ISAIAH 5 - Cho Bible Common Language 2016

Sapyit la Amawng ng’äi

¹ Ngai ä shin ah ng’äi ka ning m’cu nei, ka teihpüi la ani ah lo ah mawng ng’äi nei; kei ah ka teihpüi ung ang htei ah ang lei nik ciah khawgui ung sapyit a lo om ci nei.

² Ani naw m’dek lei cu co ne lung gui cu ghäng ci; ani naw sapyit aknipi gui geit ci. Ani naw cun gui ngäng nak vai ah tänghän co ci, Sapyit theih neen nak vai ah khui phi co ci. Ani naw sapyit a up vai cu ging ci, cun ung phi sapyit theih cu thui yawp ci.

³ Cun ah kyasei tuhbäi ka teihpüi naw, “Jerusalem la Judah ung om ciah chang gui, kei la ka sapyit lo ah ng’lak cu m’khoi cha vä.

⁴ Ani ah hmawk ah kei naw ka bi vai häi ci a i om ne ang? A i ah kya gei kei naw ka ngaih u ah mäih ah sapyit akni ah kä m’theih ne, ak thui ah an theih ang?”

⁵ Kei naw ka sapyit lo ah khan ah ka bi law vai cu shin ah kyak ci nei: a un veing ne ng’vong nak cu ka gäi khai, a cun shung nak ah k’pang cu ka phyek khai, khisa gui am ei sak ne, ka leh sak gui khai.

⁶ Kei naw cun cu khumgho she gui awn kakdüi sak khai. Kai naw kä ka k’hteiuh pyang khai, m’dek kä ka k’seisan khai; ng’hling nu, ng’hling hta gui awn ka küm khai. Ani ah khan ah khaw kaa kä kya lawk khai ah khaw mei gui phi ka maa nak khai” cik ci.

⁷ Israel cu m’gäi ciah Bawipa ah Sapyit lo ah kyak ci; Ngami naw ani naw akni bik khai ah ngaih u sei, Cun ung phi ngami naw chang ngawn ci gui. Ngami naw hman ci bik khai gui ah ani naw ngaih u ci, Cun ung phi ngami ah dukdeiu nak gui naw ataga vai ng’ya hlü ne m’lau ci gui.

Chang gui ah Bi ah Akshekha.

⁸ Nami khaw mü ci nei! Nangmi naw nami mät ung om pyi ci nami m’khah nak vai ah im gui la lo gui nami hleih ci kä shou pha sei chang a hei gui ami om nak tu vai kä om law ba khai, nangmi nami mät bäng shin ah khaw ung nami om lank khai.

⁹ M’gäi ciah Bawipa ah thu pyen cu kei naw ka ng’yak ci, “Shin ah im m’kawm im k’ni gui avan cu ghawng ne di khai.

¹⁰ Lo cing hma ung tho ciah sapyit cu um ung ak cheit bäng ah a tui gah vai. Htang tang gha shaw geit ci naw phi htang a tang bäng ah m’sep khai” cik ci.

¹¹ Nami khaw mü ci nei! Nangmi khaw ngawihta ang dawt ah tho law ne nami aw law ge ci. Mü hun täng ah phi ak sho awktat ne nami ng’zän ci.

¹² Nami zu im ung hting ni k’vei ni, phiphät ni — zu ni nami mang ci. Cun ung phi Bawipa naw a i a bi cu kä nami hwat ci,

¹³ Cun ah kyasei nangmi cu thawng kyum ah ning hteh püi gui khai gui. Nami ng’vai gui cu cawi ne sik kaai gui, chang akda cu tui ah gha ne sik khai gui.

¹⁴ M’gang khlam naw ei ah cani ne ei hlü gui ne, ani naw a shai m’an ne ang ci. A cun naw Jerusalem ah mang gui cu m’lau ng’pyang ciah chang pang gui awn atäng ah m’zaw gui ci.

¹⁵ Chang nü cu thui hwai khai gui, chang k’om ci gui ami van cu yuk buh gui khai.

¹⁶ Cun ung phi m’gäi ciah Bawipa naw a däinduh nak cu hman ci a bi nak awn m’dang ci, ani naw a theincüm nak cu a chang gui am khaicha nak awn m’than ci.

¹⁷ Di pyi ciah mang gaw gui ung htome hta gui naw khu ei u ne, me hta gui naw khu li nak cu hmuk khai gui.

¹⁸ Nami khaw mü ci nei! Nangmi nami katnak ung ka, kä nami phyawng hlawt ci nei.

¹⁹ Nangmi naw, “Bawipa naw, ani naw abi vai a pyan cu ang ghit ah bi sä, cun ung mikmi naw mi hmu hning khai nei. Theingcüm ciah Israel khanpughi naw a pawng püi gui cu bi sä; ani ah am lung ngaih cu mikmi naw mi hmuk khai nei.”

²⁰ Nami khaw mü ci nei! Nangmi naw akshe cu akni, akni cu akshe ah nami khü ci. Nangmi naw a hmüp cu akdei, akdei cu a hmüp ah nami m’hlat ci. Nangmi naw akha cu ak tui ah pyang u ne, aktui cu akha ah nami pyang ci.

²¹ Nami khaw mü ci nei! Nangmi naw nami mät cu cüivai ciah, lunglang aih ciah nami ngai ci.

²² Nami khaw mü ci nei! Zu ah chang m’gäi gui! Nangmi cu awk nak naw aning k’caw law gui ung nget u ne kyih nak nangmi ung kä om ba ci nei!

²³ Cun ung phi nangmi naw ng’mü khawk dou u ne, chang she m’hlawt ne, kä hma ciah chang cu taga khai ah kä nami bi pek ci.

²⁴ Cun ah kyasei tuhbäi, htang gong la khu m’gho chawng ng’vet sei mei naw a vih ah mäih ah nami zungpya cu thu ne nami m’guhpai cu chawng ne zong yawp khai nei, a i ah kyasei ci ung, nangmi naw m’gäi ciah Bawipa, theing cüm ciah Israel khanpughi ah ana m’theithang gui cu nami hnung’tuk püi ah phäh ah kyak ci.

²⁵ Bawipa naw achang gui ah khan ah m’lungshe neta, ngami m’kyuk nak gui vai ah a kut shäng ci. Khaw m’htung gui thüng khai, sik ciah pumsa gui cu lam ung ng’ant ah mäih ah ng’zän shüt khai gui cun güt ung Bawipa ah m’lunghse nak cu kä ng’yi khai, cun ung ngami m’kyuk gui vai ah ani naw a kut cu shäng lä khai.

²⁶ Bawipa naw m’hnüt nak m’dang ne, khosang ah om ciah pakhni gui khü gui khai. Ani naw khocawi ah ka gui ami law vai ah m’shük ne khü gui ci. Ngami cu ang ghit, ak yä ah shin ung lawk ci gui!

²⁷ A u phi kä bawngbai ci; a u phi kä kyu ng’tääk ci. A u phi kä ngam ci kä ip ci. Kheipat phi kä ng’phyak ci; phahnak phi kä pit ci.

²⁸ Ami m’la gui cu ghat ne, ami li gui cu kah ghet vai kyak ci. Ami ng’se gui ah khopaw gui cu meikhatlung ah mäih ah liu ne, ami zatha-ping gui cu kuiphka ah mäih ah ng’tum ci.

²⁹ Gakap gui cu sa lou ne kawt ne, a i naw kä a guh hlawt vai ah phaw ne ghung ne m’ngawk ciah phongkawng ah mäih ah kyak ci gui.

³⁰ Cun ah hnüüp a gawk law ung, ngami cu Israel ah khan ah tuinu ah ng’güüt hlawk ah m’lau khai gui. Shinah khaw cu teng vä! Mü hmüp la geinvai nak ah kya ci! Akdei cu mü hmüp naw m’zaw ci nei.