw ka khü gui yah ung a i ah kyasei kä ami äi ang? Ngami ka hun nak gui vai ah kei ung thai gui ken aih ne ang? Kei naw ka thumkhän awn tuinu cu ka kawi sak hning ci, tuinu lawng cu khong’gau ah ka kyak sak hning ci, cun ah kya ne tui lawng ung tui kä om sei nga gui sik ci gui.

³ Sik ciah phäh ah chang athüi ah mäih ah khomik cu hmüp khai ah ka bi hning ci. Bawipa ah changshäm naw ng’thu ang ngaih nak.

⁴ Uktu Bawipa naw a i pyen vai cu nam’thei ci, Cun ah kyasei cümbawng ci cu kei naw k’tha ka pe hning ci. Ani naw ana m’theithang cu ngaih ng’yak vai ah, akhongawi tä sei na ng’dawt ng’cham sak ci.

⁵ Bawipa naw hmuhmat nak na pek ci, cun ah kyasei kei naw kä ka hnu ng’tuk püi ci, kä ka ng’hlah tak ci.

⁶ Na m’ghuih ci gui am ka k’paang ka cun pek ci, Na k’shedam na u ne, ka m’gawng mu na k’bawh pe u ne, ka hmai ung na m’thüi ci gui phi kei naw kä ka ma na gui ci.

⁷ Cun ung phi ngami ah hedam nak naw kä ne nat sak ci, a i ah sei ci ung uktu Bawipa naw na m’hteihtang ci. Cun gui m’khüt vai ah kei naw ka tha ka lak ci. Kei cu kä ka lü ng’aa khai ah kei naw ka hmat ci,

⁸ a i ah kyasei ci ung, khanpughi naw na k’et ci, ani naw chang k’ni ah na k’bäi khai. Kei cu na hnung’tuk püi ne, nak bün dat ci, a om ah a kyak ung, Yung ah m’kawt ung atäng ah mi hteit khai nei! Ani ah nakbün nak ah mawng cu mi law püi sak khai nei!

⁹ Uktu Bawipa amät naw na shungshet ci nei — kei nakbün ci gui ami van maih khai gui nei; Ngami cu m’kyiit naw a ei ah suisak ah mäih ah kholä khai gui nei.

¹⁰ Bawipa m’tamkhah ci gui, a changshäm ah ng’thu läk ci gui avan, nami hteh nak ah lam cu akcang ah hmüp khai nei. Cun ung phi Bawipa ung ng’ap vä, khanpughi ung khäng hteh vä.

¹¹ Chang m’zih ne m’di ci gui nami van, nami mät ah m’zih naw ning m’di ba gui khai nei. Bawipa amät naw shin gui cu kyak khai ah bik khai nei; nangmi cu shin ah ginvai nak awn nami yaica khai nei.