ISAIAH 49 - Cho Bible Common Language 2016

Israel, Chang Pakhui gui ah Akdei

¹ Na ngai vä, a shou nak ah om ciah Pakhui gui, a shou nak ah ka nang chang gui! Kei kä ka hmi pha ung Bawipa naw na ghü ne, a changshäm ah na düih ci.

² Ani naw ka ng’thu cu khim ah mäih ah ghat sak ci. Amät ah kut awn kei cu na shungvong ci. Ani naw mang ge vai ah ghat ciah m’la ah mäih ah na pyang ci.

³ Ani naw pyen nak cu, “Israel, nang cu ka ning changshäm nei; nang ah hmawk ah chang gui naw kei cu na m’tam khai gui.”

⁴ Kei naw ka pyen ci, “Kei naw ka bik ci, cun ung phi cun cu a kholä ah kyak ci nei! Kei naw ka thagui ka mang ci, cun ung phi ei mang vai a i kä om ci.” Cun ung phi ka mawng ma na shungvong khai ah Bawipa ung ka ng’ap ci nei; kei naw ka bilawh ah phäh ah ani naw na m’cümhnak khai nei.

⁵ Kei kä ka ng’tüi pha ung Bawipa naw na m’düih pyi ci; A chang gui ka law püi ba khai ah ani naw a changshäm ah na pyang ci, püi pyang ciah Israel chang gui ka law püi ba gui khai. Bawipa naw m’tamkhah nak na pek ci; Ani cu ka thamah nak ah ang yung ah kyak ci.

⁶ Bawipa naw na pyen nak ci, “Ka changshäm aw, kei naw dainduh pi ci cu ka ning bi sak khai nei. K’pawih ba ciah Israel chang gui ah tholet ne ami dämduh nak bäng vai ah kä kyak ciah, kei naw nangmi cu chang pakhui avan ah akdei ah ka ning pyang gi khai Cun ung khomdek khan avan naw hun nak gah khai.”

⁷ Israel ah theingcim ciah Khanpughi la hunbawi naw, chang gui naw ak nui ah ami päipih, chang pakhui gui naw ami thüi gen, uktu gui ah changshäm am a pyen nak cu; “Ghangpughang gui naw ning laut sak u ne, tho ne ami ning chang m’sui nak cu m’dang khai gui; Manghta gui naw phi cun cu hmu u neta, kawp ne ning chang m’sui khai gui.” Shin cu kya lawk khai, a i ah kyasei ci ung Bawipa naw a changshäm cu ghü pyi ci; Israel ah Theingcim ciah khanpughi naw a shaitak cu k’pank khek ci.

Jerusalem M’thawh ba ah Mawng

⁸ Bawipa naw a chang gui pyen na gui ci, “Nangmi ning bü nak gui vai ah khin a gawk law ung, nangmi am hmai kiang nak ning m’dang gui ne, ning m’htei gui vai ah nami kyah cu ka ning m’shang gui khai. Kei naw ngäng ne ka ning shungvong gui khai, chang van ah phäh ah nangmi awn thukhän ka bik khai. Tuhbäi didap ciah nami kho ung kei naw ka ning om ba sak gui khai.

⁹ Kei naw thawng kyum ci gui ka pyen na gui khai, ‘Luat ne hteit ba vä!’ Ka cik khai, Hmüp khui ung om ci gui am, ‘Akdei ung lut law vä! ka cik khai!’ Ngami cu khogui yung ah khu ei ciah htome ah mäih ah kyak khai gui;

¹⁰ ngami cu kä cawi phung, kä gha phung khai gui. Ngami m’hni gui ci naw lamshüm gui ci kya sei, khohni ling la khong’gau kholing naw kä nat sak gui khai. Ani naw tuilawng gui ah om nak ah hteh pui gui khai.

¹¹ Kei naw khogui kan ne lam cawh ka k’päng khai, ka chang gui ah hteh nak vai lam ka pyang khai,

¹² Ka chang gui cu a shou nak ah ka lawk khai gui, a siip tang, akhei täng la a htum täng, Avan ung ka lawk khai gui.”

¹³ Ng’äi m’cu vä, khankho gui! Zei ne m’lau ä, khomdek! Khomhtung gui naw yei ne ng’äi m’cu u sä! Bawipa naw a chang gui cu shungvong gui khai nei; Ani naw yaica ciah a chang gui cu m’gein gui khai nei.

¹⁴ Cun ung phi Jerusalem chang gui naw pyen ci gui, “Bawipa naw na nawng gui ci nei! Ani naw na m’hnih gui ci nei.”

¹⁵ Cun ah kyasei Bawipa naw m’shang gui ci, “Hnumi tumat naw amät ah hta hta cu m’hnih hning khai aw? A hta nak ah a hmaw cu kä m’hni ah om khai aw?

¹⁶ Jerusalem aw, kei naw kä ka ning m’hnih hlawt ci nei! Nang ah ming cu kei naw ka m’ya ung ka gui ci nei,

¹⁷ “Nangning cokyang ba khai ah chang cu law sang ci nei, Nang ning m’di ciah chang cu a hei ah htei khai nei.

¹⁸ Veing ne teng ne, a i ah kyak cicu na hmuh vai nei! Na chang gui cu ng’bum u ne ami im ah law ba ci gui nei! Kei cu ak cang ah ghing ciah khanpughi nei, ceimah khai ah hnumi hta pyülung ng’mo awn a khähghah ah mäih ah nang cu na chang gui awn na khäh ghah khai nei.

¹⁹ “Nang ah kho cu di ne keihteik ci nei. Cun ung phi law ne om tuk khai gui ah phäh ah tuhbäi cun cu läm aih ci nei. Nang m’di neta ning hteh tak ci gui cu a shou nak ah ng’nawn khai gui nei.

²⁰ Omk’tu khaw ah ami hta nak ah na chang gui naw, Khohnüüp ät ung, ‘Shin ah kho cu läm aih ci nei, keimi naw om nak vai akdäm kami ng’ya hlük ci nei!’

²¹ Cun ung na mät naw na mät na pyen khai, “Kei ah hmawk ah shin ah ah hmaw gui avan a u naw a hta nak gui ang? Kei ah hmaw gui si yawp pyi ci kya sei, kei ung ak hmaw kä om ba ci. Kei cu omk’tu khaw ah ami na k’täm nei. Shin ah ak hmaw gui a u naw a law püi ba gui ang? Kei ka mät bäng ami na nawng shüt nei. Shin ah a hmaw gui a hawi ka ang ami law ba?’ ”

²² Uktu Bawipa naw a chang gui pyen na gui ci, “Kei naw chang pakhui gui ka häi gui khai, cun ung ngami naw nami hta gui cu im ah law püi khai gui.

²³ Nangmi ah hmawk ah ghangpughang cu pa ah mäih ah kya ne, ghangpughangnu cu nu ah mäih ah kyak khai. Ngami naw nang ah ma ah kawp ne ning m’tamkhah khai gui; Ngami naw ami m’lung neim sak ne, ami ning changmsui nak cu m’dang khai gui. Cun kawn ah Kei, Bawipa ah ka kyak cu nang naw na hmat khai, kei naw ka m’htei vai ah na k’äih ci phung cu am’lung kä thüi khai.”

²⁴ Gakap naw a guttep ah khawh, nang naw na lak pe hning khai ang? Mangmghämee ah kut ung ka thawngkium ci cu na gung hning khai ang?

²⁵ Bawipa naw m’shang ci, “Tuhbäi kya lawk ci gui cu a cun ah mäih ah kyak ci nei. Gakap ah chang pha gui cu lak pek vai nei, Mangmghämce ah guttep ah khawh cu guh pek vai nei. Nangmi ning tu gui ci phung cu kei naw ka tuk khai nei, Nami htanau gui cu ka gung khai nei.

²⁶ Nangmi ning zawshe na gui ci cu, ami mät ng’ngawn tuk khai gui ah ka ci gui khai nei; Ngami naw ami mät ah si cu zu ah mäih ah awk tat khai gui nei. Hnicim chang avan naw kei cu, ning hun gui ne, ning m’hlawt gui ciah Bawipa ah hmat khai nei. Ngami naw, kei cu Israel gui ah huham ah ciah khanpughi ah na hmat khai gui nei.”