ISAIAH 32 - Cho Bible Common Language 2016

Bekhe ciah Ghangpughang

¹ Khohnüüp ät ung bekhe ne uk ciah ghangpughang la taga khai ah uk ciah pakhui chang vai gui dang lawk khai nei.

² Ngami tumat ci cu, khokhi ung ng’shung nak, puikhokhi ung ng’thuh nak ah hmun ah kyak khai gui nei. Ngami cu khong gau kho ung long tui ah mäih, ng’kiangma kho ung om ciah lung k’pou nu ah ang hnim ah mäih ah kyak khai gui nei.

³ Chang gui ah hlü nak ami hmuh ng’yak nak thei vaiah ami mik, ami k’hnga hmawn pe gui khai nei.

⁴ Ngami cu akgat ah kä kya ba khai gui, hmuhmat nak awn hnün tho khai gui, ami pyen hlü ah mawng cu pyen khai gui.

⁵ A u chang naw phi chang guktaak cu m’tamkhah vai ah kä ngai khai, chang shekha cu bä ciah kä pen khai.

⁶ Chang guktaak cu akguktaak ah ng’thu ne, akshe bäng bi vai ah ngaih-tüh ci. Ani abi abi la ang thu naw Bawipa cu ghetaap ci, ani naw ei cawi ci kä m’bei ci, tui gha ci gui am api phi ami awk vai kä pe gui ci.

⁷ Sahai ciah chang cu shekha ne, akshekha gui bik ci; ani naw dukhaih ci gui ah di nak vai ah m’zih thuh hleei hlak ne, ami chaw phi häu sak gui ci.

⁸ Cun ung phi m’tamkhah vai ah chang cu bä ciah hnüntho ne, hman ciah phäh ah khäng sei ng’düi ci.

M’khoicha nak la M’thawh Ba nak

⁹ Nang hnumi gui, azäi ah nami ghing om ci gui, ng’ä ai nak kä om ci, kei ah thu pyen cu ngai vä.

¹⁰ Nangmi tuhbäi nami ng’büh khei, cun ung phi hnengkum ashin ah akhin ung ang ngaih u kaa ah nami kyak khai, a i ah kyasei ci ung nangmi ah phäh ah nami khäm vai sapyit kä om khai.

¹¹ Nangmi cu, a yäi ah nami ghing om ci, ng’ä ai nak kä om ci; Cun ung phi tuh bäi, kyi ne ng’hlet vä! Nami sui sak gui sut u ne, pyonshe awn nami khei k’htün vä.

¹² Thüi kyap ne nami kyang k’beei vä, a i ah kyasei ci ung ang lei nik ciah nami lo gui la nami sapyit dum gui cu di pyi ci nei,

¹³ ng’hling-cam gui la ng’hling gui cu ka chang gui ah khaw ung tho pyi ci nei. Chang gui naw ami yeikyai nak ah cin gui avan la ami ng’häh leh nak ah mang gaw ah phäh ah thüi kyap vä.

¹⁴ Mang im phi kei ne, mangkho leigaw phi apum ah shiu khai nei lm gui la k’pang gui ami ngäng gui cu ang’täi sei di maih khai nei Hwn cu k’pya ng’se gui naw lum na u ne, htome gui ah khu ei nak ah kyak khai nei.

¹⁵ Cun ung phi khanpughi naw ang mümcha cu natüih law ba gui mä khai. Amdek she pi ah kho cu amdek ni ah kya lawk khai, lo gui ung geitkaw akda m’thawk khai.

¹⁶ Khaw avan apäng ung düngnak la taga nak cu bik khai gui.

¹⁷ A i ah kyasei ci ung akehang sing naw düng nak cu bik khai, dimdeeih nak la ngaih gep nak cu angtäi sei om khai.

¹⁸ Khanpughi ah chang gui cu ng’ä ai nak phiawn nak khai gui, ami cin kyong dimdeeih ne phyawng m’hteim khai.

¹⁹ (Cun ung phi k’pyama ah gäi nu gui ng’kia lawk khai, mang gaw cu ng’gäi khai.)

²⁰ Geitkaw nak vai ah tui da ne, ng’sela la sei gui ah phäh ah phyawng ne om nak vai khu hmun da sei yeikyai aih vai ah kyak ci nei.