ISAIAH 26 - Cho Bible Common Language 2016

Khanpughi naw Achang gui am Näng nak Pe gui khai

¹ Judah khaw ung chang gui naw shin ah ng’äi ami m’cu nak vai ah hnüüp gawk lawk ci nei: Kami mang gaw cu khäng htek ci nei! Khanpughi amät naw cun ah pang cu shungvong ci nei!

² Mang gaw m’kawt gui hmawng vä, bekhüt ciah pakhui luh sak vä, cun ah pakhui cu düng nak bik ciah kya sä.

³ Ami ng’bünak htek sei k’pang ne nang ung ami ngaih gep ci gui am. Nang, Bawipa naw kümbe ciah dimdeeih nak na pek ci nei.

⁴ Bawipa ung angtäi sei ngaih gep vä; ani naw angtäi sei na shungvong gui khai nei.

⁵ Chang ah ng’shei ci gui cu ani naw yuk neim sak gui ne; khäng ciah mang gaw, ngami ah om nak cu m’di ne, acun ah vongpang gui cu m’vut khui ung yuk chah ci.

⁶ Ami yawshe nak guicu tuhbäi a cun ah khan ah hteit u ne, ami khaw awn kai na ne, leh ci gui.

⁷ Bawipa, nang naw changni gui ah lam cu na ng’müi sak ci; Ngami ah lula nak ah lam cu na nep sak ci nei.

⁸ Nang ah ng’yak hlü cu kami läk ci nei, nang ung ngaih u nak kami tak ci nei; keimi ah ng’yak hlü avan cu nang ah kyak ci nei.

⁹ Khomü ah ka m’lungkyong avan awn ka ning ngaih-tüh ci nei; Nang naw khomdek la a chang gui na ng’thumcha law ung, ngami ami van naw, taga nak ah mawng cu ng’thei khai gui nei.

¹⁰ Nang naw changshe gui cu na m’gein gui ung phi, Ngami naw düng ci bi vai cu kä ng’thei phung ci gui nei. Shin ah chaung düng gui ah khaw ung phi ngami naw a cheishoh bi lä ci gui nei; Nang ah dämduh nak k’püüi tu vai ah mak ci gui nei.

¹¹ Nang naw na m’kyuk gui vai cu na ga gui naw kä hmat ci gui nei. Bawipa, ngami cu lü ng’a sak gui ä, yaica sak gui ä; Nang naw na pawng püi ah m’kyuk nak awn ngami cu yaica sak gui ä. Na chang gui a i hlawk ah na m’hni gui cu m’dang gui ä.

¹² Nang naw bühmang nak na na pe gui khai nei, BAWIPA; keimi ah m’khüt näng nak phung cu, nang ah bilawk ah ng’dang nak ah kyak ci nei.

¹³ Bawipa, kami khanpughi, keimi cu chang a hei gui naw na uk gui ci nei, cun ung phi nang bang cu kami Bawipa ah na kya ci nei.

¹⁴ Tuhbäi, ngami cu sik ci gui, kä ghing ba khai gui nei; Ngami ah m’cha cu kä tho ba khai nei, nang naw m’kyuk gui ne, na m’di gui ah phäh ah kyak ci nei. A u naw phi ngami kä shüm ba gui khai nei.

¹⁵ Bawipa, nang naw kami pakhui cu na ng’ghaw sak ci nei, van ah khawpäng cu akit päng ung na ng’shawng sak ci nei, acun cu nang ning m’tam nak vai ah kyak ci nei.

¹⁶ Nang naw na chang gui cu na m’kyuk ci nei, BAWIPA, ngami cu cümbawng ne, nang ah taigü ci gui nei.

¹⁷ Nang, Bawipa naw keimi cu, anau poi m’neh ciah hnumi ah mäih ah na na kyah m’lau sak gui ci nei.

¹⁸ Keimi cu nat m’neh ne kami cümbawng ci, cun ung phi a i ah phi kä kami hta ci. Keimi kami khaw ah phäh ah näng nak kä om ci; a i phi kä kami m’khüt ci.

¹⁹ Keimi ah kami chang cu a sih ung phi, ghing ba khai! Ngami ah ami pumsa cu ghing law ba khai. Ng’phuh hmun ung ip ci gui ami van tho ba u ne, yei ne ng’äi m’cu khai gui. K’daam tui naw khomdek ak chin sak ah mäih ah, khaw k’sho ung sik ciah chang gui cu Bawipa naw ghin ba sak gui khai.

M’khoicha nak la M’thawk Banak

²⁰ Ka chang gui aw, nami im kyong ah lut ba vä, nami shoh khai vä. Khanpughi ah m’lungshe nak ang pyi güt akhäng hta nami ng’thuh cang vai nei.

²¹ Bawipa cu khankho a om nak ung ka, khomdek chang gui ami kmakat ah phäh ah m’kat gui khai ah kyum lawk ci nei. Khomdek khan ung m’zih ne chang ngawn nak phung cu ng’dang ling khai nei, ami ngawn ah chang cu khomdek naw kä m’zih ba khai nei.