ISAIAH 34 - Cho Bible Common Language 2016

Khanpughi naw Aga gui M’kyuk gui khai.

¹ Law vä, chang pakhui avan! Ng’bum uneta ngai vä. Khomdek apum la acun ung om ciah a ghing avan shin ung law ne ngai vä.

² Bawipa cu chang pakhui avan la ami gakap gui avan ah khan ah m’lungshe ci nei. Ani naw m’di gui vai ah m’kyuk gui ci nei.

³ Ngami ah gook gui cu a u naw kä phuh gui khai, awn ung ng’zäu ne thu ne ng’eng khai gui, khomhtung gui cu si bäng ah sen khai gui.

⁴ Hni la cha ni, aisi gui cu m’vut ah khai gui. Khan kho mik cu k’sho ah mäih ah ng’tho ne maih khai, aisi gui cu, thei sing, käcung sapyit ung ka a hnah gui a kiawi ah mäih ah kiawi khai gui.

⁵ Bawipa naw akhimsem cu khankho ah pawng püi ge ci, ani naw m’di gui vai ah am kyuk pyi ah kho chang Edom kho cu tuhbäi tuk khai.

⁶ Khawihnah nak ah htome la me ah asi la athai khim ung a kawk ah mäih ah ani ah khimsem cu ngami ah si lo thai naw küm khai. Bawipa naw shin ah khawihnah nak cu Bozrah mang gaw bik khai; ani naw shin ah däimduh ciah ngawn sih nak cu Edom kho ung bik khai.

⁷ Chang gui cu seipat k’zäng ah mäih, vantang nong ah mäih ah kyu ne ng’täng khai gui, khomdek cu si bäng ah sen ne, ami thai naw küm khai.

⁸ Cun cu Bawipa naw Zion a gun nak la aga gui ah khan ah phu atuk nak ah akhin ah kyak khai.

⁹ Edom kho ah tuinu gui cu kataza ah ng’lat khaigui, khonglei cu sulphur ah ng’lat khai. Khopäng avan cu kataga ah mäih ah ui khai.

¹⁰ Cun cu amü a hnüüp ui sei, meikhu cu angtäi ah tho khai. Ang shon päng päng ung shin ah khaw ca aka law pi ah kyak khai. A u chang phi shin sun ne kä hteit ba khai.

¹¹ Pängpät gui la kap gui naw khaw avan cu om nak khai gui. Bawipa naw shin cu a i kä a tüisho pha ung kaah mäih ah khohäu ah kyak sak khai.

¹² Khopäng uk khai ghangpughang kä om ci, ang vaihta gui ami van hteit yawp khai gui.

¹³ Mang im kyong gui avan la gawnu k’pang gui ung hlingbung, hlingcam gui tho khai, cun gui ah ng’lung ah

¹⁴ ui gui la päng pät gui om khai gui. Khisa gui cu a cun ung Tula khai gui, khoshe gui phi ami mät ng’khükou tuk khai gui. Kwüpnule gui cu law u ne ami m’dünnak vai shui khai gui.

¹⁵ Pängpät gai naw ami ng’bu tu u ne, m’tui ne, bo ne, kheh sei ami hta gui m’htei ne a un ung om khai gui. Tangta gui cu tumat täi ah awn ung ng’cut lawk khai gui.

¹⁶ Aghing gui ah mawng guk ah Bawipa ah ca uk cu teng vä, aun ah ai a ciah phat vä. Shin ah a tüisho gui ung ka, tumat phi kä maih düt khai, tumat phi apaw kä om ciah kä om khai. A cun ah a kyak vai ah Bawipa naw thumkhän ci nei; ani amät naw atäng ah law püi gui khai nei.

¹⁷ Ami ng’lung ah khaw k’bou ne, k’pai ne pe gui khai cu Bawipa ah kyak ci nei. Ngami cu cun ah khaw ung ang shon tä sei om khai gui nei, cun cu ngawi yä ngami ah ka ah kyak khai nei.