ISAIAH 23 - Cho Bible Common Language 2016

Phoenicia ah Mawng Thumkhäh

¹ Shin cu Tire gawnu ah mawng thumkhäh ah kyak ci. Thuinu ah khan ung gawk ciah htinpawkläk gui! Thüisei vä! Nami im gawnu Tire cu dipyi ci nei; a cun ung im gui la tukkem im gui cu she pyi ci nei. Nami htinpaw Caiprus ah ka a law ba ung nangmi naw cun ah mawng nami hmat ci nei.

² Kyaplau vä! Eidon ah suilei chang gui! Nangmi naw chang tüi ne,

³ tuinu kan ne Egypt khaw ung m’thawk ciah htang gui hleih vai, yoih vai chang pakhui pang awn sumlei vaiah nami bi sak gui ci nei.

⁴ Sidon mang gaw, nang cu na thangshe pyi ci nei! Tuinu la däm ciah tuinu naw nang cu ning nawng neta, a pyen cu, “Kei ung a i yah ung phi hta hmaw gui kä om man ci. Kei a i yah ung phi htapami htahnumi ah kä ka hta man ci.”

⁵ Egypt chang gui phi Tire adi cu ami hmat ung cäicat kyi kyawk khai gui nei.

⁶ Thüisei vä, nangmi Phoenicia chang gui! Spain khaw ah phyawng ne nami gawk vai ah tha na vä!

⁷ Shin cu can ami k’süm ah ah yeikyai nak ah mang gaw Tire ah kya hning khai aw? Shin ah mang gaw cu tuinu kan ne, koloni khaw k’süm khai ah ng’lei leh ci tüi ciah mang gaw ah kya ne ang?

⁸ Tire cun ah bawi mang gaw ung, ung shin gui avan law püi vai ah law püi cicu a u ung, a u sumlei mang hta gui ang khomdek khan ung m’tamkhah pi vai a kiak?

⁹ M’gäi ciah Bawipa naw a pawng püi nei. Shin ah a pawng püi cu ami bi lawh ah khan ah chang ah ami ng’shei nak aung pyi nak vai la a mi m’tamkhah ah chang gui yuk buh nak vai ah kyak ci nei.

¹⁰ Hteit ne kholo vä, nangmi spain khaw ah koloni ung chang gui! Nangmi ning shungvong ba gui khai a u phi kä om ba ci nei.

¹¹ Bawipa naw tuinu ah khan ah a kut shäng ne, uknak kho gui cu shet sak ci nei. Ani naw Phoenician sumlei hmun gui m’di vai ng’thu k’bäi pyi ci nei.

¹² Sidon mang gaw, nang ah yeikyai nak cu ng’pyi pyi ci nei, na chang gui cu skedam na gui ci gui nei. Ngami cu curt ne caiprus ah nami hteh ung phi, phiawn nak kä om khai nei.

¹³ (Tire gawnu khisa gui naw ami lum nak vaiah ci kci cu Assirian gui ah kä kyak ci, Babilonian gui nei. Khoainaktänghän co u ne, Tire mang gaw pang gui phye ne, mang gaw m’di ne hteh tak ci gui cu Babilonian gui nei.)

¹⁴ Thüisei vä, tuinu ah khan ung gawk ciah htinpaw kläk gui! Nami ngaih u ah mang gaw cu di pyi ci nei.

¹⁵ Ghangpughang tumat ah ghin nak ah ng’lät, khokum chih-kipung Tire m’hnih nak vai ah akhin cu gawk lawk I nei. Cun ah khokum gui ang pyi law ah a kyak ung. Tire cu ng’äi ung om ciah chang pawn zau ah mäih ah kyak khai:

¹⁶ Na tingtäng la ä, gawnu veing ne hteit ä, Ning m’hnih u sei, na geinvai ci nei! Tum ne na ng’äi gui m’cu ba mä ä chang pami gui law ba püi mä ä.

¹⁷ Khokum chih-kip ang pyi kawn ah, Bawipa naw Tire gawnu cu a cau sumlei nak man ung hteh ba sak khai. Khomdek khan ung uktu kho gui avan am, amät naw amät cu khah gui khai.

¹⁸ Sumlei ne a gah ah ngui cu Bawipa am ap vai nei. Ani naw kä m’küm khai nei, cun ung phi ani ah ngui cu Bawipa khawihnah ciah chang gui naw, ami ng’yak hlü ah eiawk la sui sak vai hleih nak khai gui nei.