ISAIAH 40 - Cho Bible Common Language 2016

Ngaih u ah Ng’thu gui

¹ Nami khanpughi naw pyen ci, “Ka chang gui m’lung üp sak gui ä,” “M’lung üp sak gui ä!

² Jerusalem chang gui k’thamah nak pe gui ä. M’thein gui ä, ami yaica nak cu shou lawk ci nei, tuhbäi ngami ah natnak cu m’geinsei pyi nei. Ngami ami katnak avan ah phäh ah akbe ah ka m’kyuk gui pyi ci nei.”

³ M’lau ciah k’aw tumat naw, “Bawipa ah hmawk ah mi khanpughi ah hmawk ah khonggau lam cu k’sei m’ghan vä!

⁴ Ng’nawi päng k’be vä; m’htung päng m’hnep vä. Khumhtung gui cu khodou ah kyak khai nei.

⁵ Bawipa ah bäimang nak cu m’than lawk khai, hnicim chang avan naw hmuk khai. Shin cu Bawipa amät ah shaitak ah kyak ci nei.”

⁶ M’lau ciah k’aw tumat naw, “Ng’thu ng’shäu vä!” ci sei, “A i ng’thu ka ng’shäu vai ang?” cine ng’shi ung. “Shäu vä, hnicim chang avan cu m’ghaw ah mäih ah kyak ci nei; Ngami cu bung hmu ah cheipai ah mäih ah akshou kä om khai gui.

⁷ Bawipa naw ami khan ah kho akhi law sak ah a kyak ung, m’ghaw gui cu chawng na, cheipai gui cu ng’yai khai nei. Chang gui cu m’ghaw ah mä kä näng tuba hning ci gui nei.

⁸ Ä, M’ghaw cu chawng ne, cheipai cu ng’yai ci, cun ung phi khanpughi ah ng’thu cu, khong län ung khäng ci nei.”

⁹ Jerusalem, m’htung hlüng ah hang kai ne, thuni cu ng’shäu ä! Zion, ak’aw ng’shan awn ng’khü ä; thuni cu ng’shäu ä! Ng’thu ä, kä kyi en ä. Judah khaw ung ami gawnu gui m’thein gui vä, ami khanpughi law sang ci nei!

¹⁰ Uktu Bawipa cu a huham awn uk khai ah lawk ci nei. Ani naw a gun ah chang gui law püi gui ci nei.

¹¹ Ani naw a htaw gui cu htoshäm ah mäih ah m’htei gui khai; Ani naw ktome hta gui cu k’bum gui ne, a kut awn bäm gui khai; Ami nu gui cu ang awigi ah lamshüm gui khai. Israel gui ah Khanpughi.

M’täng nak vai kä Om ciah

¹² Tuinu a kut awn shum ne nüt ne, khomik a kut awn khap ne nüt hning ciah chang om ne ang? Khomdek ng’cü khap ung nän ne, khomhtung khogui khin nak awn khin hning ciah chang om ne ang?

¹³ Bawipa naw a i abi vai ah m’thein hning ci om neang? Ani m’theithang hning ci, m’cäi m’cat hning ci om ne ang?

¹⁴ Shichah nak vai, hmuhmat nak vai ah khanpughi naw a u ng’shikca man naw?

¹⁵ Bawipa ah ma ah chang pakhui gui cu akholä nei, Tui m’ceu ät hlawk ah phi kä kyak ci gui nei: A shou nak ah khawkawng gui cu m’vut ah mäih ah yaang ci gui nei.

¹⁶ Lebanun khawbung ung om ciah khisa avan cu mi khanpughi khawihnah nak vai ah kä ng’büh khai nei, a cun ung sing ghing gui phi mei cih nak vai ah kä ng’büh khai nei.

¹⁷ Chang pakhui gui cu ani ah ma ah akholä ah kyak ci gui nei.

¹⁸ Khanpughi cu a u awn m’täng vai ang? Ani a i ah mäih lawk ci, ci cu, a i cha ah m’dang vai ang?

¹⁹ Ani cu chang ah pyan ah a gup ah mäih ah kä kyak ci, Cun cu m’si shep ci gui naw ghui awn vook ne, ang’nei ngui awn ami pyan ah kyak ci. Cun cu m’si shep ci gui naw ghui awn vook ne, ang’nei ngui awn ami pyan ah kyak ci.

²⁰ Ngui la ghui kä näh tuk ci naw, kä thu hning ciah sing cu ghü ci. Ani naw shehpiang thei ciah chang cu, ghüh ne, kä kiung tääk khai ah a gup u pyang ci.

²¹ Khomdek a i cha ah ang tün law cu kä nami ng’ya man ne ma? Cau ge ung a u naw kä ning m’thein gui man ne ma?

²² Cun cu khomdek ah khan, khomik ah hnu ung, amät ah mang kiang ung ngok ci naw apian nei; m’dek khan ung om ciah chang gui cu m’ling hta gui ah mäih ah kyak ci gui nei. Ani naw khomik cu zidung ah mäih ah k’phiat sei, ak kyong ah om nak vai ah phung ah maih ah kyak ci:

²³ Ani naw huham mah ciah uktu gui cu yuk chagui ne, akholä ah kyak khai gui ah hnim gui ci nei.

²⁴ Ngami cu geit thai, pya thai ciah geit awn täng ci gui. Bawipa naw kho akhi law sak ung ngami cu chawng u sei, kou ah mäih ah zon gui ci.

²⁵ Theingcim ciah khanpughi cu a u awn m’täng hning vai aw? Ani awn täng ci a u baw om ne ang?

²⁶ Khomik cu han dan vä! Nami hmuh ah aisi gui cu a u naw a pyan ang? Gakap ah mäih ah lam shüm gui ci naw apian nei, Ani naw a i chü lawk ci gui ah hmat gui ne, ami ming phäh phäh ung khü gui ci — Ani ah huham cu dämduh aih ne, Cun gui ung ka tumat phih kä chük man ci nei!

²⁷ Israel chang gui, Bawipa naw nami khüi kha nak kä ning hmat gui ciah pyen ne, kä taga ciah nami yaica ung kä ning m’htei gui ciah pyen ne, a i ah kyasei ng’thu nami m’da ang?

²⁸ Kä nami hmat ne ma? Kä nami ng’ya man ne ma? Bawipa cu khong län ciah khanpughi nei; Khomdek avan ani naw tüisho ci nei. Ani cu a i yah ung phi kä cümbawng man ci nei. Ani ah ngaih-tüh cu a u naw kä hmat hlawt ci nei.

²⁹ Aktha maih ci, bawng bai cicu ani naw thamah nak pek ci nei.

³⁰ Hmaw chang gui phi ami k’tha ken thei ci; chang nong gui phi tha maih sei kyu ng’täk thei ci gui.

³¹ Cun ung phi Bawipa naw am htei vai ah ng’ap ciah chang gui naw, thagui akthai hmuk khai gui. Ghui zongzung ah mäih ah ami ng’phia phiat ne zong khai gui, ami dawng ung phi kä bawngbai khai gui; lam ami hteh ung phi kä khüi kha khai gui.