ISAIAH 28 - Cho Bible Common Language 2016

Asiiptäng Uknak Khaw Thukbäi nak

¹ Israel uknak khaw cu ng’ziin ci nei! Awktat ciah ang vai gui ah lu ung ka, cheipai lukhu ang zaai ah mäih ah ani ah bäimang nak cu ng’zaai ci nei. Ami khähghah nak ah ami lupum cu situi ng’ui awn akni ah hluk ci gui, cun ung phi ngami cu awktat ne ng’zän ci gui nei.

² Bawipa ung k’thamah ci tumat om ci, ani cu huham mah ne tu gui ge khai ah kyak ci, ani cu gäinu ah mäih ah, kho k’aa nu ah mäih ah kho ng’güüt ah mäih ah huham mah ciah tui k’law ah mäih ah kya ne, kho avan cu küm khai nei.

³ Cun ah awktat ciah ang vai gui ah chang ah ng’shei nak cu khaw awn kahta na ne kai nak khai gui.

⁴ Chang ah ng’shei ci gui ah ang vai gui ah baimang nak cu, a up vai am k’bit ne ei yawp vai ah m’theih htük ciah k’thei ah mäih ah mäih yawp khai.

⁵ K’pawih ciah a chang gui ah hmawk ah, bäimang ciah cheipai lukhu ah mäih ah m’gäi ah m’gäi ciah Bawipa a kyak nak ah knüüp cu gawk lawk ci nei.

⁶ Suki ah kya ne bi bik ci guiam taga nak la mang gaw m’kawt ami tuk nak vai yung ka ghung ci gui aw thamah nak ah m’lung ngaih cu ani naw pe gui khai nei.

Isaiah la Judah ung Awktat ciah Prophet gui.

⁷ Prophet gui la taigü gui pui cu awktat u ne kyu shüi shüi ci gui. Ngami cu sapyit tui akda la awktat vai gui akda aw aih u neta gawk vaak kiungtäng ci gui. Prophet gui cu aw aih u neta khanpughi naw ak chaak law gui ah muimang cu kä hmat ci gui, taigü gui phi aw aih u neta, ami law püi ah amawngma gui cu kä phupit kaih yawih hlawt ci gui.

⁸ Ami ngah nak ah capawi cu m’laawk bäng ah kya ne, api hta phi kä theingthap ci.

⁹ Ngami naw kei ah mawng ng’cuh ci gui. Ngami naw, “Ani naw a i ah na ngai gui ne am theithang ang? Ani ah thu pyen a u naw ng’ya hlük ci ang? Shin cu sukchah thai ciah a hmaw hta gui ah phäh ah vah nik khai nei!

¹⁰ Ani naw ca ng’lung päing, ca kiawng päng, amawng päng cu na m’thei gui ci nei.”

¹¹ Nangmi naw kä nami na ngaih ah a kyak ung, khanpughi naw akhawhei chang gui ah cäicat vai ah ng’thu cu mang ne, amawng tumat ning m’thei gui khai nei.

¹² Ani naw düm nak ning pe gui ne, nami van ning shungvawng gui sei phi, ani nami ngaih vai ah nami mak ci nei.

¹³ Cun ah kyasei Bawipa naw ca ng’lung päng, ca kiawngpäng, amawng päng a ning m’thei thang gui ah kyak ci nei. Cun ah kyasei nangmi cu nami m’khan päng ung nami ng’täng khai nei. Nangmi cu nami leim khai, cun ung nami awk khai, thawng ung nami kium khai nei.

Zion M’htung ah Hmawk ak Lung K’tung

¹⁴ Tuhbäi Jerusalem ung shin ah chang gui, m’gäimäk ne uk ci gui, Bawipa ah thu pyen cu ngai vä.

¹⁵ Nangmi cu sihnak awn ng’thu nami k’bäi ciah pyen ne, sihnak ah khaw awn nami yum ät ciah pyen ne, nami khähghah ci nei. Nangmi naw leigai a gawk law ung ning hlawi gui khai ah nami ngai ci, a i ah kyasei ci ung, nangmi cu nami hleei hlak lima nak awn phiawn vai ah nami ngai ci.

¹⁶ Tubäi, shin cu, uktu Bawipa naw a pyen nei, “Kei naw Zion ung angnei ka k’süm ci, cun cu khäng ne, khüi ci nei kei naw lungtung am liu ka ng’ling ci nei, ‘Khäng ciah yum nak naw ngaihgei nak phi kyak sak ci!

¹⁷ Taga nak cu angnei nütak-gui ah kyak ci, düng nak cu a cun khinnak-gui ah kyak ci.” Gäinu naw nami düihnak ah hleei hlak nak cu avan hteh yawp khai, tui k’law naw nami ng’shungshet nak cu m’di yawp khai.

¹⁸ Nangmi naw sih nak awn ng’thukhän nami bi cu m’shet ne, sih nak ah khaw awn nami yum ät nak cu maih sak khai. Leigai a gawk law ung nangmi cu ning näng gui khai.

¹⁹ A cun naw nangmi cu a ngawi tä, a ngawi tä sei, ning tuk ba ba gui khai, Nangmi naw cun cu amü a hnüüp nami awt khai. Khanpughi ah ng’thu akthai päng naw cäicat vai akthai law püi khai!

²⁰ Nangmi cu ng’thu thuk ung om ciah chang ah mäih ah nami kyak khai, ani cu akhaw azäih ung kä cun ciah phak ung, kä kyuup ciah yih ng’khuih ne ip ciah kyak ci.

²¹ Bawipa naw perazim m’htung la kibeon khonawi ung abi ah mäih ah ng’tuk bik khai nei, ani naw bi vai ah akbäi ah mäih ah bik khai-ani ah hnünthawh cu thuuk ne hnip khai. Ani naw abi, thuuk kä hwat yäi ciah abi cu phleh ne bik khai.

²² Kei naw ka ning pek gui ah thukbäi cu kä nami gaih en vai nei, nami gaih ah a kyak ung nami phiawn vai cu khak pi khai nei. M’gai ciah Bawipa naw khawpäng apum ah m’di khai ah akbäi cu kei naw ka ng’yak ci nei.

Khanpughi ah Cüivai nak

²³ Kei naw ka pyen cu ngai vä; kei naw ka ning m’thein gui cu geing na vä.

²⁴ A u lai k’bi naw phi ang geit nak ge vai ah angtäi sei lai kä thawn ci.

²⁵ Ani naw hnüät muek phiän ne, pyang ne, muzeu, cünggük ah mäih thui an m’shi gui cu phu ci. Ani naw püm htang gui cu ng’tän khai ah geit ne, laikong ung a hei m’shi gui geit ci.

²⁶ Ani naw shikcha ah abi vai cu hmat ci, a i ah kyasei ci ung ani cu khanpughi naw am thei pyi ah kyak ci.

²⁷ Ani naw muzeu ui la cünggük ui gui cu akgih awn kä neen ci; ak zang, htung aläm awn neen ci.

²⁸ Ani naw htang cu kä düm ne neen düt ne kä m’di ci, Htang kä ng’deng khai, ng’hlee awn, a i cha neen vai cu ani naw hmat ci.

²⁹ Shin ah cüi vai nak gui avan cu m’gäi ciah Bawipa ung ka lawk ci. Khanpughi naw abi ah m’hnütbäi nak cu lunglang ci, cun gui co angtäi sei m’khütnäng nak ah kyak ci!