ISAIAH 47 - Cho Bible Common Language 2016

Babilon Ng’thumcha nak

¹ Bawipa naw pyen ci, “Babilon, na mang kiang ung ka kyum law ne, m’dek khan ah m’vut ung ngo ä. Ayanä nang cu ng’lami hta ah mäih ah a u naw kä a tuk man ah mang gaw ah na kyak ci, Cun ung phi nang cu kä na awigi hniphnoi ba ci! Tuhbäi nang cu khlei-htein ah na kyak ci!

² Getlung cu m’hlatä! Khai cu geetä! Na hmai uknak cu m’hlat ä! Na sui k’ni cu suut ä! Tui kah vai ah na k’hni cu zu chang ä!

³ Chang gui naw nang cu k’plui ci sei ning hmuk khai gui; Zungkia ne lü ng’aa ci sei ning hmuk khai gui. Kei naw phu ka tuk khai, a u naw kä na ma na hlawt khai.

⁴ Theingcim ciah Israel khanpughi naw na m’hlaut gui ci nei Ani ah ming cu m’gäi ciah Bawipa nei.

⁵ Bawipa naw Babilon cu pyen nak ci, “Adüm ah a hmüp nak ung ngo ä; Ngami naw pakhui gui ah ghangpughang nu ah kä ning khü ba khai gui nei?

⁶ Kei cu ka chang gui ah khan ah ka m’lungshe te ci; ka mät ah kä chang gui ah mäih ah ka om püi gui te ci; Nang ah huham ah ka ah ka tha gui te ci, Cun ung phi nang naw kä na chimgein gui ci, aghipa gui phi akghatah na om püi gui ci.

⁷ Nang naw angtäi sei, ghangpughang ah na kyak khai ah na ngai ci, shin gui cu nang naw na m’lung ung kä na tha ci, shin gui avan ng’pyi khai ciah phi kä na ngaih tüh ci.

⁸ Hüithaw nak m’hni tu aih ciah chang, shin cu Ngai ä, Nang cu ng’geing sei om ne na phyawng ciah na ngai ci. Nang naw, khanpughi ah mäih ah na dämduh ci, nang ah mäih a u kä om ciah na ngai ci. Nang naw a i yah ung phi hmeinu ah kä na kyak khai ah na ngai ci. Na hta gui a maih ah phäh ah na geinvai khai ah kä na ngai ci.

⁹ Cun ung phi, ashäng hta, hnüüp ät ung, cun gui avan cu kyak khai nei. Cecai nak gui avan na mang nak ah hnün ung Na cei la na hta gui cu maih khai gui nei.

¹⁰ “Nang cu akshe bi neta na bä ciah na ngai ci, a u naw kä ning hmuk ciah na ngai ci. Na cüivai nak la na lulang nak naw lam ning hma sak ci nei, Namät naw namät na pyen ci, ‘Kei cu khanpughi. Kei ah mäih a u kä om ci nei.’

¹¹ Leigai cu na khan ah gawk lawk khai, a i na ce cai nak naw phi kä ng’düm sak hlawt khai. Dishum nak cu ang ghit ah na khan ah gawk lawk khai — cun cu ng’mang ah phi kä na mang nak man ah kyak khai!

¹² Phyuh phyäi, phyuh theh gui avan cu na k’pan vai; Cun gui cu nang naw na hmaw yah ung tün ne na mang ah kyak ci. A cun gui naw ning m’htei ei hman khai; A cun gui awn na ga gui na k’täm mei hning hman khai.

¹³ Nang cu ning m’cum’cäi khai om pang sei phi, na huham maih ci nei. Cecai ci gui na chang gui naw hmai ah law ne ning hun u sä. Ngami cu aisi ah mawng thei thang ci gui, khankhaw ung zone gui ah k’bou ne geei ci gui, ngami naw cha ät ung ka naw cha ät a i ah kya lawk khai ci cu, ning m’thein u sä.

¹⁴ “Ngami cu kou ah mäih ah kyak ci gui, mei naw m’khih gi yawp khai! Ngami cu ami mät naw ami mät hun vai ah phi kä näng khai gui meidäi cu ngami ah phäh ah ling aih khai, mei awm vai ah mäih düt ah kä kyak ci.

¹⁵ Nang naw na ghin ah pum mung na täng pang sak gui ah ce cai gui ah m’cäi nak cu nang ah khan ah a cun ah kyak khai nei. Ngami ami van naw ning hteh ta u ne, ami hteh nak hlü phäh phäh ah htei khai gui nei, tumat phi nang ning hun khai kä pawih khai nei.”