ISAIAH 48 - Cho Bible Common Language 2016

Khanpughi cu Matäng Ukciah Bawipa

¹ Shin cu ngai vä, Israel chang gui aw, Nangmi cu Judah ah ng’shon gui nei: Nangmi cu Bawipa ah ming ung ng’tam u ne, Israel khanpughi nami khawihnah ciah nami pyen ci. Cun ung phi nami pyen ah ng’thu lung cu kä nami k’cang nak ci. 1

² Nangmi naw nami mät cu theing cim ciah mang gaw chang gui ah nami pyen ci, m’gäi ciah Bawipa ming nak ciah Israel khanpughi nami ngaih u ciah pyen ne nami khäh ghah ci.

³ Bawipa naw Israel gui pyen na gui ci, “Cau pui kei naw a i ah kya lawk khai ci cu ka ng’cängbang ci; cun kawn ah kei naw cun cu ang ghit ah ka kyak sak ci.

⁴ Nangmi cu lingkeng u ne, m’si ah mäih ah kyei ah mäih ah nami m’liu ci, cicu kei naw ka hmat ci.

⁵ A cau ge ung kei naw nami malam ah mawng cu ka pyen pyi ci, cun gui kä ami kiak pha ung ka ng’shäu pyi ci, Cun gui cu, nami agup gui naw a kyak sak ah nami pyen vai ah kyi neta, shung nak ah kyak ci.

⁶ Kei naw ng’dawt ne ka pyen gui avan tukbäi kya law pyi ci: kei ah ka ng’cängbang gui hman ciah tuhbäi nami ng’kia vai. Lawk khai ah a mawng ak thai gui la kä ka m’than pha ah amawng gui cu Tuhbäi kei naw ka ning m’thein gui khai.

⁷ Tuhbäi bäng kei naw ka kyak sak gui khai, cau shin ah mäih cu kä kya man ci. A cun akiak man ah a kyak ung, nangmi naw avan nami hmat ciah nami pyen khai.

⁸ Nangmi cu ning ngaih gep gui vai ah kä nami kyak ci, ang tä sei hnung tuk küknet ciah ning khü gui ci gui ah ka ning hmat gui ci. Cun cu nang mi naw shin ah mawng api phi kä nami ng’zak man la, Nami hnga ung ng’thu ng’lung ät phi kä a gawk law man ah phäh ah kyak ci.

⁹ Chang gui naw ka ming ami m’taam vai ah ka m’lungshe nak cu ka k’üp ci nei: kei naw cun cu k’pang ä sei nangmi kä ning m’di gui khai nei.

¹⁰ Ngui cu meicang ung m’hling ne m’ciim ah mäih ah nangmi cu khüikha nak ah mei awn ka ning m’nüm gui ci nei. Cun ung phi nangmi a i ah kä nami mawng ci nei.

¹¹ Kei naw ka biphung cu ka mät ah hmawk ah kyak ci nei. Kei naw ka ming kä m’tamkhah nak vai ah kiak cicu kä ka bik khai nei, ka bäimang nak cu a u am phi kä ka ng’tu sak khai nei. Cun cu ka mät ah ka, ka mät bäng ah ka ah kyak khai nei.”

Bawipa naw Aghü ah Ang’vaihta Sairus

¹² Bawipa naw pyen ci, “Kei cu na ngai vä, ka chü ah chang Israel gui! Kei cu khanpughi, tün nak la khüm nak nei, kei bäng khanpughi nei!

¹³ Ka kut awn khomdek ah angnei gui cu pyan ne, khan kho cu ka ng’phiah sak ci. Kei naw khomdek la khan kho cu ka k’thäh ung ngami ang ghit ah law ne, ami mät naw ami mät m’dang lawk ci gui nei.

¹⁴ “Nami van, ng’bum ne ngai law vä! Kei naw ka ghü ah chang naw Babilon cu tuk khai, Ani naw kei ah ng’yak hlü ah bik khai, ciah a i khanpughi phi kä ng’cängbang man ci nei.

¹⁵ Ani ng’thu püi ne khü cicu kei ah ka kyak ci; kei naw ani cu lamshüm ne näng nak ka pek ci.

¹⁶ “Tuhbäi ka pei ah law ne, ka pyen cu ngai lawä. Ak htük ung kei cu akdeidang ah ka ng’thu ci, ka ng’thu angtäi sei akcang ah kyak sak ci.” (Tuhbäi uk tu Bawipa naw a huham na pe ne na tüi ci.)

Ak Chang gui ah Phäh ah Bawipa ah Pawngpüi

¹⁷ Israel gui ah theingcim ciah khanpughi, Ning hun gui ciah Bawipa naw pyen ci; “Kei cu Bawipa nami na khanpughi nei. Kei naw nami ni nak vai ning m’thei thang gui ne, nami hteh nak vai lam ka ning m’shüm gui hlük ci nei.

¹⁸ “Nangmi naw kei ah thumkhän bäng nami ngaih ah a kyak vaisü ung! Hriham gui cu kä kawi hlawt ciah tui ah mäih ah nami khan ah long khai süte nei! Näng nak cun phi tuikem ah gawk lawk ciah tui hnawk ah mäih ah nangmi ung gawk lawk khai nei.

¹⁹ Nang ah hta ng’shon gui cu laigin chü ah da khai gui, kei naw ngami cu a i yah ung phi kä ka dishum sak gui khai.”

²⁰ Babilon ung ka hteit vä, phyawng vä! “Bawipa naw a changshäm Israel cu hun pyi ci nei” ci ne, yei ne m’lau vä, kho ng’nü ung hmat sak vä!”

²¹ Bawipa naw a chang gui cu ng’ling ciah khong’gau akan law püi gui yah ung ngami cu tui kä gha ci gui. Ani naw ngami ah hmawk ah lung pou ung ka tui cu luh law sak ci; Ani naw lung cu teek ne ng’hmawn sak sei, acun ung ka tui lut lawk ci.

²² “Kak ciah chang gui ah phäh ah ngaih gep nak kä om ci nei” cine Bawipa naw pyen ci.