ISAIAH 41 - Cho Bible Common Language 2016

Israel gui ah Khan ah Khanpughi ah Ng’hteicha nak

¹ Khanpughi naw pyen ci, “Düm ah, kei cu na ngai vä, nangmi kho asho khaw ah ka gui! Nami mawngma cu yung ah m’kai vai ah pawng püi ge vä; Nangmi nami ng’thu nak hning vai om khai nei.

² “Akhei täng ah ka ng’näng ciah chang law püi ne, a hteh nak päng ah ng’näng ciah chang law püi ne, a hteh nak päng ah ng’näng sak ci cu, a u ang? Ghangpughang gui la chang pakhui gui ah khan ah anäng nak pek cicu a u ang? Ani ah khimsem naw ngami cu m’vut khui ah mäih ah tuhnim gui ci nei.

³ Ani naw gawt ne tu gui ne, gai ne hteit ne k’täm gui ci, Ani cu zangkhai aih sei akhaw naw m’dek phi kä zu tawn ba ci.

⁴ Shin ah kya lawk khai ah bik cicu a u ang? A u naw ang ng’shonlam manngma a kyak sak ve? Kei, Bawipa cu ang tün nak ung ka om ci, Kei, Bawipa cu akhüt nak ung phi ka om khai nei.

⁵ “Ashou nak khaw ah om ciah chang gui naw kei naw ka bi cu hmu pyi ci gui; Ngami cu kyi ne, ng’thüng ne ng’hlet ci gui. Cun ah kyasei ami van law ne ng’bum lawk ci gui.

⁶ Phisak ci gui tumat la tumat ng’bawm tu u ne, thagui ng’pe tuk ci gui.

⁷ Im co ci naw ghui shep ciam, “Na bi bä ci!” cik ci. A gup ng’mi khai ah teei ci naw m’si teei ciam k’thagui pek ci. Ngami naw, “Na m’cak cu nik ci nei” ci u ne — a gup cu m’si awn hnen ne akni ah hmoh ci gui.

⁸ “Cun ung phi, Nangmi, Israel ka changshäm gui, Nangmi cu ka ning ghü gui ah chang, ka teihpüi, Abraham ah htangshon ah nami kya ci.

⁹ Kei naw khocawi ah ka, ka ning lawpüi gui ci; kei naw shou pikbäih ciah khokem ung ka, ning khü gui ne ka ning pyen nak gui cu, ‘Nangmi cu kei ah ning changshäm gui nei.’ Kei naw kä ka ning hnungtuk püi gui ci, ka ning ghü gui ci.

¹⁰ Kä kyikawk vä kei naw ka ning om püi gui ci nei! Kei cu nami na khanpughi nei — a i naw kä ning m’kyih sak gui khai nei! Kei naw ka ning khüi ghat sak gui khai, ka ning m’htei gui khai; kei naw ka ning shungvong gui khai, ka ning hun gui khai.

¹¹ “Nangmi ning m’lungshe na gi ci cu, nat nak, lüng’aa nak gah khai. Nangmi hnung’tuk ne, ning tukpüi gui ci cu sik khai.

¹² Cun kawn ah khomdek ung kä ng’dang tu ba khai.

¹³ Kei cu Bawipa, nami na khanpughi nei; kei naw k’thagui ning pe gui ne, ka pyen cu, ‘Kä nami kyihkyawk vai nei, ka ning m’htei gui khai nei.”

¹⁴ Bawipa naw pyen ci, “Israel gui, nangmi nami zaw ken pang ung phi, kä nami kyihkyawk vai nei, kaning m’htei gui khai nei. Kei, Theingcim ciah Israel khanpughi cu nangmi ning hun gui ciah ka kyak ci nei.

¹⁵ Kei naw nangmi cu aha akthai, ak ghaat om ciah htang-neen nak ah mäih ah ka ning pyang gui khai. Nangmi naw khomhtung gui cu neen ne nami m’di khai; khogui gui cu m’vut ah khui khai gui.

¹⁶ Nangmi naw khokhi ung nami m’shon gui khai; khokhi naw zon gui khai, khokhinu naw k’püipawng gui khai. Cun kawn ah nangmi cu nami yeikyai khai, a i ah kyasei ci ung kei cu nami na khanpughi ah kyak ci; Israel gui ah theingcim ciah khanpughi, kei cu nami na m’tam khah khai.

¹⁷ Ka chang gui naw tui ng’ya hlü ne ami shui sang ung tui gha u ne ami gawn aket sang ung, kei, Bawipa naw ami taigü cu ka m’shang gui khai; kei, Israel khanpughi naw kä ka nawng gui phung khai.

¹⁸ Kei naw ng’yung makde ung tuinu gui lon sak ne, khong’nawi gui ung tuihta gui ka lon sak khai. Kei naw khong’gau kho cu tui k’büm guiah ng’lat sak ne, khokde khaw ung tui ka lon sak khai.

¹⁹ Kei naw khong’gau khaw ung ceda sing, akacia sing, muratu sing la olive sing gui ka ghing sak khai. Khomdek ung sing gui be ne ghing khai, m’htai ghing gui, arit ghing gui cypress ah bung khai.

²⁰ Kei, Bawipa naw, cun ah ka bi cu, chang gui naw hmuk khai gui, hmat khai gui. Israel gui ah theingcim ciah khanpughi naw shin ah kya lawk khai ah apian cu ngami naw hmat lawk khai gui. Khanpughi ah Ng’shei ci gui cu Bawipa naw ng’längna püi gui ci.

²¹ Bawipa, Israel gui ah ghangpughang naw shin ah pyen ci: “Nangmi, chang pakhui gui ah khanpughi gui, nami mawngmaw cu m’dang law vä. Akbä pikbäih nami pyen nak hlü cu law püi vä!

²² Shin ung law ne, a i ah kya lawk khai ci cu, ng’ cängbang law vä, Cun ung vah, cun gui a kyak law ung mikmi naw mi hmat khai. A yanä ka ah amawng ama gui cu yung ah m’dang ne pyen ne, a cun gui cu a i ang, ciah nami thein gui vä.

²³ Ngawi ah a i ah kya lawk khai cicu na m’thein gui vä — Cun ung nangmi khanpughi ah nami kyak cu kami hmat khai nei! Akni bi vä, käcung, leigai baw law püi vä; kyikyawk, kyih aa nakawn na be sak gui vä!

²⁴ Nangmi la nami bi gui avan cu akholä nei; Nangmi ning khawihnah ci gui chang gui cu shemshai sak ci gui nei!

²⁵ “Kei naw ak kyang täng ung om ciah chang tumat cu ka ghü ci nei; A siip täng ung ning tu law gui khai ah ka law püi khai nei. Ani naw uktu gui cu, ng’nai ah mäih ah, k’am shep ci naw k’am dek a neen ah mäih ah kai na gui khai nei.

²⁶ Nangmi nami hman ci, cine, keimi naw kami pyen vai ah, nangmi ung ka a u naw, shin ah kya lawk khai ci cu ng’cäng bung khai ang? Nangmi ung ka a u naw phi, shin ah mawng thu m’kha ät phi kä pyen ci; Nangmi naw a i nami pyen phi a u naw kä ng’yak ci!

²⁷ Zion am m’thein htük cicu kei, Bawipa ah kyak ci nei; kei naw Jerusalem ah ng’shä tüi ne ka pyen sak cu, ‘Na chang gui lawk ci gui nei! Ngami cu ami im ah law ba ci gui nei!

²⁸ Kei naw khanpughi gui ka teng gui ung, a u naw phi, i phi kä pyen ci; kei naw ka ng’shi cu tumat naw phi kä k’phlan hning ci.

²⁹ Shinah khanpughi gui avan akholä nei; ngami naw a i phi kä bi hning ci gui nei. Shin ah a gup gui cu ami k’tha maih ne ami huham kä om ci nei.”