ISAIAH 29 - Cho Bible Common Language 2016

Jerusalem ah Buitang

¹ Khanpughi ah sonkiang, Jerusalem alnät cu ng’ziin ci! David ah ng’leen nak ah mang gaw cu ng’ziin ci! Kum ät käcung, kum goi ung yung im, eiawk pawi cu bi ba cang u sä,

² Cun kawn ah khawpughi naw cun ah mang gaw ah khan ah leigai law pui khai, cun ah manggaw cu “Khanpughi ah sonkiang” ah pyen ci gui. A cun ung thüi nak, kyap nak om khai, mang gaw apum cu si bäng ah kyak ciah sonkiang ah mäih ah kyak khai.

³ Khanpughi naw cun ah mang gaw cu tuk khai, Veing ne khaai khai.

⁴ Jerusalem cu khomdek khui ah ng’thu pyen khai ah ng’ cou ng’tat ciah m’cha ah mäih ah kyak khai, m’vut khui hmu ung kä hteh ciah kaw lutlawk ciah mäih gh kyak khai.

⁵ Jerusalem, nang ning tuk ci gui ah a khohei chang gui avan cu m’vut ah mäihah zong khai gui nei, kyih vai ah kyak ciah ami gakap gui cu htang gong chawng ah mäih ah zon gui khai nei. Ang ghitah, kä ngaih-tüh ah,

⁶ m’gäi ciah Bawipa naw ng’pheet ciah hmumkyeek la shihpi thüng awn ning gung gui khai nei. Ani naw puikhokhi la meikdäi ng’lam cu tüi lawk khai nei;

⁷ Khanpughi ah sonkiang mang gaw tu ne khäm ciah pakhui gui ah gakap gui avan, ami limei gui avan awi kah ang nü-cu ng’mang ah mäih ah maih khai, mü ah a i baw ngaih-tüh ah mäih ah kyak khai.

⁸ Jerusalem tuk vai ah ng’bum ciah pakhui gui avan cu ei ei ne ng’mang na ne ta, ei cawi ne ng’shüm law ba ciak, cawi ciah chang ah mäih ah kyak khai gui, käcung tui gha ne sihlüne ng’zan neta, tui aw ne ng’mang na ne, a gawn ket sei ng’shüm law ba ciah chang ah mäih ah kyak khai.

A u naw kä A Ngaih Zak ah Thukbäi

⁹ Anglaam ne om vä! Nami mik m’dauh sei om vä! Zu kä awk en ah awktat vä! M’hteei ät phi kä aw ne ng’täng shüi shüi vä!

¹⁰ Bawipa naw nami ngam khai ah ning ci gui ci nei, nami ip hniim law ge khai nei. Prophet gui cu chang gui ah mik ah kya khin te ci gui, cun ung phi khanpughi naw ami mik m’shin sak gui ci nei.

¹¹ Prophet ah muimang ah mawng cu nangmi am ning m’zih gui vai nei; cun cu m’hziütah ca k’chaw ah mäih ah kya khai nei. Nang naw cun cu la neta, caphat thei ciah chang am phet ne aning m’thein vai ah na pyen ah a kyak ung ani naw kä ka phat khai, cik khai nei, a i ah kyasei ci ung cun cu m’hnüt ah kyak ci.

¹² Nang naw ca kä phat thei ciam pe neta, phat ne a ning m’thein vai ah ha pyen ah a kyak ung, ani naw a i cha phat vai ah kä ka hmat ci nei cik khai.

¹³ Bawipa naw pyen ci, “Shin ah chang gui naw na khawihnah khai gui ah pyen khai gui, cun ung phi ngami ah ng’thu ci akholä nei, ami m’lung kyong cu whei ah gawk ci nei. Ngami ah yum nak ci akholä, cun ung phi hnicim chang ah thukhän la thungyo gui, ngami naw ami shümshawi ah kyak ci.

¹⁴ Cun ah kyasei kei naw kä ngaih-tüh ah tumat kawn ah tumat ka cat sak gui khai. Cüivai ciah chang gui cu chang anglaam ah ng’lat khai gui, ami lunglang nak avan cu akholä ah kyak khai.”

Malam ung Ngaih u vai.

¹⁵ Bi vai ami k’bäi Bawipa ah ma ah m’zih vai ah k’tha nak ci gui cu ng’ziin nak gah ci gui! Ngami naw ami k’bäi cu adüm ah bi neta, a u naw kä hmu gui khai abi cu a u naw bi u neta, a u naw kä hmu gui khai abi cu a u naw hmat gui khai ah ngai ci gui.

¹⁶ Ngami naw apängnü u lulelat ci gui. Am shep ci la amdek, a i ang a küikyang tu ba? Chang ah a pyan naw, pyang ciah chaug am, “Nang acun naw ani am, “A i na bi cu nang naw kä na hmat ci nei” ci na hning khai aw?”

¹⁷ Thu k’thuuk ung om cicu tuh bäige khawbung ah kyak cicu luma ah kya lawk khai, loma cu khawbung bä ah kya ba khai, ciah kyak ci.

¹⁸ Cun ah hnüüp a gawk law ung a paang naw ca uk akdäm ah ami phat cu ng’yak khai, amik m’dauk hmüp khui ung om cicu amik m’dei sei hmu lawk khai.

¹⁹ Dukhaih ci la zu ng’zeim ciah chang gui naw, Bawipa, Israel gui ah theingcim ciah khanpughi naw a pek ah yeikyai nak cu hmuk ba mä khai gui.

²⁰ Cun cu a chang paw yawshe nak ci gui la khawpughi kä chang m’sui ci gui ah ng’pyi nak ah kyak khai katnak bik ci phung cu m’di khai.

²¹ M’thüi ciah chang, ngawnphak ci m’kyuk nak vai shungvong ciah cang, düng ciah chang naw taga nak kä gah khai ah hleei hlak ne pyen ciah chang gui cu khanpughi naw m’di gui khai.

²² Cun ah kya sei, Bawipa, Israel Khanpughi, Khüikha nak ung ka Abraham gang ci naw a pyen cu, “Ka chang gui aw, nangmi cu kä nami ng’aa ca ba khai nei, nami hmai ung lüng’aa nak kä om ba khai nei.

²³ Kei naw ka ning pek gui ah a hmaw gui cu, nangmi naw nami hmuh law ung, kei cu Israel gui ah theingeim ciah khanpughi ah ka kyak cu nami hmat khai nei. Nangmi naw na m’hlüng m’tai u ne, nami na kyih aa khai nei.

²⁴ Chang awng-ang gui naw theithang hmuhmat lawk khai gui nei, akphlütah ng’thu m’hnga man ci gui naw m’thei thang cu yeikyai ne dou khai gui nei.”