ISAIAH 37 - Cho Bible Common Language 2016

Ghangpughang naw Isaiah ang Shithäh nak

¹ Ghangpughang Hezekiah cu cun ah ng’thu ang yak vai am, thüi ne a sui gui k’teek ne, thüisui sui neta, Bawipa ah Taigüim ah hteit ci.

² Ani naw mang im ung angvaipi bawi Eliakim, mang im secretary shebna la taigü aghamhta gui cu Amoz ah hta prophet Isaiah ah tüi gui ci. Ngami cun phi thüisui sui ci gui.

³ Shin cu Isaiah am ami pek vaiah am thein gui ah ng’thu ah kyak ci; “Tuh ngami cu yaica nak ah hnünp ah kyak ci; mikmi cu m’kyuk nak gah ne lüng’aa ne mi om ci. Mi’kmi cu hta law ge vai neta, ak tha maih ciah hnumi ah mäih ah mi kyak ci.

⁴ Assirian ghangpughang naw abawi ng’vaipu cu ghing ciah khanpughi gheettaap khai ah tüi ci. Bawipa nami khanpughi naw shin ah gheet nak su ng’ya neta, cun ah ng’thu ci gui cu m’kyuk sä. Cun ah kya sei, cun ah k’pawih ba ciah mi chang gui ah phäh ah khanpughi ah k’taigü vä.”

⁵ Isaiah naw Ghangpughang Hezekiah ah ng’thu ng’ya neta,

⁶ Shin ah m’shang ne m’khäh law ba ci: “Bawipa naw ning m’theing gui ci nei, ani naw kä hing hun gui khai nei, cine ami pyen ah phäh ah Israel gui kä nami kyih en gui vai nei.

⁷ Bawipa naw ghangpughang am ng’thu düt cu ng’yak sak khai, acun naw ani cu amät ah khaw ah hteh ba sak khai nei, cun kawn ah ani cu Bawipa naw amät ah khaw ung ngawn khai.”

Assirian gui naw M’kyih nak ah Ca M’khäh law ba ci gui

⁸ Ghangpughang naw lachish cu hteh ta ne libnah mang gaw pei yun ah ng’tuk bik ciah Assirian bawi naw ng’ya ci; cun ah kyasei ani ng’gepai püi khai ah a cu ah hteit ci.

⁹ Sudan Ghangpughang Tirhakah matawn ciah Egypt gakap cu ngami tu gui khai ah lawk ci gui nei, ciah ng’thu cu Assirian gui ung gawk lawk ci. Ghangpughang naw cun cu ng’ya net, ani naw Judah Ghangpughang Hezekiah am co gu ne pe ne,

¹⁰ ani am ami m’thein vai ah a pyen nak gui cu, “Nang naw na ngaih u ah Khanpughi naw, nang cu kei ah kut ung kä na ng’kiak khai ah ning m’thein ci nei, cun ung phi acun naw kä ning phiui hnawk en sä.

¹¹ Assinian ghangpughang naw am di vai ah akbäi pyi ah khopäng gui ah khan ah a i ah a bi cu nang naw na ng’ya pyi ci. Nang na phiawang khai ah na ngai ne ma?

¹² Ka pupa gui naw kozan, Haran la Rezeph mang gaw gui cu m’di u ne, Telassar ung om ciah Betheden chang gui cu ngawn gui ci gui, a u ami khanpughi naw phi kä hun gui ci nei.

¹³ Hamath, Arpad, Sepharvaim, Hena la Ivvah mang gaw gui ah ami ghangpughang gui cu a hawi ang?” ciah kyak ci.

¹⁴ Ghangpughang Hezekiah naw cun ah ca cu lan püi ci gui ah kut ung ka la neta phat ci. Cun kawn ah ani cu faigü l ah hteit ne, cun ah ca cu Bawipa ah ma ah m’shän neta,

¹⁵ taigü ci,

¹⁶ “M’gäi ciah Bawipa, Israel khanpughi, cherubim ah khan ah na mang kiang nak ci, nang bäng nak ci, nang bäng khanpughi ah na kyak ci, khomdek khan ung uknak khaw avan na uk ci nei. Nang naw khomdek la khomik na tüisho ci nei.

¹⁷ Tuhbäi, Bawipa, na ng’ya gui ä, keimi ah khaw ah a i ah kyak ci, cicu na yuk teng gui ä. Seunacheirib naw nang ning gheet ne a pyen ah ng’thu avan cu yuk ngai ä, ghing ciah khanpughi aw.

¹⁸ Mi van naw mi hmat ci nei, Bawipa, Assiria ghangpughang gui naw pakhui akda cu m’di u ne, ami khaw gui cu m’shiu ci gui,

¹⁹ ami khanpughi gui cu m’khih gui ci-cun ah kya sei, ngami ung khanpughi kä om ba ci, hnicim chang naw a kut awn a pyan ah sing la lung a gup gui bäng om ci.

²⁰ Tuhbäi, Bawipa kami khanpughi, Assirian gui ah kut ung na gung gui ä, cun ung khomdek khan ah chang pakhui avan naw nang bäng cu khanpughi ah na kyak ciah hmat khai gui nei.”

Ghangpughang am Isaiah ah Thu M’khäh

²¹ Ghangpughang ah täigü, am shan nak ah Isaiah naw ghangpughang Hezekiak am, ang thumkhäh cu

²² Bawipa naw pyen ci, “Sennacherib aw, Jerusalem mang gaw naw ning gaih tuk ci nei, ning päipih ci nei.

²³ A u na gheet taap na gaih, m’gin ciah ang na ngaih? Nang naw, kei Theingcim Israel Khanpughi cu kä na na chang m’sui ci nei.

²⁴ Hlüng pibäih ciah Lebanon khomhtung gui, na yatha gui avan awn na näng ah mawng khähghah nak vai ah na chang-shäim gui na tüi lawk ci nei. Nang naw a ng’shäi pibäih ah ceda sing ghing gui, akni pibäih ah m’htai ghing gui cu chu pit yawp ne, ak thuk nak pikbäih ah bungpuk ah na gawk awn na khähghäh ci nei.

²⁵ Nang naw akhaw hei khaw ung tui shawk ne, tui na awk ciah pyen ne, na gakap gui naw ami khaw awn nile tuinu kawi khai ah leh ci gui ah pyen ne, na khähghah ci nei.

²⁶ “Caupui ge ung kei naw shin gui ka pawng püi ca kä na ng’ya man ne ma? Cun u tuhbäi ka bi law ah kyak ci khäng ciah mang gaw gui ng’awt bum ah ng’lat sak nak ah huham cu nang am kei naw ka ning pek ci nei.

²⁷ Cun ung om ciah chang gui cu a huham kaa gui nei; ngami cu kyi aih ne tuu ci gui nei. Ngami cu ak kyang täng ung ka, kiang khokhi ling akhi law ung ak khi gui ah loma ah khum’ghaw la m’dicih khan ung pyon ciah k’taa ah mäih ah kyak ci gui nei.

²⁸ “Cun ung phi nangmi ah mawng avan ka hmat ci, a i nami bi, a hawi nami hteh, a i hlawk ah nami m’lung she sei nami na hnung’tuk püi cu, kei naw ka hmatci.

²⁹ Nangmi ah m’lungshe nak la nami ng’shei nak ah mawng cu kei naw ka gah pyi ci nei, kei naw nang cu na lua ung pyüm awn vüt ne, na m’gawng ng’hling tha neta, na law nak ah lam ung ka ning hlah ba sak khai.”

³⁰ Cun kawn ah Isaiah naw ghangpughang Hezekiah am, “Shin cu kya lawk khai ah a mawng m’hnüt nak ah kyak ci nei. Tuhshikum la hnengkum nangmi naw m’ghawhtang bäng nami ei khai nei. Cun ung phi lawba ciah khokum ung nangmi naw ktang phu ne nami khäm khai nei, sapyit gui geit ne, am theih nami ei khai nei.

³¹ Cun ung phi Judah ung k’pawih ci gui läi cu m’dek ung thauk sei ng’yung pya ne, m’theih pai ciah mäih ah kyak khai gui nei.

³² Jerusalem la Zion m’htung ung k’pawih khai ah chang gui om khai gui nei, a i ah kyasei ci ung m’gäi ciah Bawipa naw cun ah kya lawk khai ah akbäi pyi ah kyak ci nei.

³³ “Shin cu Assirian ghangpughang ah mawng Bawipa naw ng’thu a pyen ah kyak ci: ‘Ani cu shin ah mang gaw ung kä lut lawk khai, m’la thek ät phi kä kap hlawt khai. A i gakap phi shawi kawt ne mang gaw peiah kä lawk khai, gaw khai nak vai ah a i m’vang phi a u naw kä co khai.

³⁴ Ani cu shin ah mang gaw ung kä lut ling ne, a law nak ah lam ung ng’hlat ba khai. Kei, Bawipa naw ka pyen nei.

³⁵ Kei naw shin ah mang gaw cu shungvong ne ka ngäng khai, cun cu kamät m’tamkhah vai ah hmawk la ka chang shäin David ung shaika tak ah hmawk ah kyak ci.”

³⁶ Bawipa ah khanchang cu Assirian gui ah phung ah hteit neta gakap 185, 000 cu ngawn gui ci. A ngani ung khaw thaih ung ngami cu ami van si ne ng’zän ci gui!

³⁷ Cun ung Assirian ghangpughang Sennachezib cu a hwai m’hlat ne ng’hlat ba ne Nineveh ah hteit ba ci.

³⁸ Hnüüp ät ung ani naw a khanpughi Nisrok cu a Taigüim ung a khawihnah sang ung a hta hnih ah kyak ciah Adrammelech la Sharezer naw ami cu ani khimsem awn ngawn ni neta Ararat kho ah phyawng ne om ci goi. Ahei a hta gui ung ka Esarhaddon cu ghangpughang ah ngo ba ci.