ISAIAH 24 - Cho Bible Common Language 2016

Bawipa naw Khomdek cu M’kyuk khai.

¹ Bawipa naw khomdek cu m’shiü ne m’gämugang khai ah nawng khai. Ani naw khomdek ah hmai cn ng’phiui sak ne, a chang gui cu püi pyang sak gui khai.

² Chang nü ah a buitang cu tang khai-taigü la chang gui, changshäm gui la mang gui, hleih ci gui la yoi ci gui, ng’pu ci gui la puk ci gui, bühmang ci la dükhaih ci gui.

³ Khomdek cu ng’phyit ne dii khai. Shin cu Bawipa ah thu pyen ah kya ne, bi tuk cang khai nei.

⁴ Khomdek cu chaung ne ng’yai ci; m’dekhan apum ah thawaih ci; khomdek la khankhaw avan thuce ci.

⁵ Chang gui naw khanpughi ah thukhän gui m’shet nak la ng’täi khai ah a pyan ah angthukhän m’kat nak awn khomdek cu lelawi sak ci gui.

⁶ Cun ah kyasei khanpughi naw khomdek khan ung plah taam nak gawk sak ci. A chang gui naw bi ah phu cu pek ci gui. Ken law pi, ken law pi cicu k’pawih lawk ci gui.

⁷ Sapyit ng’shun gui ng’yai u sei, sapyit tui cu ken law pipi ci. Zeikiai man ciah chang nü cu tuhbäi thüisei ci,

⁸ Tingtäng gui la htingceei gui yeikyai ne tumkhawn nak cu tuhbäi kä om baci nei.

⁹ Aw ne yeikyai ne ng’äi awm nak kä om ba ci; a u phi cun ung kä tuihlim ba ci.

¹⁰ Mang gaw kyong ah apäng avan cu piäi piah yawp ci, chang gui naw ami phiawn vai ah ami avan avai shah kyai ne ng’sheng ci gui.

¹¹ Sapyit tui kä om ba sei, chang gui lam yung ah m’lau ci gui. Zeikiai nak cu ng’pyi ne ng’khawn ci nei; cun cu khaw ung ka, ami maib sak nei.

¹² Mang gaw cu di ci nei, am kawt gui cu ng’gäi pyi ci nei.

¹³ Khomdek khan avan khopäng pang ung awnah kyak khai nei. Cun cu geitkhäm ang pyi ah mäih ah kyak khai, Olive sing a ghing päng ung ka aktheih ak hnu ah k’bih yawp ah mäih ah kyak khai.

¹⁴ K’pawih ci gui naw yei nak ng’äi m’cu khai gui. Akhei tang ah om ci gui naw Bawipa a i hlawk ah adämduh cu pyen khai gui nei.

¹⁵ Ak kyang tang ung om ci gui naw ani cu m’taam khai gui nei. Tuinu ah yung ung om ci gui naw Bawipa, Israel khanpughi cu m’taam khai gui nei.

¹⁶ Khomdek khan ak shou nak pi ung om ciah mikmi gui naw ng’düng ciah pakhui Israel gui m’tam nak ah ng’äi cu mi ng’yak khai gui nei. Cun ung phi kei ung ngaih u vai kä om ci! Kei cu a kholä nei! Kä bekhüt nak cu ka law pi ka law pi ci nei.

¹⁷ Chang nü naw, na ngai vä! A kyih she gui, kyui gui la cuun gui naw ning ngäng gui ci nei.

¹⁸ Kyihshe ci a phiawn nak vai ah k’tha nak ci phung cu khui ung kyak khai, khui phiawn nak ci phung cu, cuun un gawk kahi nei. Khaw k’aa nu cu khawmik ung ka, kya lawk khai, m’dek ah angnei cu thüng khai.

¹⁹ M’dek cu teek ne, ng’phiäk ne, ng’bou neaang khai.

²⁰ Khomdek amät cu awktat ciah chang ah mäih ah kyu shüi shüi khai, puikho khi ung phung hta ah mäih ah ng’khän shüi shüi khai. Khomdek cu a katnak naw geih khüp ci, cun cu yung kyak khai, a i sang ung phi kä tho law ba khai.

²¹ Akhan ung huham gui la khomdek uktu gui Bawipa naw am kyuk nak gui vai ah akhin cu gawk lawk ci nei.

²² Khanpughi naw ghang pughang gui cu thawngkium gui ah mäih ah khui tumatung m’tawk gui khai. Ani naw ngami cu, ngami m’kyuk nak gui vai ah akhin a gawk law güt ung khai gui khai.

²³ M’gäi ciah Bawipa cu ghangpughang ah kya lawk khai kya sei, cha cu hmüp ne, hni cu kä khang ba khai nei. Ani naw zim m’htungung ka naw Jerusalem cu uk khai, chang gui ah ami ng’vai naw a bämang nak cu hmuk khai gui.