ISAIAH 44 - Cho Bible Common Language 2016

Bawipa Bäng nei Khanpughi

¹ Bawipa naw pyen ci, “Tuhbäi ngai vä, Israel gui, ka changshäm gui, ka ghü ah chang gui, Jakob ah hta ng’shon gui.

² Kei cu ning tüisho gui ciah Bawipa nei; Nangmi nami ng’tüi law yah ung kei naw ka ning m’htei htang gui ci. Kä nami kyih vai, nangmi cu ka changshäm, ka ghü ah chang, ka m’hni ah chang ah nami kyak ci.

³ Kei naw tui gha ciah khaw ung tui ka pek khai, khong’gau khaw ung tui lawng ka lon sak khai. Kei naw nami htanau gui ah khan ah ka mümcha ka yuk chah khai, nami hta ng’shon gui ah khan ah ka hriham ka yuk chah khai.

⁴ Ngami cu tui akni ah gah ciah khu m’ghaw ah mäih ah, tui long ciah tui pei ah hnum ghing ah mäih ah kyak khai gui.

⁵ “Chang gui tumat ci tumat ci naw, kei cu Bawipa ah na chang nei” cik khai gui. Ngami cu Israel chang gui ung law ne ng’dawn tuk khai gui. A chang sing naw ami ban ung Bawipa ah ming awn m’hnüt khai gui, ami mät naw ami mät khanpughi ah chang tumat ah ng’khü khai gui.”

⁶ Bawipa, Israel gui uk gui ne, shungvong gui ci, m’gäi ciah Bawipa naw shin ah pyen ci; “Kei cu tün nak, khüm nak la tumat bäng ah Khanpughi ah ka kyak ci; a hei khanpughi kä om ci, kei bäng ah kyak ci.

⁷ Kei naw ka bi ah mäih ah tumat mat naw bi hning ne ang? A tün nak bäih ung ka naw khaw akhüt nak ah khin ung khüt sei, kya lawk khai ah amawng avan ng’cäng bang hning ci om ne ang?

⁸ Ka chang gui, kä kyi en vä! Nangmi naw nami hmat ci, cau pui tüi ne tuhbäi ung khüt khai ah, kya lawk khai ah amawng avan cu kei naw ka pyen ci, nang mi cu ka saksi ah nami kyak ci. Kei ah kawn ah khanpughi a hei om ba ne ang? Kei naw kä ka ng’yak man ah huham mah ciah khanpughi om ne ang?”

Agup Khawihnah nak M’lepse ci.

⁹ A gup pyan ciah chang gui avan cu a kholä ah kyak ci, ami tuk-äih nak ah khanpughi gui cun phi akholä ah kyak ci. Shin ah khanpughi gui khawihah ci gui cu, am dauh gui, a i kä hmat ci gui ah kyak ci. Ngami cu lü ng’aa khai gui.

¹⁰ Khanpughi ah pyen ne khawihnah vai ah a gup pyan cu, kä nik ci nei!

¹¹ A cun khawihnah ciah chang nü cu m’shung nak gak khai nei. A gup pyang ci gui cu hnicim chang gui nei, i kä ng’taih ci nei. Ngami cu law ne ng’cet law u sä — ngami cu cäi ne ng’hlet ne, lü ng’aa khai gui nei.

¹² M’si sheh naw m’si cu la ne mei ung m’hling ci cun kawn ah m’si ng’ki cu a kut awn chang ne, m’si cu teei ne pyang ci. Ani cu cung ah bi ne, ei cawi ci, tui gha ci, baang ci.

¹³ K’penkbi naw k’peen cu nüt ci. A gup cu lung bawk awn geei ci. A m’shük gui awn vüt ne pyang ci, chang ah müi ah pyang ci, chang ah gup akiom a im kyong ah a tha vai ah pyang ci.

¹⁴ Ani naw amang vai ah ceda sing cu chuk ci, bung ah ka he sing, käcung m’htai ghing cu ghü ci. Ani naw hlim sing cu geit ne, adäm ng’ghaw nak vai ah kho k’aa cu ngäng ci.

¹⁵ Chang naw sing ghing ah am cawt cu singah mang ne, am cawt cu a gup ah pyang ci. Ani naw sing am cant cu mei ah awn vai la m’htut ang shai nak vai ah mei ah cik ne, am cawt cu khanpughi ah pyang ne khawihnah ci.

¹⁶ Sing amshah cu mei ah cik ci; meh ng’shai ci, ei ci, bä ci cik ci. Ani naw mei awm neta a pyen cu, “Ni aih ci nei, lum aih ci nei! A i hlawk ah nik ciah mei ang?”

¹⁷ K’pawih ba ciah sing cu ani naw a gup ah pyang ci, cun kawn ah ani cu m’khuk dong ne, a cun cu khawihnah ci. A cun ah ani naw taigü neta a pyen cu, “Nang cu ka ning khanpughi nei, na hun ä!”

¹⁸ Cun ah chang gui cu aang aih u ne a i ami bi cu kä hmat ci gui. Düng nak kä ami hmuh vai ah ami mik m’shing ne, ami m’lung khai ci gui.

¹⁹ A gup pyang ciah chang naw, “sing amshah cu mei ah ka cik ci, mei k’cak ung m’htut ng’shai ne, mah ng’shai ne ka ei ci. K’pakiha ba ciah sing cu a gup ah ka pyang ci. Shin ung singtawn ah pei ah kei cu ka m’khunkdong ci” a ci thei nak vai ah ani ung cüivai lunglang nak kä om ci nei.

²⁰ Ani ah bilawh cu m’vut ei ah mäih ah kyak ci. Ani ah anglam ciah ang ngaih-tüh nak naw lam hma sak ciah kyasei m’htei htang tu vai ah phi kä kyak ci nei. Ani naw a kut ung akawh ah agup cu khanpughi ah kä kyak cicu amät naw amät kä hmat ci.

Bawipa , Tüisho ci la Hunbawi

²¹ Bawipa naw pyen ci, “Israel gui aw, shin cu shüm ba vä; shüm ba vä, nangmi cu ka ning changshäm gui nei. Ka ning changshäm gui vai ah ka ning tüishogui nei, api ah phi kä ka ning m’hnih gui khai nei.

²² Kei naw nami katnak cu kho ng’mei ah mäih ah ka zon sak ci nei. Kei ah law ba vä, kei cu nangmi ning hun gui ciah ka kyak ci nei.”

²³ Zei ne m’lau vä, nangmi khankhaw gui! M’lau vä, khomdek ung ak thuk pi ah hmun gui! Sing ghing gui avan lah khom’htung gui m’lau vä! Bawipa naw a chang Israel gui a hun nak awn, a däm-duh nak cu dang sak ci nei.

²⁴ “Kei cu Bawipa, nami Hunbawi nei; kei naw nangmi ka ning tüisho gui ci nei. Kei cu bawipa, apäng avan Tüisho ciah ka kyak ci nei. Kei ka mät bäng naw khan khaw cu ka k’phiaat ci nei; kei naw khomdek ka pyan yak ung a u naw kä na bawm ci nei.

²⁵ Kei naw cängbang ci gui cu akgu ah kyak sak gui ne, cecai ci gui ah pyen gui ka m’shet yawp ci. Cüivai ci gui ah ng’thu cu kei naw k’beng ne, Ngami ah cüivai nak cu gu-aang nak ah a kyak ah mawng ka dang sak ci.

²⁶ Cun ung phi kei ah ka chang shäm naw cängbang nak abi ah a kyak ung, kei ah ka pawng püi gui m’than khai ah ng’shächang ka tüih ah a kyak ung. Cun ah pawng püi nak gui la cängbang nak gui cu akcang ah kyak khai ah kei naw ka bik ci. Kei naw ka m’thein gui ci. Jerusalem ung chang gui om ba khai gui, Judah mang gaw gui co ba khai gui. Cun ah mang gaw gui cu didam nak ung ka, Tho law ba khai gui.

²⁷ Kei naw thumkhäm m’kha ät awn tuinu ka kawi sak ci.

²⁸ Kei naw Sairus cu ka pyen nak ci, ‘Nang naw kei ah phäh ah na uk khai nei; Kei naw ka ning bi sak hlü cu nang naw na bik khai nei. Jerusalem cawh ba vai la Taigüim ah angnei k’süm vai ah, nang naw ng’thu nak’bäi vai nei.’”