ISAIAH 3 - Cho Bible Common Language 2016

Jerusalem Ng’gogan ci

¹ Tuhbäi ung Bawipa, M’gäi ciah Bawipa naw, Jerusalem la Judah ungka naw ak thuuk ah chang päng la avan päng, acun ah ng’lei khan ah om ci phung hteh püi gui khai. Ami tui la ami ei phi lak pe gui khai.

² Ami chang m’gäi gui, ami gakap gui, ami suki gui la prophet gui, ami k’ce gui la ami uktubikbi gui,

³ ami gakapbikbi gui la bikbi ng’vai gui, ami nain-ngan bikbi gui la, amawng ma gui k’pang ciah cunce gui avan u la yawp khai.

⁴ Bawipa naw chang gui cu kä ng’vai phak ciah ak hmaw gui am uksak gui khai.

⁵ Chang päng naw chang nü ah khan ah ei hlü mang phya khai. Hmaw chang gui naw ami ng’vaihta gui kä chang m’sui khai gui, kä chang man gui naw chang man gui cu kä chang m’sui khai gui.

⁶ Pahta gui naw ami mät ungka, chang tumat ghü u neta, ani pyen nak khai gui, “Nang ung na sui vai om ba hta ci, shin ah khüikha nak ah khin ung, nang cu kami ng’vai ah na kyak khai nei” ci nak ah a khin gawk lawk khai.

⁷ Cun ung phi ani naw, “Ka nei! Kei naw kä ka ning m’htei gui hning khai nei. Kei ung ei vai phi kä om ci, sui vai phi kä om ci nei. Nami ng’vai ah kä na tha en vä!” cik khai.

⁸ Ä, Jerusalem cu mü ne hmüp ci nei! Judah cu kyu pyi ci nei! Ami pyen nü la ami bi nü naw Bawipa hnu ng’tuk püi ci nei; ngami naw Khanpughi amät cu m’lepse nak ci gui.

⁹ Ami mät ah mikhmai naw amimät hungtuk püi gui ci nei. Ngami naw Sodom ung chang gui ah mäih ah katnak cu ang dang ah bik ci gui nei. Ngami cu shekha u ne, acun ah a phu ng’kheng cu ami khan ah ami mät naw law püi ci gui.

¹⁰ Düng ciah chang gui cu yeikyai khai gui, amawng avan cu ngami ah hmawk ah nik khai. Ngami cu ami bi ah kmawk ah yeikyai khai gui.

¹¹ Cun ung phi changshe gui cu ami khomü khai, chang hei ah khan ung ami bi ah mäih ah ami khan ung gawk law ba khai.

¹² Ngui ng’pu ci gui naw ka chang gui kalu na gui u ne, khawh-mah gui naw shedam na gui ci gui. Ka chang gui aw, nami ng’vai gui naw lam hma ne ning hteh püi gui ci gui. Cun ah kyasei a hawi ah lam ung hteh vai kä nami hmat ci.

Bawipa naw a Chang gui Ng’thumcha gui ci

¹³ Bawipa naw amät ah mawngma cu m’dang ge khai ah om ci, ani naw a chang gui ng’thumcha ge khai ah pawng ci.

¹⁴ Bawipa naw a chang gui ah ami ng’vaihta gui la a ghi gham gui cu ng’thumcha nak ah law püi ci. Ani naw shin ah k’bün nak bik ci: “Nangmi naw sapyitlo gui cu nami guttep ci, nami im cu dukhaih ciah ka, nami guh pek ah khawh awn be ci nei.

¹⁵ Nangmi ung ka chang nami dep nak vai la dukhaih ciah khan ah nami eiawk nak vai ah amawng kä om ci. Kei, Avan Uk ne M’gäi ciah Bawipa naw ka pyen nei.”

Jerusalem ung Hnumi gui Thukbäi nak

¹⁶ Bawipa naw, “Teng vä, Jerusalem ung hnumi gui shi, a i hlawk ah chang ah ng’shei ci gui ang! Ngami cu khaw häu ung dong ne hteit hton ci gui. Ngami cu angtäi sei lawklak ci gui. Ang ghin hta ah m’khan u ne, ami khaw m’awi ung ami khawkhih phi ching ching ah ng’ging ci.

¹⁷ Cun ung phi kei naw ka m’kyuk gui khai-kei naw ami lu k’teiu pe gui ne, a luplup ah ka nawng gui khai.”

¹⁸ Jerusalem ung hnumi gui naw chang ah ami ng’shei nak gui phung Bawipa naw a lak nak vai ah a khin gawk lawk ci nei — sui awi gui ah kyak ciah ami khaw ungka, ami lu ungka ami hnü ungka gui,

¹⁹ ami ng’kyang ung sui gui. Ani naw ami lushung gui

²⁰ la ami lukhu gui phi lak pe gui khai; ban la khei ung ami nak ah cecai nak gui;

²¹ ami kutpyün ung ami nak ah kutcüp gui la ami hngakhawng ungka gui;

²² ami suinu k’ni gui avan, suikyu gui, pumsui gui la ngui ng’ip gui;

²³ suinu ng’pam gui, linen kutghuh nak gui, hnü samsawm la lu ung sawm ah sam gui avan lak pe gui khai.

²⁴ Tui ng’ui ami mang nak vaisü ung ngami cu thuk khai gui; kheipat ak kyom nak vaisü ung gui k’ghat awn ng’pat khai gui; ak kyom ami lusam nak vaisü ung ami lu ng’plut khai; sui k’ni ami sui nak vaisü ung suishe sui khai gui; Ami kyom nak cu ng’aa nak vai ah ng’lat khai!

²⁵ Mang gaw chang gui, akgai pikbäih gui phi ng’tuk nak ung ngawn gui khai gui.

²⁶ Mang gaw m’kawt gui cu kyap ne ng’pyang khai gui, mang gaw amät cun phi m’dek ung akplui ah ngok ciah hnumi ah mäih ah kyak khai.