ISAIAH 19 - Cho Bible Common Language 2016

Khanpughi naw Egypt M’kyuk khai

¹ Shin cu Egypt ah mawng thum’khäh ah kyak ci. Bawipa cu khongmei akyäpah ng cun ne Egypt ah lawk ci nei. Egypt gui ah amiagup gui cu ama ah ng’hlet ci gui, Egypt chang gui ami thagui maih ci.

² Bawipa naw pyen ci, “Kei naw Egypt khaw kyong, ung ng’tuk ng’tuk sak gui khai. Ng’längna na ciah mang gaw gui cu humat latumat ng’tuk khai gui, ng’längna na ciah ghangpughang gui cu huham ng’cuh khai gui.

³ Kei naw Egypt gui pawngpüi gui cu a kholä ah kyak sak ne, ami m’lung ngaih cu ka m’di khai, Ngami naw, ngami m’hteinhtang gui khai ah agup gui cu ng’shi thäh khai gui, Ngami naw khaw ah kai gui ah hteit ne ng’shi k’ca khai gui, sik ciah mümcha gui cu am shümthein gui vai ah ng’shi thäh khai gui.

⁴ Kei naw Egypt chang gui cu ngetngawng m’gäim’cik ciah ghangpughang om, ngami uk gui khai am ka ap gui khai, kei, m’gäi ciah Bawipa naw ka pyen nei.”

⁵ Nile tuinu cu kawi ne, tuinu avan kyäp kyäp ah ket khai nei.

⁶ Tuinu ah lawng hmawi gui cu kyäp kyäp ah kawi ne ket khai gui. Phiphät la phai phung gui cu ng’yai khai gui.

⁷ Nile tuinu kem pum ung gitkaw gui cu chawng u sei, khokhi naw zon yawp khai.

⁸ Nile tuinu ung nga shui ne a hnun m’ghin ciah chang nü cu ngüük ne kyap khai gui; ami nga m’kaih la ami ng’vai gui cu groan akholä ah kyak khai.

⁹ Shun tah ci gui cu ami m’lung thüi khai;

¹⁰ Hmui bi ci gui la bilo thei ci gui cu ng’kheiuh u ne thüi sei khai gui.

¹¹ Zoan mang gaw ah ami ng’vai gui cu ang laam ci gui nei! Egypt gui ah cüivau pikbäih ciah chang naw akshekha pikbäih ah m’shüm thein gui ci nei! Ngami naw, ngami cu cau hmumat chang gui la ghangpughang gui ah ng’shon m’täm ci gui ah pyen ne, ghangpughang am a i ah ami

¹² m’thein da tang? Egypt ghangpughang, lunglang ne ning m’shümthein ciah chang gui cu a hawi ang? M’gäi ciah Bawipa naw Egypt ah phäh ah a i pawng püi kü cicu ning m’thein khai gui nei.

¹³ Zoah la Memphis ah ami ng’vai gui cu ang laan ci gui nei. Ngami cu pakhui kmshüm khai gui ah kyak ci, cun ung phi ngami naw km hma a gui nei.

¹⁴ Ng’ganggam ciah m’shümthein nak ami pek vai ah Bawipa naw ci gui ci nei. Akhnu ah Egypt naw ang nü cu chei maih khai ah bikci nei cun cu awktat ne kin shüi shüi ne amshah ung ng’hlawk ciah müih ah kyak ci nei.

¹⁵ Egypt khaw ung bühmang ci, dukhaih ci küi kyang ci, kä ming thang ci, a u naw phi a khaw kä m’hteihtang hlaw t ci nei.

Egypt naw Bawipa Khawihnah khai nei

¹⁶ Egypt chang gui hnumi ah mäih ah ami ng’aa ca nak vai ah akhin gawk lawk ci nei. M’gäi ciah Bawipa naw ngami m’kyuk nak gui vai ah a kut shäng sei ami hmuh ah a kyak ung, ngami cu kyi ne ng’hlet khai gui nei.

¹⁷ M’gäi ciah Bawipa naw ngami ah phäh ah a piam pek gui ah ami ma nak vai cu ami m’thein gui ah akhin pang ung Egypt chang gui naw Judah gui cu kyihkyawk gui khai gui.

¹⁸ Cun ah khim a gawk law ung Egypt mang gaw hma cu Hebrew ng’thu ah ng’thu khai gui. A cun ung om ciah bik khai gui. Mang gaw gui ung ka, mang gaw tumat cu, “Khohni mang gaw” ah khü khai gui.

¹⁹ Cun ah khin a gawk law ung, Egypt khaw ung Bawipa ah sonkiang tumat om khai, Egypt khogii ung ani un gap ah lungktung tumat om khai.

²⁰ Cun gui cu m’gäi ciah Bawipa Egypt khaw ung amoah amwng ang dang nak ah kyak ci. Cu ah om ciah chang gui cu zawk’she na gui u sei, am hteihtang gui vai ah Bawipa khü u sei, ani naw ngami gang gui khai ah chang tumat tüi khai.

²¹ Egypt chang gui ah ma ah Bawipa amät naw amät m’than lawk khai, cun kawn ah ngami naw ani cu hmat law u ne, khawihnak lawk khai gui, khawihnah nak la douthak nak cu law püi khai gui. Ngami naw ami ung bäi ciah shaitak bi u ne, ani shaitak ah mäih ah bik khai gui.

²² Bawipa naw Egypt gui cu m’kyuk gui kahi, cun ung phi gai sak ba gui khai. Ngami cu ani ng’hlat lawk khai gui, ani naw taigü cu ng’yak pe gui hlat lawk khai.

²³ Cun ah khin a gawk law ung, Egypt la Assiria ah ang la kung lamw tumat om lark khai. Cun ah khaw goi ung om ciah chang gui cu goi ah ng’lak ung hteit hton u ne, lula khai gui, chang pakhui goi naw atäng ah khawihnah khai gui.

²⁴ Cun ah khin a gawk law ung, Israel gui cu Egypt la Assiria awn tang khai gui, shin ah pakhui thum cu khomdek khan avan ah hmawk ah nriham ah kyak khai gui.

²⁵ M’gäi ciah Bawipa naw hriham pe gui neta pyen khai, “Kei naw hriham ka ning pe gui khai, Egypt, ka chang gui; Assiria, ka ning tüi sho gui; Israel, ka chang ghü gui.”