ISAIAH 18 - Cho Bible Common Language 2016

Khanpughi Naw Sudan M’kyuk Khai

¹ Sudan tuinu gui ah a hnu tang un gang phia khäp ah k’aw ng’yak ah khaw tumat om ci.

² Cun ah khaw ung ka shächang gui cu, phiphät gong awn pyan ah hleikaw gui awn Nile tuinu ung kyum lawk ci gui. Nami im ah hteit ba vä, zangkhai ciah shächang gui! Shin ah ng’thu cu, tuinu gui naw am cha ah nami khaw ah thamah ne, huham mah ciah nami pakhui ah, däm ng’shäi ne, kyom ciah nami chang gui, khomdek khun ung van naw akyih gui ah, hteh püi ba vä.

³ Khomdek khan ung om ciah chang nü naw ngai vä! Khomhtung gui ah alai ung m’düih ah m’hnüt nak ah alan cu teng vä! Phyungpuuk tum cu ngai vä!

⁴ Bawipa naw nap yen nak ci, “Geit khäm khin ung awh ciah mü ung khüi a bawk ah mäih ah, kholing aiah khohnüüp ung, cine m’leng ciah khohni a sau ah mäih ah kei naw khankhaw ung ka naw adüm ah ka yuk teng lawk khai nei.

⁵ Sapyit gui kä khäm pha ung, apai gui a van kiawi ne ang theih gui avan up khäta a ghing ungka ang ban gui cu khim awn a yäih hta ah tukpit ah mäih ah Sudan gui cu ga gui naw m’di khai gui nei!

⁶ Ami gakap gui ah ami geok gui cu kha gui la khisa gui ah ma ah m’auh ne nawng khai gui. Khaw cha ah kha gui naw, khawsik ah khisa gui naw, cun ah ami gook gui cu ei khai gui.”

⁷ Tuinu gui naw am cha ah khaw, shin ah gaigawng ne huham mah ciah pakhui, ng’sau ne ami vun ng’mi aiah chang gui, khomdek khan avan ung ami kyih kyawk gui ah douthak gui cu m’gäi ciah Bawipa naw a gah nak vai ah akhin gawk lawk ci nei. Ngami cu m’gäi ciah Bawipa khawihnah nak ah Zion M’htung ah lawk khai gui nei.