ISAIAH 31 - Cho Bible Common Language 2016

Khanpughi naw Jerusalem Shungvong khai

¹ Egypt khaw ah ami m’htei htang vai ah hteit ci gui cu ng’ziin ci gui! Ngami cu Egypt ah dämduh aih ciah ga k’tha mah nak-ng’sela gui, yatha gui, la gakap gui ung ng’khüng ci gui. Cun ung phi ngami cu Bawipa, Theingcim ciah Israel khanpughi ung kä ng’khüng ci gui, am htei htang gui vai ah kä k’thäh ci gui.

² Ani naw a i abi cu hmat ci! Ani naw leigai tüi lawk ci. Ani naw changshekha gui la ami shungvong ah chang gui m’kyuk nak gui vai ah, ang huut taap nak law püi ci.

³ Egypt gui cu khanpughi ah kä kyak ci gui-hnicim chang ah kyak ci gui. Ami ng’se gui cu khaw ah kä kyak ci gui. Bawipa a hnün thawh law ah a kyak ung thamah ciah pakhui cu khui ne ng’deng khai, thaken ci, ami m’htei htang cu kyu ne ng’täng khai. Ani nik hnih cu di khai goi.

⁴ Bawipa naw a na pyen nak cu, “htoshäm gui naw a i ah ng’hawh ne ami m’lau ung phi, sa lou ne ei ciah phongkawng cu kä k’täm hlawt ci gui, a cunah mäih ah migäi ciah kei Bawipa cu zim khomhtung ka shung vong nak ung ka a u naw kä nak pang m’khüt khai.

⁵ Kha naw ang bu ah khan ah ngo ne, a hta gui a shungvong ah mäih ah, kei, m’gäi ciah Bawipa naw Jerusalem cu ka shungvong khai, ka ghung khai.

⁶ Bawipa naw pyen ci, “Israel chang gui, nangmi katnak bi ne, nami na hnung’tuk püi ci. Nami na hna nak ci cung ung phi tuh bäi, kei ah law ba vä!

⁷ Ghui la ngui awn nami pyan ah katnak ah a gup gui, nami van naw nami ghawk nak vai ah akhin cu gawk lawk ci nei.

⁸ Assiria cu ng’tuk nak ung di khai nei, cun ung phi cun cu chang ah huham awn ah kä kyak ci. Assirian gui cu ng’tuk nak ung dawng khai gui, ami changnong gui cu changshäm ah kyak sak khai gui.

⁹ Ami mangbawi cu kyi ne dawng khai, ami bawi gui cu kyih aih u’ne, ami ng’tuk nakung alan gui cu nawng shüt khai gui.” Bawipa naw ng’thu pyen ci — Bawipa, Jerusalem ung ami khawihnah, ani ah mei cu khawihnah m’khih nak vai ah di ci nei.