ISAIAH 21 - Cho Bible Common Language 2016

Babilon ah Ng’kyak nak vai ah Mawng Muimang

¹ Shin cu Babilonia ah mawng thumkhäh ah kyak ci. Khawng gau khaw kan ne ng’pheet lawk ciah kuiphak ah mäih ah. Leigai cu kyih vai kyak ciah khaw ung ka gawk lawk khai nei.

² M’gäi cik nak gui, kä bekhüt nak gui la m’di m’shum nak gui cu kei naw ka muimang ung ka hmuk ci nei. Elam gakap gui, tuhnim vä! Media gakap gui, mang gaw gui cu khaai vä! Babilon naw a bi ah yaica nak cu khanpughi naw ng’pyi sak khai nei.

³ Muimang ung ka hmuh la ka ng’yak naw kyinnak la natnak na pek ci nei, cun natnak cu a nau poi m; neh ciah hnumi ah m’neh ah mäih ah kyak ci.

⁴ Kei ah kalu cu nak phiui ci nei, kei cu kyi ne ka ng’hlet ci nei. Kei naw khaw mühun cu ka gingeo ci nei, cun ung phi cun naw a i kä law püi ci, kyih nak bang ah kya ci.

⁵ Ka muimang ung müei cu ami pyan pyi ah kyak ci; khin gui ami ngoh nak vai ah phla-phak gui cu phah pyi ah kyak ci. Ngami cu ei awk ci gui. Ang ghit ah thukbäi gaw lawk ci, “Bawi gui aw! Nami shawi gui m’shei ge vä!”

⁶ Cun kawn ah Bawipa naw ana pyen nak cu, “Hteit ne ngäng khai tumat na tha vai, a hmuh phung a pyen law ba vai ah na m’thein vai.

⁷ Ani naw ng’se ng’cum ci gui hnih ci hnih ci ah, laa ng’cum ci gui, kalauk ng’cum ci gui ami law a hmuh ah a kyak ung geing na ne a teng gui vai.”

⁸ Ngäng ci naw ng’khü ne, “Bawi aw, amü a hnüüp ng’düi ne ka ngäng ci nei,” a ci sang u ng.

⁹ Ang ghit ah shin ung lawk ci gui nei! Se cun ciah chang gui, hnih ci hnih ci ah. Ngäng ci naw pyen lawkci, “Babilon cu zu ng’kia pyi ci nei! Ami khawihnah ah a gup gui avan cu hnget ne ng’kiam ne m’dek ung ng’zän ci gui nei.”

¹⁰ Ka chang Israel gui aw, nangmi cu htang vui ah mäih ah ning neen gui ci gui nei, cun ung phi tuhbäi, Israel khanpughi m’gäi ciah Bawipa ung ka ng’yak ah thuni cu nangmi ung ka ng’shäu lawk ci nei.

Edom ah Mawng Thumkhäh

¹¹ Shin cu Edom ah mawng thumkhäh ah kya ci. Edom ung ka tumat mat naw na khü ci, “Ngäng ci aw, khawmü cu a i hawkehaa ng’pyi khai aw? A i chawk cha a ng’pyi vai cu kei am vam thin ä.”

¹² Kei naw ka m’shan cu, “Khaw thaih cu gawk law pyi ci, cun ung phi khawmü cu law bam ä khai. Na na ng’shi ba mä hlü ah a kyak ung law ba ne na ng’shi law ba ä.”

Arabia ah Mawng thumkhäh

¹³ Shin cu Arabia ah mawng thumkhäh ah kya ci. Sing ah kä ghing nak Arabia khaw ung phung tu ne sumlei ne ng’hle-zatha awn ng’düm ciah nangmi Dedan chang gui.

¹⁴ Nangmi ah lawk ciah tui gha ciah chang gui am tui tu, tu vä. Nangmi Tema khaw ung chang gui, geinvai ciah chang gui am ei m’bei tu vä.

¹⁵ Chang gui cu, ngawn gui ge khai ah khim ung ka, kaap gui ge khai ah lim’la ung ka, ng’tuk nak phung avan ung ka, phyawng khai gui ah dawng ci gui nei.

¹⁶ Cun kawn ah Bawipa naw ana pyen nak cu, “Khokum ät cang ah akyong ung kedara pakhui ah dämduh nak cu ng’pyi khai nei.

¹⁷ Kedara pakhui ung likaap gui cu am gäi pi ah kyak ci gui nei, ngami ung ka, apihta nei k’pawih ba khai gui. Bawipa Israel khanpughi naw ka pyen nei.”