ISAIAH 33 - Cho Bible Common Language 2016

Amhteihtang Vai ah Taigü nak

¹ Kami ga gui cu ng’ziin ci gui nei! Ngami cu guttep u ne kä bekhüt ci gui, cun ung phi ngami guttep gui ne, ngami ung kä bekhüt ci a u kä om ci. Cung phi ami guttep nak la kä ami bekhüt nak cu ng’pyi lawk khai nei, cun kawn ah ngami cu chang naw a guttep gui, chang naw kä abekhüt nak gui ah baawi ah kyak khai gui nei.

² Bawipa, na chimgein gui ä. Keimi ah ngaih u nak nang ung om ci nei. A hnüüp tä na shungvong gui ä, khüi kha nak ah khin ung an hun gui ä.

³ Nang naw keimi ah phäh ah ng’tuk na bi yah ung, ng’tuk ah k’aw

⁴ ng’yak ciah chang pakhui gui cu dawng ci gui nei. Ami khawh gui cu pha pe gui ne, ami guttep ah kyasei lak gui ci gui.

⁵ Bawipa a i hlawk ah dämduh ci ang! Ani naw apängnü ah khan ah uk ci nei. Ani naw Jerusalem cu taga nak la bekhe nak awn besak ne,

⁶ Chang pakhui am khänghtek nak cu pek ci. Ani naw angtäi sei a chang gui cu shungvong gui ci, cüivai nak hmuhmat nak cu pe gui ci. Ngami ah dämduh pi ciah m’küm cu Bawipa (khanpughi) kyih aa nak ah kyak ci.

⁷ Changm’gäi gui cu m’htei gui vai ah ng’khü ci gui nei, Dimdeeih nak gah vai ah k’tha nak ciah ng’shäbawi gui cu ak kha ah kyap ci gui nei.

⁸ Lam ng’shawng nm gui cu kyih vai kyasei cun ung a u kä hteit ba ci nei. Ami thukhän gui cu m’shat u ne, ami yum ätnak gui cu plawh pyi ci gui nei. A u naw a i phi kä changm’sui law ba ci nei.

⁹ Khaw phi ngän ne ng’gau ci nei. Lebanon bung cu ng’zaai ne, ang lei nik ciah sharon khawng’noi cu khokäu ah kyak ci nei, Bashan khaw la karmela m’htung ung sing ghing gui ung ka sing hnah gui cu kiwi yawp ci gui nei.

Bawipa naw Aga gui Thuk’bäi gui ci.

¹⁰ Bawipa naw chang pakhui gui pyen na gui ci, “Tuhbäi kei ka hnüntho khai nei. Kei a i hlawk ah ka huham mah cu kei naw ka m’dang khai nei.

¹¹ Nangmi naw akholä vai cu nami pawngpüi ci, nami bi phung cu akholä ah kyak ci. Kei ah ka mümcha cu mei ah mäih ah kya ne ning m’di gui khai.

¹² Nangmi cu lung m’khih ung thung ah a kyak ah mäih ah, ng’hling m’khih ung m’vutah a kyak ah mäih ah nami khui khai nei.

¹³ Ashou, ang et ung om ciah chang päng naw kei ah ka bi cu ng’ya ne, kei ah ka huham cu ng’kiaa u sä.”

¹⁴ Zion ung shekak ciah chang gui cu kyi ne ng’hlet u sä. Ngami naw, “Khanpughi ah ng’thumcha nak cu mei ah mäih ah kya ne angtäi sei ui ci nei. Acun ah mäih ah mei ung ka, mikmi mi k’pawih hning khai aw?”

¹⁵ Nang cu hman ciah ng’thu ne, düng ciah nabi vang na k’pawih hning ci nei. Dukhaih ci k’titaih nak vai ah nami huham kä nami mang vai, ng’mü khawh kä nami dou vai. Chang ngawn khai ah pawng ci ung phi kä nami ng’gui tu vai.

¹⁶ Cun ung nangmi nami phyawng khai, khäing htek ciah vongpang kyong ah om ah mäih ah nami ngaih gep khai. Nangmi ung nami ei vai buh am khai, nami awk vai tui om khai.

Bäimang ciah Malam

¹⁷ Nangmi naw khaw khäm ne, khaw cawi avan ung gawk kaai ah bämcam ne uk ciah ghangpughang cu nami hmu law ba khai nei.

¹⁸ Cau nami kyih manm ah akhohei chang akhon-look gui la ng’däät ciah chang gui cu shümba dütah kyak khai nei.

¹⁹ Nangmi naw kä nami hmat vai ah ng’thu ne, m’ghämce ciah akhohei chang gui cu kä nami hmu law ba khai nei.

²⁰ Zum nak ah pawi mi bi nak ah zion, mang gaw cu teng vä. Jerusalem cu teng vä! Cun cu om nak ah nik ciah, ng’geing ciah hmun ah kyak ci nei! Cun cu kä ng’plon phung ciah phung ah mäih ah kyak ci, ak tung gui kä pui mäih phung cu, a gui, gui kä pit phung ci.

²¹ Bawipa naw a bäimang nak cu na m’hnuh gui khai nei mikmi cu tuinu ng’shawng tuihta gui ah pein ung mi om khai, cun ung phi ga gui ah htinpaw cu cun ung kä hteit khai

^22-23 Cun ah htinpaw ung gui gui avan cu akholä ah kyak ci; yih dung gui cu kä ng’phiaat hlawt ci! Mikmi naw ga gui ah khawhcham avan cu mi gut khai, cun gui cu da aih sei, shumng’kem ci gui naw phi gah tuk khai gui Bawipa amät cu mi ghangpughang ah kyak khai; ani naw mikhan ah na uk gui ne, na shungvong gui khai.

²⁴ Mi khaw ung om ciah chang tumat naw phi, gawpyam ciah pyen ne ng’thu kä m’da ba phung khai, katnak avan cu m’gein sei nak om khai.