ISAIAH 46 - Cho Bible Common Language 2016

¹ Shin cu Babilon khanpughi gui ah ng’pyi nak ah kyak ci nei! A zan ung Bel la Nebo cu khawihnah man ci gui, Cun ung phi tuhbäi sela ah phuih vai ah kyak sak ci gui.

² Agup gui naw ami mät naw ami mät kä hunhning a gui; Ngah mi cu khäm gui ne a hei ah hteh püi ci gui. Shin cu Babilon khanpughi gui ah ng’pyi nak ah kyak ci!

³ Na ngai vä, Jakob ah hta ng’shon gui, k’pawih ciah kei ah ka chang gui. Nangmi nami hmi law ung tün ne kei naw ka ning m’htei htang gui ci nei.

⁴ Kei cu nami na khanpughi nei, nangmi ghi ne nami lu ang pyok güt kei naw ka ning m’htei gui khai nei. Kei naw ka ning pyang gui ci, ka ning m’htei gui khai nei. Kei naw ka ning bawm gui khai, ka ning gung gui khai.

⁵ Bawipa naw pyen ci, “A u awn ang kei cu nami na m’täng kaw?” “Kei ah mäih a u baw om ne ang?”

⁶ Chang gui naw ami ghui ng’ip ung ghui cu k’plawk u ne, ngui cu khin nak awn khin u ne ta, khanpughi pyang khai ah ghui sheh ci cu ng’vat ci gui; cun kawn ah m’khuk dong ne, khawihnah ci gui!

⁷ Ngami naw ami phleing ung taih ne kawt ne hteh püi ci gui. Ngami naw hmun tumat ung tha ci gui. Ngami naw hmun tumat ung tha ci gui, a cun ung ani cu ng’düi ci, ani cu ang düih nak ung ka, kä ng’nawn hning ci. Chang tumat mat hteit ne ak taigü ung, ani naw kä m’shang hning ci, leigai ung phi kä hun hning ci.

⁸ “Shin cu shüm ba vä, hmakat chang gui; kei naw ka bi gui cu ngaih-tüh ba vä.

⁹ Cau a i ah kya man ci cu ngaih-tüh ba vä; kei bäng khanpughi ah ka kyak ah mawng, kei ah mäih a u kä a om ah mawng cu ng’kia ne pyen vä

¹⁰ A htük ge ung, kho ah ng’pyi nak vai ah mawng kei naw ng’cä ne ka pyen ci; cau pui ge ung a i ah kya lawk khai cicu kei naw ka pyen tu ge ci. Kei naw ka pawng pui gui cu kä yung kya phung khai cine kei naw ka pyen ci, Cun ah kyasei kei naw ka bi vai ah ka k’bäi phung cu ka bik khai nei.

¹¹ Kei naw akiang täng ung ka lawk khai ah chang tumat ka khü ci; Ani naw hmu kiung ah mäih ah m’tawn ne ng’phäi law ne, kei naw ka pawng püi phung bilo khai nei. Kei naw ng’thu ka pyen ci, ka pyen ah mäih ah bik khai nei.

¹² “Näng nak vai cu shou aih ciah ngai ci nei, lingkeng ciah chang gui, na ngai vä.

¹³ Kei naw näng nak ah khohnüüp cu ng’et khai ah ka law püi ci nei Cun cu kä shou aih ci nei. Kei ah näng nak cu kä shou aih ci nei. Kei ah näng nak cu kä shou cang khai nei. Kei naw Jerusalem cu ka hun khai a cu ah Israel gui m’tamkhah nak cu ka law püi khai nei.”