ISAIAH 22 - Cho Bible Common Language 2016Jerusalem ah Mawng Thumkhäh 1 Shin cu muimang khaw ng’nawi ah mawng thum khäh ah kyak ci. A i ang a kiak? A i ah kya sei, mang gaw ung chang gui ami van nau im gui ah akcih khan ung pawi ami bi ang? 2 Mang gaw avan cu üng eang ne pamcai la cäicat nak awn be ci. Shin ah ng’tuk nak ung sik ciah na chang gui cu, ng’tuk bi ne sik ci gui ah kä kyak ci. 3 Nami chang vai guiami van dawng yawp ci gui, m’la thek ät phi kä ami kah pha ung ami pha gui nei. 4 Sik ciah ka chang gui avanah phäh ah ak tung ah ka thüikyap khai ah tuhbäi ka mät bang na nawng vä. Kei na k’bäi vai ah kä nami tha nak vai nei. 5 Shin ah khin cu muimang khaw ng’nawi ung düngkyong nak, tuk hnim nak, ng’gogan nak ah kyak ci nei, cun cu uk ciah m’gäi ciah Bawipa naw mikmiah khan ah a tüih law ah kyak ci nei. Mi mang gaw ah akpang gui cu ami phyet law ah kyak ci nei. Mi mang gaw ah akpang gui cu ami phyet pyi nei m’htei htang vaiah ami kyah m’lau gui cu kyawgui gui yung shalawng ci nei. 6 Elam khaw ung gakap gui cu ng’se ng’cum u ne, li m’la kawt ne lawk ci gui nei. Kira khaw ung gakap gui cu ami shawi kawt ge ne om ci gui nie. 7 Judah khaw ah ang’ lei k’ni gui cu yatha gui awn be ci nei; Ng’se cun ciah gakap gui cu Jerusalem mang gaw m’kawt ah ama ung ng’düi ci gui nei. 8 Judah ah ng’shungvong nak gui cu ng’gäi yawp ci nei. Cun ah a kyak sang ung nangmi haw likhim gui cu likhimküm ung ka nami lak ci. 9-10 Jerusalem ah mang gaw gui pyan ba vai a hlü nak cu nangmi naw nami hmuk ci. Nangmi naw Jerusalem ung im gui avan cu tengkheng u neta, amshah cu phye ne, lung gui la ne, mang gaw pang gui pyan nak vai ah nam cik ci. Tui m’cun nak vai ah. 11 Cau tuishawk ung ka long lawk ciah tui m’cun nak vaiah Mang gaw kyong ah nangmi naw tuikan nami co ci. Cun ung phi shin gui avan cage tün ne pyang ne, kiaksak ciah khanpughi cu a i ah kä nami ngai ci. 12 Uktu m’gäi ciah Bawipa naw, thüisui sui ne, nami lu k’teiu ne, nami thüi kyah vai ah ning khü gui ci nei. 13 Cunnak vaisü ung nangmi cu gaih ne pawi nami bik ci nei. Htome la seipat ngawn ne ei u ne, sapyit tui nami awk ci nei! Nangmi naw, “Mikmi akni mi ei awk khai nei, Ngawi ung mikmi mi si lawk khai nei” nami cik ci. 14 Uktu m’gäi ciah Bawipa amät naw kei na ng’thu püi ne a pyen cu, “Shin ah akshe ah phäh ah ngami ami ghin ah chuih kä m’geinsei gui vai nei. Kei, m’gäi ciah uktu Bawipa naw ka pyen nei.” Shebna am Ng’thubäi nak 15 M’gai ciah Uktu Bawipa naw, shebna, mang im uktu ah hteit ne ka pyen nak vai ah ana m’thein cu, 16 “Nang cu a u ah na kyak ciah ang na ngaih? Lungkhen k’pang khui shawk ne, ng’phuh hmun pyan nak hning vai nan gung om ne ang? 17 Nang cu aküikyang ah na kya ei khai, cun ung phi Bawipa naw ning kaih hlit ne ning ghawt khai nei. 18 Ani naw nang cu zailung ah mäih ah ning kaih hlit ne, akdäm ah ng’shawng pi ciah khaw ung ning ghawt khai nei. Nang cu na khähghah nak aih ah yatha gui ah pei ah na sik khai nei. Nang cu na bawi ah mang im m’thüi ng’an ciah na kyak khai nei. 19 Bawipa naw nang cu nabi nak ung ka ning heng ne, a hlüng ah na om nak ung ka ning yuk chah khai.” 20 Bawipa naw shebna a pyen nak cu, “A cun gui a kyak law ung, kei naw kachag sham Eliakim, Hilkiah ah hta cu ka tüi lawk khai nei. 21 Kei naw na zungsuinu cu sui ne, na kheipat cu ka pek khai, nan gung om ciah huham avan ani am ka pek khai. Ani cu Jerusalem la Judah chang gui ah ami pa ah mäih ah kyak khai. 22 Kei naw David ah hta ng’shon, ghangpughang ah aka ung huham akbe ah ka pek khai. Ani cu yung m’kawt hmawn nak ah htawh ah kya ne; ani naw ak hmawn cu a u naw kä khai khai, ani naw a khai cu a u naw kä hmawng khai. 23 Kei naw ani cu sing hmui ah mäih ah ka khan sak khai, ani cu akyong chang avan ung m’tamkhah nak ah aphung ah kyak khai. 24 “Cun ung phi ani mätyah gui la ziihnei ci gui ami van cu ani ah phäh ah phuihgih ah kyak khai. Sing hum ui ung bah ah khawk la k’am gui ah mäih ah ngami naw ani cu ng’bah nak khai gui! 25 Cun ah a kyak law ung, htek ciah sing hmui cu längbang law ne kiuk khai. Cun cu a cun ung bah gui nü ah ang pyi nak ah kyak khai.” Ci ne Bawipa naw pyen ci. |
Cho Bible Common Language © Bible Society of Myanmar, 2016.
Bible Society of Myanmar