ISAIAH 25 - Cho Bible Common Language 2016

M’tam nak ah Ng’äi.

¹ Bawipa, Nang cu ka ning khanpughi nei; kei naw ning chang m’sui ne na ming ka m’taam khai nei. Nang naw cäi vai gui na bik ci nei; Nang naw cäupui na m’hnüthbäi gui cu bekhüt ne na bi pyi ci nei.

² Nangmi naw mang gaw gui cu di khai ah nami m’hlat ci, ami vongpang gui cu nami m’di ci. Kami ga gui naw ami cawh ah mang im gui cu khaw ng’län ung om ci nei.

³ Huham mah ciah pakhui chang gui naw ning m’tam khai gui nei; m’ghämce ciah pakhui gui ah mang gaw gui ung nang cu ning kyih khai gui nei.

⁴ Dukhaih ci la am geinka gui cu nang ung ng’yii ci gui nei, yaica nak ah akhin ung ngami cu phiawn nak gah ci gui nei. Pui khokhi ung ng’yii nak vai la mei k’cang ung ng’shung nak vai na pe gui ci nei. Chang m’ghämce naw sik khokhi ah mäih ah,

⁵ Khaw ng’gau khaw ung khaw akäü ah mäih ah tu lawk ci nei. Cun ung phi nang, Bawipa naw kami ga gui cu na dim sak ci nei, Khaw ng’mei naw kholing a gei sak ah mäih ah chang m’ghämce gui ah ng’hawh shaak cu, na dim sak ci nei.

Khanpughi naw Ei-hniing Pyang ci.

⁶ Shin ah Zion m’htung ung m’gäi ciah Bawipa naw khomdek khan chang pakhui avan ah hwawk ah ei-hnii ng pyang khai bä pi ciah ei la ni pi ciah awk ah ei-hniing ah kya ci.

⁷ Shin ung chang pakhui van ah khan ah ng’bat ciah thüisei nak khomei cu ani naw ang ghit ah heng khai.

⁸ Uktu Bawipa naw sih nak cu khonglän ung m’di khai! Ani naw chang pang ah mik ungka ng’phli tui cu ghu pe ne, kho ah ka avan ung a chang gui ah thüivat nak cu lak pe gui yawp khai. Bawipa amät naw a pyen nei!

⁹ Cun ah a kyak law hnüüp ung chang nü naw pyen khai, “Ani cu keimi ah khawpnghi nei! Ani keimi kami ngaih gep ci nei, ani naw na gung gui ci nei. Ani cu Bawipa nei! Ani ung keimi kami ngaih gep ci nei, tuhbäi keimi kami yeikyai lün lawi ci nei, a i ah kyasei ci ung ani naw keimi nah un gui pyi ci nei.

Khanpughi naw Moab M’kyuk khai.

¹⁰ Bawipa naw Zion m’htung cu shungvong khai, cun ung phi Moab chang gui cu eek-shin ung htang gongchawng leh m’hnep ah mäih ah the m’hnep gui khai.

¹¹ Ngami naw tui ng’väk vai ah k’tha nak ah mäih ah ami kut cu shäng khai gui, cun ung phi khanpughi naw ngami cu hnim gui sei, ngami ah kut cu am gein kaa ah kyein khai.

¹² Ani naw Moab gui ah ami vongpang gui cu hlüng ciah vongpang gui awn atäng ah m’di gui ne, m’vut ung yung kyak sak gui khai.