ISAIAH 30 - Cho Bible Common Language 2016

Egypt khaw awn Thukhän Bi cu Akholä

¹ Bawipa naw ng’thu pyen ci, “Judah khaw uk ci gui cu ng’ziin ci gui, a i ah kyasei ci ung ngami naw kei cu na hnu ng’tuk püi ci gui. Kei ah kä pyan ah m’hnüt bäi nak cu läk ci gui, kei ah ka ng’yak hlü awn hnung’tuk ciah yum ät nak bik u ne, katnak tumat ah khan ah tumat m’taih ci gui.

² Ngami cu kei kä na ng’shikca ah Egypt khaw ah h teit ne ng’hui ng’pa ci gui. Ngami cu Egypt naw ashungvong gui vai m’hni ci gui, cun ah kya ne Egypt Ghangpughang ung ami ngaih u nak ap ci gui.

³ Cun ung phi ghangpughang naw am hteihtang nak gui vai ah huham cu maih khai, Egypt ah shungvong nak cu leigai awn ng’pyi khai.

⁴ Ami ng’shäbawi gui cu Egypt khaw Zoan la Hanes mang gaw gui ung ami gawk law pyi pang ung phi,

⁵ Kä ngaih gep vaiah pakhui, ami ngaih u yah ung zu ng’kiak sakgui ciah pakhui, ami ngaih u ah phäh Judah chang gui cu ng’yu ba khai gui.”

⁶ Shin cu htum täng khong’gau ung om ciah khisa gui ah phäh ah khanpughi ah ng’thu ah kyak ci: Ng’shäbawi gui cu kyihkyawk vai ah khaw kan ne hteit hton ci gui. Cun ah khaw ung phong kawng gui, k’phyu m’äm mah gui, k’phyu ng’phai mah gui om ci. Ngami aw ami ng’sela gui la ami kala uk gui ung a phu küi m’cümhnah gui cu taih u ne, kä m’hteihtang gui hning khai ah pakhui ah hteh püi ci gui.

⁷ Egypt naw a pek ah m’htei htang nak cu a kholä nei. Cun ah kyasei kei naw Egypt ming m’hlawt awn ka khü cu, “Am’äm kä om ciah phyu ng’hlui” ah kya ci.

Ng’Thu kä Ngai ciah Chang gui.

⁸ Khanpughi naw, chang gui a i ah mäih ami kyak cu ca uk ung ka guk vai ah na m’thein ci, cun ah kyasei ngami a i hlawk ah ami shetkat cu ngawizä om khai kyak ci.

⁹ Ngami cu ang’täi sei khanpughi hnung’tuk püi ci gui, angtäi sei hleei ci gui, Bawipa ah m’theithang ngaih yak vai ah angtäi sei mak ci gui.

¹⁰ Ngami naw prophet gui adüm ah ami om vai ah pyen na gui ci gui. Ngami naw, “Düng ciah mawng cu keimi awn kä na na pyen nak gui vai, keimi naw kami ng’yak hlü lu nami na m’thein gui vai. Kami cheishoh nak ung kami k’ang ei khai nei.

¹¹ Kami lam ung ka, ng’nawn vä, kami lam kä shung en vä. Nangmi ah theingcim ciah gsvaek khanpughi ah mawng kä kami ng’ya hlük ci nei.”

¹² Cun ung phi Theingcim ciah Israel khanpughi ah thu pyen cu; “Kei naw ka ning m’thein gui cu nangmi naw a i ah kä nami ngai ci nangmi naw ng’tohpah nak la hleei hlak nak nami ngaih u ci.

¹³ Nangmi cu namishekak ci nei. Nangmi cu teek ne ng’bou ciah k’paang hlüng ah mäih ah nami kyak ci; nangmi cu ang ghit ah nami piawn khai nei.

¹⁴ Nangmi cu m’dek k’am ah mäih ah nami payak khai, akpi m’hnui ah kya sei, meikcak taih nak vai, käcung tui hlüngung ka tui soh nak vai phi kä om khai ah k’pihmei ciah mäih ah nami kyak kiai.

¹⁵ Uktu Bawipa, Theingcim ciah Israel khanpughi naw chang gui pyen na gui ci, “Law ba vä, adüm hta ah kei ung ng’ap ba vä. Nangmi cu gaigawng ne nami phyawng khai.” Cun ung phi nangmi naw cun ah bi vai cu nami mak ci.

¹⁶ Cun nak vaisü ung, nami ga gui phiawn nak vai ah zangkhai ciah ng’se ng’cum vai ah nami k’bäi ci. Nangmi nami hman ci-ai ah kyasei ci ung nangmi cu nami dawng tukcang khai kyak ci! Nangmi naw nami ne’se gui zangkhai ciah nami ngai ci, cun ung phi nangmi ning gawt law gui cicu zangkhai pi khai nei!

¹⁷ Nang gagui gakap tumat nami hmuh ung, nangmi phia khak nami dawng khai nei, nangmi avan nami dawng vai ah ga kap hma cu bä khai nei. M’htung lai ung alantäng bäng pawih khai, cun kawn ah a u gakap phi kä k’pawih khai nei!

¹⁸ Cun ung phi Bawipa naw nangmi ning chimgein gui khai ah ning ngäng gui ci nei. Ani cu nangmi ning m’gein gui khai ah om ge ci nei, a i ah kyasei ci ung, a ni cu angtäi sei düngnak bik ciah kyak ci nei. Bawipa ung ngaih gep ciah chang gui cu yeikyai nak om ci nei.

Khanpughi naw Achang gui Hriham Pe gui ci.

¹⁹ Nangmi Jerusalem ung om ciah chang gui kä nami kyap ba khai. Bawipa naw ning geng khen gui ci, aning m’htei gui vai ah nami kyah ung ning m’shang gui khai nei.

²⁰ Bawipa naw khak ciah akhin ung ning hteh sak gui khai cun ung phi ani amät naw ning om püi gui ne ning m’thei thang gui khai, nangmi naw ani nami shui vai kä hlü ba khai.

²¹ Nangmi cu lam hma u ne k’eng täng ni mä, k’pat täng ni mä nami ci law ah a kyak ung, nangmi naw nai hnu ah ani ak’aw nami ng’yak khai, “lam shin ung nei. Shin ung hteit vä” cik khai nei.

²² Nangmi naw ngui awn pyan ah a gup gui la ghui awn vook ah a gup gui cu ng’awt ah mäih ah ghawt u ne, “Kei ung ka ahei ah hteit ä” cine nami m’lau khai nei.

²³ A i sang ung phi m’shi nami phu ah a kyak ung, ang lih ngon nak vai ah Bawipa naw kho aa sak khai, akda ah ning khäm sak gui khai, nami vuhchah gui ah phäh ah khulim khaw akda om khai.

²⁴ Nami lai thawn ciah seipat gui la ng’se la gui naw akbäpi la aknipi ah ei cu ei khai gui nei.

²⁵ Nami ga gui ah ng’tuk nak päng gui tu ne khäm u ne, päng la khogui päng ung tui gui lut law ne long khai gui.

²⁶ Cha cu hni ah mäih ah ng’shü khai, hni cu ang shü man ah ak chih ah pyü ne ng’shü khai, hnüüp chih ung ang shü vaisü hnüüp ät ung ang shü ah mäih ah kyak khai. Bawipa naw achang gui am a pek gui ah hmaleim gui halwp ne, am tui pek gui kawn ah shin gui avan cu kya lawk khai nei.

Khanpughi naw Assiria M’kyuk khai

²⁷ Bawipa ah huham la bämang nak cu asang ah ka naw phi hmuh hning vai nei. Mei kdäi la meikhu naw ani ah m’lungshe nak cu m’dang ci nei. Ani ang thu ung, aniah thulung naw mei ah mäih ah ui ci nei.

²⁸ Ani naw ama ah khokhinu tüi lawk khai, a cun naw tuiklaw naw apäng nü a hteh ah mäih ah hteh khai. A cun naw chang pakhni gui cu pheik ne m’di ne, akshe ah ami pawng püi gui cu ng’pyi sak khai.

²⁹ Cunung phi nangmi khanpughi ah chang gui cu yeikyai u ne, thingcim ciah pawi mü ung nami ng’äi ah mäih ah ng’äi nami m’cu khai. Israel gui shungvong gui ciah Bawipa ah Taigü un ah amihteh nak lam ung, puläi tum nak ung hteit ci gui ah mäih ah nangmi cu yei kiai nak om khai.

³⁰ Bawipa naw m’gäi ciah ak’aw cu chang nü am ng’yak sak ne, am lungs he nak ah ng’tut nak cn gah sakgci khai meikdäi gui, khumei ng’baw, gäi nu gui la kyihshe ciah khok’aa cu kya lawk khai.

³¹ Bawipa ah ak’aw ng’ya ne, ani naw aktut ah am kyuk nak cu ami gah ah akiah ung Assirian gui cu kyih ne ng’hlet khai gui.

³² Bawipa naw ngami cu leng ba ba ne a thah gui yah ung, ani ah achang gui cu tingtäng htikbei tum ne akhin pyi sak khai gui. Khanpughi amät naw Assirian gui cu ng’tuk püi gui khai.

³³ Cau nu ge ung Assirian mang bawi meinu naw a uih nak vai ah hmun cu pyan pyi ah kyak ci. Cun cu thuuk ne, ng’shawng ci, awn ung sing akdäm ah pum ah kyak ci. Bawipa naw akdang ung meimlei m’hluh law ne, acun cu m’khih khai.