ISAIAH 39 - Cho Bible Common Language 2016

Babilonia ah ka, Ng’shä Chang gui

¹ A cun ah khin ung Babilonia ghangpughang, Baladan ah hta Metudach Baladan naw Ghangpughang Hezekiah a gaw cu ng’ya neta, cala letsawng cu m’khäh ci.

² Hezekiah naw ng’shächang gui cu don gui neta, ang bühmang nak cu m’hnuh gui ci-ngui gui, ghui gui, tui ng’ui la situi gui k’htei gui, avan ah kyak ci. A m’küm kyong ung, a uk nak khaw avan ung, kä am hnuh gui a i kä om ci.

³ Cun kawn ah prophet Isaiah naw ghangpughang Hezekiah law neta ng’shik ci, “Shin ah Chang gui a hawi ka ang ami law, a i ang ami ning pyen nak?” Hezekiah naw am shan ba cu, “Ngami cu aktä ah athuuk nak ah khopäng, Babilonia ah ka lawk ci gui.”

⁴ Mang im kyong ung, a i ang ami hmuh? “Ngami naw apäng nü hmuk ci gui m’kün kyong ung ka, kä ka m’hnuh gui a i phi kä om ci.”

⁵ Isaih naw ghangpughang pyen nak ci, “m’gäi ciah

⁶ Bawipa naw pyen ci, Mang im kyong ung ka apäng avam, tuh ngawi ung khüt sei nami pupa gui naw ami m’küm apäng avan, gui cu Babilonia ah hteh püi yawp khai gui. A i kä k’pawih khai.

⁷ Namät ah htangshon ang lüng gui cun phi hteh püi u ne, Babilonia ghangpughang ah mang im ung hnumi shäw ah ng’bi sak khai gui.”

⁸ Ghangpughang Hezekiah naw ani ah ghin sang ung dimdeeih nak la ngaih gep nak om khai ciah ngai neta, ani “Bawipa ung ka ng’thu na na pek law cu nik ci nei” cik ci.